സ്‌കൂളിലും ചേര്‍ത്തു,സൈക്കിളും വാങ്ങിക്കൊടുത്തു;നന്മയുള്ളൊരു സബ് ഇന്‍സ്‌പെക്ടര്‍
പരിത്തിപ്പറ്റ കളക്കുന്ന് കോളനിയില്‍ താമസിക്കുന്ന ചിങ്കക്കല്ലിലെ സുധീഷിന് സൈക്കിളില്‍ സ്‌കൂളില്‍പോകാം. 11-ാം വയസില്‍ സ്‌കൂളില്‍ ചേര്‍ത്ത സുധീഷിന്റെ ഏക ആവശ്യം സൈക്കിള്‍വേണം എന്നായിരുന്നു. പ്രായം കഴിഞ്ഞിട്ടും സ്‌കൂളില്‍ ചേര്‍ക്കാതിരുന്ന സുധീഷിനെ കാളികാവ് എസ്.ഐ എം.ടി പ്രമോദ് ഇടപെട്ടാണ് പെടയന്താള്‍ ഗവ. എല്‍.പി സ്‌കൂളില്‍ ചേര്‍ത്തത്. സൈക്കിള്‍ വെള്ളിയാഴ്ച എസ്.ഐ.തന്നെ കോളനിയിലെത്തിച്ചു കൊടുത്തു.
വാഹനാപകടത്തിലെ പരിക്കിനെത്തുടര്‍ന്നുള്ള അച്ഛന്റെ മരണമാണ് സുധീഷിന്റെ പഠനത്തിന് ആദ്യം തടസ്സമായത്. രണ്ടുവര്‍ഷം കഴിഞ്ഞപ്പോഴേക്ക് കുടിലിന് മുകളില്‍ മരംവീണ് സഹോദരന്‍ മരിച്ചു. അമ്മയ്ക്ക് ഗുരുതര പരിക്കുപറ്റിയത് വീണ്ടും തിരിച്ചടിയായി. അമ്മയുടെ പരിക്കുകള്‍ ഭേദമായി തിരിച്ചെത്തിയെങ്കിലും പ്രായം കൂടുതലായതിനാല്‍ സുധീഷ് സ്‌കൂളില്‍ പോകാന്‍ തയ്യാറായില്ല. പലരും ഇടപെട്ടെങ്കിലും കാട്ടിലൊളിച്ചും ഓടി മറഞ്ഞും ഒഴിഞ്ഞുമാറി.
ഈ വര്‍ഷം സ്‌കൂളില്‍ പോകാത്ത കുട്ടികള്‍ കളക്കുന്ന് കോളനിയിലുണ്ടെന്നറിഞ്ഞ് കാളികാവ് എസ്.ഐയും സംഘവും എത്തി കോളനിയിലെ എട്ട് കുട്ടികളെ ഒന്നാംക്ലാസില്‍ ചേര്‍ത്തു. ഇതിനിടയിലാണ് സുധീഷിനെ കാണുന്നത്. സൈക്കിളുവേണമെന്ന ആവശ്യം മുന്നോട്ടുെവച്ചു. തര്‍ക്കത്തിനും ചര്‍ച്ചയ്ക്കും പോകാതിരുന്ന് എസ്.ഐ പ്രമോദ് ആവശ്യം അംഗീകരിച്ചു. വെള്ളിയാഴ്ച പുതിയ സൈക്കിള്‍ വാങ്ങിച്ച് സുധീഷിന് നല്‍കി. വിവിധ സ്ഥലങ്ങളില്‍ ചുമതലയുള്ള തിനാലാണ് സൈക്കിള്‍ നല്‍കാന്‍ വൈകിയതെന്ന് എസ്.ഐ. പറഞ്ഞു.
https://www.facebook.com/Malayalivartha
