കാടുപിടിച്ചു കിടക്കുന്ന പറമ്പുകളിലൂടെ നടക്കണം. തുടര്‍ന്ന് ഒരു തോട്ടില്‍ ഇറങ്ങി തോടിനു കുറുകെയുള്ള സ്ലാബിനടിയിലൂടെ കുനിഞ്ഞു കടക്കണം. എന്നാലേ ലീലയുടെ വീട്ടിലെത്തൂ.

അറുപത്തിയേഴുകാരിയായ മേക്കാട്ട്പാടം ലീല ഈ ദുരിതപാത താണ്ടിയാണ് എന്നും സ്വന്തം വീട്ടില്‍ നിന്നു പുറത്തിറങ്ങുന്നത്. നഗരസഭ 12-ാം വാര്‍ഡില്‍ പള്ളിത്താഴത്താണ് ഇവരുടെ താമസം. ഏറെനാളായി ഒറ്റയ്ക്കാണ്.

55 വര്‍ഷമായി ഇതേ സ്ഥലത്താണു താമസിക്കുന്നതെങ്കിലും സ്വന്തമായി വഴിയില്ലാത്തതിനാലാണു ദുരിതയാത്ര ചെയ്യേണ്ടിവരുന്നത്.

പള്ളിത്താഴം കോണ്‍വന്റ് റോഡരികിലുള്ള പൈപ്പിന്റെ സമീപത്തുകൂടെ ഇറങ്ങി കാടുപിടിച്ച പറമ്പുകള്‍ താണ്ടിയുള്ള സഞ്ചാരം ഭയാനകമാണ്.

നഗരസഭയുടെ ഡംപിങ് യാര്‍ഡിലെ ജീവനക്കാരിയാണിവര്‍. രാത്രിയില്‍ വെളിച്ചം പോലുമില്ലാത്തപ്പോഴും ലീല ഈ വഴിയിലൂടെ നടക്കേണ്ടിവരുന്നു.