മലയാളി ഡോക്ടര് പ്രീതി ഡാനിയേല് പറയുന്നതിങ്ങനെ
ഒരിക്കലെങ്കിലും പബ്ലിക് ടോയ്ലറ്റില് കയറാത്തവര് ആരുമുണ്ടാവില്ല. കനത്ത ദുര്ഗന്ധവും അഴുക്കും അടിഞ്ഞുകൂടിയ ഇത്തരം ടോയ്ലറ്റുകള് രോഗം പരത്തുന്ന കേന്ദ്രങ്ങള് കൂടിയാണ്. ആശുപത്രിയിലെത്തുന്ന ഭൂരിഭാഗം പേരും ഡോക്ടര്മാരില്നിന്ന് ഉപദേശം തേടുന്നതും പബ്ലിക് ടോയ്ലറ്റുകളില്നിന്ന് രോഗം വരാതെ എങ്ങനെ സൂക്ഷിക്കാം എന്നതിനെക്കുറിച്ചായിരിക്കും. ടോയ്ലറ്റ് സീറ്റിലിരിക്കുന്നതുകൊണ്ടും ടോയ്ലറ്റ് ഉപയോഗിച്ചശേഷം കൈകള് ശുചിയാക്കാത്തതുകൊണ്ടും രോഗം വരാനുള്ള സാധ്യതകളേറെയാണ്.
പബ്ലിക് ടോയ്ലറ്റുകളില് നിന്ന് നിങ്ങള്ക്ക് ഗുണേറിയയും സിഫിലിസും പോലുള്ള ലൈംഗിക പകര്ച്ചവ്യാധികള് പിടിപെട്ടേക്കാമെന്ന് വിശ്വസിക്കുന്നവരുമുണ്ട്. എന്നാല്, രോഗാണുക്കള് നിങ്ങളുടെ ജനനേന്ദ്രിയത്തിലേക്ക് നേരിട്ട് കടക്കുന്ന സാഹചര്യമോ കാലിലോ ഇടുപ്പിലോ ഉള്ള മുറിവിലൂടെ രോഗാണുക്കള് കടക്കാനുള്ള സാഹചര്യമോ ഇല്ലെങ്കില് ഇത്തരം രോഗങ്ങള് വരില്ലെന്നതാണ് യാഥാര്ഥ്യം. എന്നാല് മറ്റു ചില രോഗങ്ങള് പബ്ലിക് ടോയ്ലറ്റുകളില്നിന്ന് പകരാനുള്ള സാധ്യതയുമേറെയാണ്.
പബ്ലിക് ടോയ്ലറ്റുകളില്നിന്ന് രോഗം വരാനുള്ള സാധ്യതകള് എത്രത്തോളമാണെന്നത് സംബന്ധിച്ച് എന്എച്ച്എസിലെ മലയാളി ഡോക്ടര് പ്രീതി ഡാനിയേല് നല്കുന്ന ഉപദേശമാണ് ഇപ്പോള് ബ്രിട്ടനിലെ സംസാരവിഷയം. പബ്ലിക് ടോയ്ലറ്റില് കയറി എന്നതുകൊണ്ട് നിങ്ങള്ക്ക് പനിയോ ജലദോഷമോ വരാനുള്ള സാധ്യതകള് കുറവാണ്. ടോയ്ലറ്റിലെ പ്രതലങ്ങളില് ഇത്തരം വൈറസുകള്ക്ക് തങ്ങാനാവില്ലെന്നതുതന്നെ കാരണം.
എന്നാല്, ഇകോളി, സാല്മൊണെല്ല ബാക്ടീരിയകള് ഇത്തരം സാഹചര്യങ്ങളില് ഉണ്ടാകാനുള്ള സാധ്യതയേറെയാണ്. കൈകള് നന്നായി ശുചിയാക്കുന്നതിലൂടെ പബ്ലിക് ടോയ്ലറ്റില്നിന്ന് നിങ്ങളുടെ കൈകളിലെത്തിയിട്ടുള്ള ബാക്ടീരിയയെ ഒഴിവാക്കാനാകുമെന്ന് പ്രീതി പറയുന്നു. മൂത്രമൊഴിക്കുന്നതിലൂടെ നിങ്ങള്ക്ക് യൂറിനറി ഇന്ഫെക്ഷനും വരണമെന്നില്ല. എന്നാല്, ബാക്ടീരിയയുമായി നിങ്ങളുടെ ജനനേന്ദ്രിയം നേരിട്ട് സ്പര്ശിക്കുന്ന അവസരമുണ്ടായാല് രോഗസാധ്യതയുണ്ട്.
മൂന്നുകാര്യങ്ങളാണ് പ്രത്യേകം ശ്രദ്ധിക്കേണ്ടത്. ടോയ്ലറ്റ് ഉപയോഗിച്ചശേഷം കൈകള് നന്നായി വൃത്തിയാക്കുക എന്നതാണ് ഏറ്റവും പ്രധാനം. യാത്രയില് ആന്റി ബാക്ടീരിയല് ഹാന്ഡ് സാനിറ്റൈസര് കരുതുകയെന്നതാണ് രണ്ടാമത്തേത്. ടോയ്ലറ്റ് സീറ്റില് ഇരിക്കുന്നതിന് മുമ്പ് ടോയ്ലറ്റ് പേപ്പര് കൊണ്ട് സീറ്റ് മൂടിയശേഷം മാത്രം ഇരിക്കുക. ഇത് അണുക്കളുമായി നേരിട്ടുള്ള സമ്പര്ക്കം കുറയ്ക്കുമെന്നും പ്രീതി പറയുന്നു.
ടോയ്ലറ്റ് സീറ്റിലെക്കാള് അണുക്കള് പബ്ലിക് ടോയ്ലറ്റിന്റെ തറയിലാകും ഉണ്ടാവുക. തറയുമായുള്ള സമ്പര്ക്ക് പരമാവധി കുറയ്ക്കുകയാണ് അതില്നിന്ന് രക്ഷനേടാനുള്ള വഴി. ചെരുപ്പുകള് നിര്ബന്ധമായി ഉപയോഗിക്കുകയും ഹാന്ഡ് ബാഗും മറ്റും തറയില് വെക്കാതിരിക്കുകയും ചെയ്യുക. എത്രവേഗം ആവശ്യം നിറവേറ്റി ടോയ്ലറ്റില്നിന്ന് പുറത്തിറങ്ങാമോ അത്രയും സുരക്ഷിതമാണെന്നും ഡോക്ടര് പറയുന്നു.
https://www.facebook.com/Malayalivartha