താന്‍ അത്രയേറെ സ്‌നേഹിക്കുന്ന സുഹൃത്ത്, സഹപ്രവര്‍ത്തകന്‍ എല്ലാത്തിനുമുപരി കൂടെപ്പിറപ്പ് പോലെയാണ് കണ്ടത്. അതേ സ്വതന്ത്ര്യം വീട്ടിലും നല്‍കി. എന്നാല്‍ ഒരു ദിവസം വീട്ടിലെത്തിയപ്പോള്‍ കണ്ട കാഴ്ച മനസ് മരവിപ്പിക്കുന്നതാണ്. ഭാര്യയുമായി ഒരാള്‍ കെട്ടിമറിയുന്നു. അത് തന്റെ സുഹൃത്താണെന്ന് കണ്ട് സമനില തെറ്റിപ്പോയി. ഒരു നിമിഷം തലകറങ്ങുന്നതുപോലെ. പിന്നെ എല്ലാം പെട്ടെന്നായിരുന്നു. വിശ്വസ വഞ്ചകനായ സഹപ്രവര്‍ത്തകനെ കൊലപ്പെടുത്തിയ ശേഷം വെട്ടിനുറുക്കി ഫ്രിഡ്ജില്‍ ഒളിപ്പിച്ചു. 

ഡല്‍ഹിയിലാണ് സംഭവം നടന്നത്. സംഭവുമായി ബന്ധപ്പെട്ട് മുപ്പത്തിയൊന്നുകാരനായ ബദാല്‍ മണ്ഡല്‍ അറസ്റ്റിലായി. സൗത്ത് ഡല്‍ഹിയിലെ മെഹ്‌റോളിയിലായിരുന്നു സംഭവം. വിപിന്‍ ജോഷിയെന്ന യുവാവാണ് കൊല്ലപ്പെട്ടത്. മണ്ഡലിന്റെ ഭാര്യയുമായി വിപിന്‍ ജോഷിക്ക് ബന്ധമുണ്ടായിരുന്നതാണ് കൊലപാതകത്തില്‍ കലാശിച്ചത്. മണ്ഡലും വിപിനും റസ്റ്ററന്റിലെ ജീവനക്കാരാണ്.

കഴിഞ്ഞ ഒമ്പതാം തീയതിമുതല്‍ വിപിന്‍ ജോഷിയെ കാണാനില്ലായിരുന്നു. ഏഴു ദിവസങ്ങള്‍ക്കു ശേഷം മൃതദേഹം കണ്ടെത്തി. കഴിഞ്ഞ 18 ആം തീയതി ഒഡീഷയിലെ റൂര്‍ക്കലയില്‍നിന്നും മണ്ഡല്‍ അറസ്റ്റിലാകുകയും ചെയ്തു.

ഭാര്യയുമായി ബന്ധമുണ്ടെന്നു നേരിട്ട് മനസിലായതോടെയാണ് ജോഷിയെ കൊലപ്പെടുത്താന്‍ തീരുമാനിച്ചതെന്ന് മണ്ഡല്‍ പോലീസിനോട് പറഞ്ഞു. സംഭവത്തിനു ശേഷം മണ്ഡല്‍ കൊല്‍ക്കത്തയിലെ ബന്ധുവിന്റെ അടുത്തേക്കുമുങ്ങി. എന്നാല്‍ പോലീസ് ഇയാളുടെ മൊബൈല്‍ ഫോണ്‍ പിന്തുടര്‍ന്ന് ഇവിടെയെത്തി. പോലീസ് എത്തുന്നതറിഞ്ഞ് മണ്ഡല്‍ ഇവിടെനിന്നും കടന്നുകളഞ്ഞു. ഒടുവില്‍ റൂര്‍ക്കലയില്‍നിന്നും ഇയാളെ പോലീസ് പൊക്കി.