കഴിഞ്ഞ വര്‍ഷത്തെക്കാള്‍ തണുപ്പേറിയ ശിശിരകാലമാണ് ഇത്തവണ കാനഡയില്‍ അനുഭവപ്പെടുകയെന്നാണ് വിദഗ്ദ്ധര്‍ അഭിപ്രായപ്പെടുന്നത്. എങ്കിലും ശൈത്യത്തിന്റെ കാഠിന്യം എത്രത്തോളം ആയിരിക്കുമെന്ന് ഇപ്പോള്‍ പറയാനാവില്ലെന്നും അവര്‍ വ്യക്തമാക്കി.

കടുത്ത ശീതകാലം തന്നെ പ്രതീക്ഷിക്കണമെന്നാണ് തന്റെ ടീമംഗങ്ങളില്‍ നിന്നും തനിക്ക് ലഭിച്ച സൂചനകളെന്നാണ് വെതര്‍ നെറ്റ്‌വര്‍ക്കിന്റെ മുഖ്യ കാലാവസ്ഥാ വിദ്ഗദ്ധനായ ക്രിസ് സ്‌കോട്ട് അറിയിച്ചത്.

2007/2008-ല്‍ ടൊറന്റോയില്‍ എക്കാലത്തേയും ഉയര്‍ന്ന മഞ്ഞുവീഴ്ചയ്ക്കിടയാക്കിയ കാലാവസ്ഥാ പ്രതിഭാസമായ ലാ നിനയോട് സദൃശമായ ലാ നിനയാണ് ഇത്തവണ അനുഭവപ്പെട്ടതെന്ന് സ്‌കോട്ട് വ്യക്തമാക്കി. സൗത്ത് അമേരിക്കന്‍ തീരപ്രദേശങ്ങളില്‍ കഠിന തണുപ്പുള്ള വെള്ളമുണ്ടാകുമ്പോഴൊക്കെ( ലാ നിന) കാനഡയില്‍ അതിശൈത്യമുള്ള ശിശിരകാലമാണ് ഉണ്ടായിട്ടുള്ളതെന്ന് ചരിത്രത്തില്‍ തെളിവുണ്ടെന്ന് അദ്ദേഹം അനുസ്മരിച്ചു.

എന്നാല്‍ എന്‍വയോണ്‍മെന്റ് കാനഡയുടെ സീനിയര്‍ ക്ലൈമറ്റോളജിസ്റ്റ് ആയ ഡേവ് ഫിലിപ്പ്‌സ് ഇതിനോട് വിയോജിക്കുന്നു. ഇത്തവണത്തെ ലാ നിന കഴിഞ്ഞ വര്‍ഷങ്ങളിലേതു പോലെ അത്ര ശക്തമായിരുന്നില്ല എന്നാണ് അദ്ദേഹത്തിന്റെ അഭിപ്രായം. 50-കളിലും 60-കളിലും 70-കളിലുമൊക്കെ ഉണ്ടായ ലാനിന പോലെയൊന്നും ഇപ്പോള്‍ അനുഭവപ്പെടുന്നില്ലെന്നും ആഗോള താപനവും കാലാവസ്ഥാ വ്യതിയാനവുമൊക്കെയാണ് ഇതിനു കാരണമെന്നും അദ്ദേഹം തുടര്‍ന്നു പറഞ്ഞു.

എന്‍വയോണ്‍മെന്റ് കാനഡ, ശീതകാലത്തെ കുറിച്ചുള്ള കാലാവസ്ഥാ പ്രവചനത്തിന് അന്തിമ രൂപം നല്‍കിയിട്ടില്ലെന്നും എന്നാല്‍ പൊതുവേയുണ്ടാകാറുള്ള ശീതകാലത്തേക്കാള്‍ തണുപ്പു കുറഞ്ഞ ശൈത്യകാലമായിരിക്കും ഗ്രേറ്റ് ലേക്ക് ഏരിയയിലും കിഴക്കന്‍ കാനഡയിലുമെന്നും കാനഡയുടെ പടിഞ്ഞാറന്‍ ഭാഗങ്ങളില്‍ അല്‍പം ശൈത്യം കൂടുതലായിരിക്കുമെന്നുമാണ് കാലാവസ്ഥാ വിശകലനത്തിന്റെ ആദ്യ സൂചനകളില്‍ നിന്നും മനസ്സിലാകുന്നതെന്നുമാണ് ഡേവ് ഫിലിപ്പ്‌സ് പറയുന്നത്.

എന്നാല്‍ കാനഡയുടെ കിഴക്കന്‍ പ്രദേശങ്ങളില്‍ നല്ല കാറ്റോടുകൂടിയ കനത്ത മഞ്ഞു വീഴ്ച ഡിസംബര്‍ മുതലുണ്ടാകുമെന്നും കാനഡയുടെ പടിഞ്ഞാറന്‍ ഭാഗങ്ങളില്‍ ജനുവരി തുടങ്ങുമ്പോഴേ ശിശിരകാലം ആരംഭിക്കുകയുള്ളൂ എന്നുമാണ് ക്രിസ് സ്‌കോട്ടിന്റെ കാലാവസ്ഥാ പ്രവചനം. സ്നോ സ്‌റ്റോമുകളോടു കൂടി മാര്‍ച്ച് വരെ ഇത്തവണ ശൈത്യകാലം നീളുമെന്നാണ് അദ്ദേഹത്തിന്റെ കണക്കു കൂട്ടല്‍. എങ്ങും മഞ്ഞു മൂടി ദേശം വെളുത്ത നിറമായിത്തീരുന്ന വെളുത്ത ശൈത്യകാലം എന്ന ക്ലാസിക് കനേഡിയന്‍ വിന്ററിന് 2018-ല്‍ യാതൊരു സാധ്യതയും കാണുന്നില്ലെന്നു തന്നെയാണ് ഫിലിപ്പ്‌സ് പറയുന്നത്.

നമ്മുടെ ശിശിരകാലങ്ങള്‍ പണ്ടത്തെപ്പോലെയല്ലെന്നും വല്ലാതെ മാറിപ്പോയെന്നുമൊക്കെ പ്രായമുള്ളവര്‍ പറയുന്നതു ശരിയാണെന്നും ഇതു വരെയുള്ള കാലാവസ്ഥാഡേറ്റകള്‍ അത് ശരിവയ്ക്കുന്നുണ്ടെന്നും ഫിലിപ്പ്‌സ് വ്യക്തമാക്കി.സഹിക്കാനാവാത്ത വിധം ശൈത്യമേറിയതല്ലെങ്കിലും കഴിഞ്ഞ വര്‍ഷത്തെക്കാള്‍ തണുപ്പു കൂടിയ ശിശിരകാലം തന്നെയാണ് ഇത്തവണ അനുഭവപ്പെടാന്‍ പോകുന്നതെന്ന് ഫിലിപ്പ്‌സ് ആവര്‍ത്തിച്ചു. കഴിഞ്ഞ 70 വര്‍ഷങ്ങളില്‍ ഏറ്റവും തണുപ്പു കുറവായിരുന്ന ശിശിരകാലങ്ങളുടെ പട്ടികയില്‍ ഏഴാം സ്ഥാനമാണ് ഇക്കഴിഞ്ഞ വര്‍ഷത്തെ വിന്ററിനുള്ളതെന്നും അദ്ദേഹം ഓര്‍മ്മിച്ചു.