ആമസോണിലൂടെ സാധനങ്ങള്‍ കൃത്യസമയത്ത് ലഭിക്കുമ്പോള്‍ നമുക്കൊക്കെ ഏറെ സന്തോഷമാണ്. എന്നാല്‍ സാധനങ്ങള്‍ കൃത്യസമയത്ത് എത്തിക്കാന്‍ ആമസോണ്‍ ഡ്രൈവര്‍മാര്‍ താങ്ങുന്ന ദുരിതം ആര്‍ക്കുമറിയില്ല. ആമസോണ്‍ ഡ്രൈവര്‍ ഒരു ദിവസം വിതരണം ചെയ്യേണ്ടത് 200 പാര്‍സലുകളാണെന്ന ഞെട്ടിപ്പിക്കുന്ന വസ്തുതയാണിപ്പോള്‍ വെളിപ്പെട്ടിരിക്കുന്നത്.

ട്രാഫിക്ക് ബ്ലോക്കോ മറ്റ് ബുദ്ധിമുട്ടുകളോ ഉണ്ടായാലും അതൊന്നും കമ്പനി കണക്കാക്കില്ലെന്നും ഡ്രൈവര്‍മാര്‍ ഈ ടാര്‍ജറ്റ് എന്തായാലും പാലിക്കണമെന്നുമാണ് വെളിപ്പെട്ടിരിക്കുന്നത്. ഇത്തരത്തില്‍ എത്ര മണിക്കൂര്‍ വൈകി ജോലിയെടുത്താലും ഇവര്‍ക്ക് കമ്പനി മിനിമം വേജ് മാത്രമേ നല്‍കുകയുമുള്ളൂ. ഇതുമായി ബന്ധപ്പെട്ട് സണ്‍ഡേ മിറര്‍ അടുത്തിടെ നടത്തിയ ഒരു അന്വേഷണത്തിലാണ് ഞെട്ടിക്കുന്ന ഈ സത്യങ്ങള്‍ വെളിപ്പെട്ടിരിക്കുന്നത്.

ജോലിക്കിടെ മൂത്രമൊഴിക്കാന്‍ പോലും ഇടവേള ലഭിക്കാത്തതിനാല്‍ പലരും വണ്ടിയില്‍ കരുതിയിരിക്കുന്ന ബോട്ടിലിലാണ് മൂത്രമൊഴിക്കുന്നതെന്നും കണ്ടെത്തിയിട്ടുണ്ട്. പരമാവധി 11 മണിക്കൂര്‍ മാത്രമേ ജോലി ചെയ്യിപ്പിക്കാവൂ എന്ന നിയമം ഉണ്ടെങ്കിലും തങ്ങള്‍ ടാര്‍ജറ്റ് പാലിക്കാനായി അതിലും എത്രയോ അധികം മണിക്കൂറുകള്‍ ജോലി ചെയ്യാന്‍ നിര്‍ബന്ധിതരാകുന്നുവെന്നാണ് ആമസോണ്‍ ഡ്രൈവര്‍മാര്‍ വെളിപ്പെടുത്തിയിരിക്കുന്നത്. ട്രാഫിക്ക് ജാമുകള്‍, റോഡ് അടയ്ക്കല്‍, കാലാവസ്ഥാ പ്രശ്നങ്ങള്‍ തുടങ്ങിയവയൊന്നും പരിഗണിച്ച് കമ്പനി ടാര്‍ജറ്റില്‍ ഇളവ് അനുവദിക്കാറില്ലെന്നും അവര്‍ ആരോപിക്കുന്നു.

ഇത്തരത്തില്‍ ആമസോണിന് വേണ്ടി പാക്കേജുകള്‍ വിതരണം ചെയ്യുമ്പോള്‍ തങ്ങള്‍ നേരിടേണ്ടി വരുന്ന ദുരവസ്ഥകളെക്കുറിച്ച് ഡ്രൈവര്‍മാര്‍ വെളിപ്പെടുത്തിയതിനെ തുടര്‍ന്ന് ഇതിനെക്കുറിച്ച് അന്വേഷിക്കാന്‍ ഡ്രൈവിംഗ് ആന്‍ഡ് വെഹിക്കിള്‍ സ്റ്റാന്‍ഡേര്‍ഡ്സ് ഏജന്‍സി നിര്‍ദേശിച്ചിട്ടുണ്ട്. ഡ്രൈവര്‍മാരെ ആമസോണ്‍ നേരിട്ട് നിയമിക്കുകയല്ല ചെയ്യുന്നത്. മറിച്ച് ഏജന്‍സികളിലൂടെ അവരെ റിക്രൂട്ട് ചെയ്യുകയാണ്. തുടര്‍ന്ന് ആമസോണ്‍ ആപ്പ് വഴിയാണിവര്‍ പ്രവര്‍ത്തിക്കേണ്ടത്. ഡെലിവറി റൂട്ടുകള്‍ നിശ്ചയിച്ച് ആമസോണ്‍ ആണ്.

മൂത്രമൊഴിക്കാന്‍ സമയമില്ലാത്തതിനാല്‍ ബോട്ടിലുകളില്‍ മൂത്രമൊഴിച്ച് അതുമായി വണ്ടിയില്‍ സഞ്ചരിക്കുന്ന പ്രവണത ആമസോണ്‍ ഡ്രൈവര്‍മാര്‍ക്കിടയില്‍ ഉണ്ടെന്ന് കണ്ടെത്തിയതിനാല്‍ ഡ്രൈവര്‍മാരെ അതിന് അനുവദിക്കരുതെന്ന് മാനേജര്‍മാര്‍ക്ക് കടുത്ത നിര്‍ദേശം നല്‍കിക്കൊണ്ട് ആമസോണ്‍ ഇമെയില്‍ അയച്ചിട്ടുണ്ടെന്ന് ഒരു ഡ്രൈവര്‍ വെളിപ്പെടുത്തി. സെക്യൂരിറ്റി ഗാര്‍ഡുമാര്‍ ഈ പ്രശ്നം ജനങ്ങള്‍ക്ക് മുമ്പില്‍ വെളിപ്പെടുത്തിയതിനെ തുടര്‍ന്നാണ് ആമസോണ്‍ ഈ പ്രവണതക്കെതിരെ തിരിഞ്ഞിരിക്കുന്നതെന്നും ഡ്രൈവര്‍ പറയുന്നു. ഡ്രൈവര്‍മാര്‍ ഏതൊക്കെ സ്റ്റോപ്പുകളില്‍ നിര്‍ത്തണം, എത്രമാത്രം സാധനങ്ങളാണ് വിതരണം ചെയ്യേണ്ടത്, തുടങ്ങിയ കാര്യങ്ങള്‍ ആമസോണാണ് നിശ്ചയിക്കുന്നത്.

ട്രാഫിക്ക് പാറ്റേണുകള്‍, വേഗതാ പരിധികള്‍ തുടങ്ങിയവ കണക്കിലെടുത്ത് സോഫസ്റ്റിക്കേറ്റഡ് സോഫ്റ്റ് വെയറിലൂടെയാണ് ഈ റൂട്ടുകള്‍ കണക്ക് കൂട്ടുന്നതെന്നും അതിനാല്‍ ഇതില്‍ പാകപ്പിഴകളൊന്നുമില്ലെന്നുമാണ് ആമസോണ്‍ വെളിപ്പെടുത്തുന്നത്. എന്നാല്‍ തങ്ങള്‍ ദിവസത്തില്‍ 14 മണിക്കൂറുകള്‍ വരെ ജോലിചെയ്യേണ്ടി വരുന്നുവെന്നും അതിന് വെറും 103 പൗണ്ട് മാത്രമാണ് ലഭിക്കുന്നതെന്നുമാണ് മിക്ക ഡ്രൈവര്‍മാരും പരാതിപ്പെടുന്നത്.