കൊലക്കേസ് തെളിയിച്ചത് അടിവസ്ത്രം..! അന്വേഷണ ഉദ്യോഗസ്ഥന്‍ ആ കഥ പറയുന്നു!
റിട്ടയേര്‍ഡ് ഡിവൈ.എസ്.പി: ടി.കെ.തോമസിന്റെ ആത്മകഥയായ 'കല്ലും കാക്കിയും' എന്ന പുസ്തകത്തിലെ ഒരധ്യായത്തില്‍ ഇങ്ങനെ പറയുന്നു: 'കൊല നടന്ന സ്ഥലത്ത് നിന്ന് ഇന്‍ക്വസ്റ്റ് കഴിഞ്ഞ് സ്‌റ്റേഷനിലേക്കുള്ള യാത്രയിലായിരുന്നു. ക്രൈം സീനില്‍ നിന്ന് ആകെ കിട്ടിയ തെളിവ് ഒരു അടിവസ്ത്രം മാത്രമാണ്. പ്രതിയെ എങ്ങനെ കണ്ടുപിടിക്കുമെന്ന ചിന്തയായിരുന്നു മനസില്‍ മുഴുവന്‍. അടിവസ്ത്രം പുതിയതാണ്. ഇത് എവിടെ നിന്ന് വാങ്ങിയതായിരിക്കും. അന്വേഷണം ഇതില്‍നിന്ന് തന്നെ തുടങ്ങാം.....'
ചാവക്കാട് എടക്കഴിയൂര്‍ നിസാമുദ്ദീന്‍ കൊലക്കേസ്. തൃശൂരില്‍ കോളിളക്കം സൃഷ്ടിച്ച കൊലക്കേസ്. അമാവാസി ഉല്‍സവം കാണാന്‍ പോയ പന്ത്രണ്ടുകാരന്‍ നിസാമുദ്ദീന്‍ കൊല്ലപ്പെട്ടു. പ്രകൃതിവിരുദ്ധ പീഢനത്തിനിടെയായിരുന്നു കൊലപാതകം. കാറ്റാടി മരങ്ങള്‍ക്കിടയിലായിരുന്നു മൃതദേഹം.
നിസാമുദ്ദീന്റെ കൊലയാളിയെ എങ്ങനെ കണ്ടെത്തിയെന്ന്് ടി.കെ.തോമസിന്റെ ആത്മകഥയില്‍ വെളിപ്പെടുത്തുന്നു. ചാവക്കാടും എടക്കഴിയൂരിലും അടിവസ്ത്രം വില്‍ക്കുന്ന കടകളിലേക്ക് പൊലീസുകാരെ വിട്ടു. എന്‍.എം.പിയെന്നാണ് അടിവസ്ത്രത്തിന്റെ ബ്രാന്‍ഡ്. നിരവധി കടകള്‍ കയറിയിറങ്ങി പൊലീസ് മടുത്തു. ഇത്തരമൊരു ബ്രാന്‍ഡ് അധികം കണ്ടിട്ടില്ലെന്നായിരുന്നു മറുപടി. അവസാനം, ഒരു കടയില്‍ ചെന്നപ്പോള്‍ ഈ ബ്രാന്‍ഡിലുള്ള അടിവസ്ത്രം പൊലീസ് കണ്ടു. ഈയടുത്ത ദിവസം അടിവസ്ത്രം വാങ്ങാന്‍ വന്നവരെക്കുറിച്ചായി അന്വേഷണം. കടക്കാര്‍ എങ്ങനെ ഓര്‍ത്തിരിക്കും ഇതെല്ലാം. പൊലീസ് നിരാശരായി മടങ്ങി.
കുട്ടികളെ പീഡിപ്പിച്ചതിന് പിടിക്കപ്പെട്ട ആരെങ്കിലും ചാവക്കാട് ഉണ്ടോ? ഈ ചോദ്യത്തിന് ഉത്തരം തേടിയപ്പോള്‍ ഒരു ഡസന്‍ ആളുകള്‍. ഇതിലൊരാള്‍ മല്‍സ്യതൊഴിലാളി ഹംസുവായിരുന്നു. രാവിലെ മീന്‍ പിടിക്കാന്‍ പോയ ഹംസു രാത്രി മടങ്ങിയെത്തി. ഉടന്‍ തന്നെ പൊലീസ് പൊക്കി. സ്‌റ്റേഷനില്‍ കൊണ്ടുവന്ന് ചോദ്യംചെയ്യുന്ന നിരവധി പേരുടെ കൂട്ടത്തില്‍ ഹംസുവുമുണ്ടായിരുന്നു. പത്തു വയസുകാരിയെ പീഡിപ്പിച്ച കേസില്‍ പത്തു വര്‍ഷം തടവിന് ശിക്ഷിക്കപ്പെട്ടയാളാണ്. സംശയം ഹംസുവിലേക്ക് നീങ്ങാന്‍ ഒരു കാരണം ഇതായിരുന്നു. അര്‍ധരാത്രി വരെ നീണ്ട ചോദ്യംചെയ്യലില്‍ ആരും കുറ്റം സമ്മതിച്ചില്ല.
അന്ന്, കുന്നംകുളം ഡിവൈ.എസ്.പിയായിരുന്ന ടി.കെ.തോമസിന്റെ മനസ് പറഞ്ഞു. ക്രൈം സീനില്‍ നിന്ന് കണ്ടെടുത്ത അടിവസ്ത്രം നോക്കാനാണ് ഡിവൈ.എസ്.പിക്കു തോന്നിയത്. ഹംസു അപ്പോള്‍ ധരിച്ചിരുന്ന അടിവസ്ത്രം പരിശോധിച്ചപ്പോള്‍ ഒരേ ബ്രാന്‍ഡിലുള്ളത്. പലകുറി ആവര്‍ത്തിച്ച് ചോദിച്ചു. ഹംസു കുറ്റം സമ്മതിക്കുന്നില്ല. ഉടനെ, കടക്കാരനെ സ്‌റ്റേഷനിലേക്ക് വരുത്താന്‍ തീരുമാനിച്ചു. കടക്കാരന് വന്നപ്പോള്‍ കുറ്റവാളിയെ തിരിച്ചറിഞ്ഞു. കാരണം, മൂന്നു ദിവസം മുമ്പ് മൂന്നു അടിവസ്ത്രം വാങ്ങിയ ഹംസുവിന്റെ മുഖം കടക്കാരന് ഓര്‍മ വന്നു. ഇതിനു തൊട്ടുപിന്നാലെ, കുറ്റങ്ങളെല്ലാം ഹംസു ഏറ്റുപറഞ്ഞു. കാരണം, ഇനി പിടിച്ചുനില്‍ക്കാന്‍ കഴിയില്ലെന്ന് കൊലയാളി മനസിലാക്കി.
നിസാമുദ്ദീനെ കൊന്ന ഹംസുവിനെ അന്ന് തൃശൂരില്‍ ജഡ്ജിയായിരുന്ന ബി.കമാല്‍പാഷ(ഇപ്പോള്‍ ഹൈക്കോടതി ജഡ്ജി) വധശിക്ഷയ്ക്കു വിധിച്ചു. നിസാമുദ്ദീന്‍ ഇപ്പോള്‍ ജയിലിലാണ്. ഒരു ക്രൈം സീനില്‍ നിന്ന് കിട്ടുന്ന ഓരോ തെളിവുകളും അന്വേഷണ ഉദ്യോഗസ്ഥര്‍ക്ക് വിലപ്പെട്ടതാണ്. നിസാമുദ്ദീനെ പ്രകൃതിവിരുദ്ധമായി പീഢിപ്പിച്ച ശേഷം കൊലയാളി അടിവസ്ത്രം ധരിക്കാതെ ക്രൈം സീനില്‍ നിന്ന് മടങ്ങി. ഈ അടിവസ്ത്രമാണ് കൊലക്കേസില്‍ നിര്‍ണായക തെളിവായതും കൊലയാളിയെ കുടുക്കാന്‍ സഹായിച്ചതും.
https://www.facebook.com/Malayalivartha
