അന്തരിച്ച ഫുട്ബോൾ ഇതിഹാസം വി. പി സത്യന്റെ ജീവിതത്തെ ആസ്​പദമാക്കി ജി.​ പ്രജേഷ്​സെൻ സംവിധാനം ചെയ്​ത ചിത്രം ക്യാപ്​റ്റൻ തീയറ്ററുകളിൽ മികച്ച പ്രതികരണം നേടി പ്രദർശനം തുടരുകയാണ്. വി. പി സത്യനായി അഭിനയിച്ചിരിക്കുന്നത് നടൻ ജയസൂര്യയാണ്. എന്നും വ്യത്യസ്ത കഥാപാത്രങ്ങൾ ചെയ്ത് പ്രേക്ഷകരെ വിസ്മയിപ്പിക്കുന്ന താരം ചിത്രത്തിൽ ഓരോ സീനും സ്വാഭാവികതയോടെ അവതരിപ്പിച്ചിരിക്കുന്നു.

വി.പി സത്യൻ, രാജ്യം കണ്ട മികച്ച ഫുട്ബോളർ

മുൻ ഇന്ത്യൻ ഫുട്ബോൾ ടീം ക്യാപ്റ്റനും രാജ്യം കണ്ട മികച്ച ഫുട്ബോളറുമായിരുന്നു വി.പി. സത്യൻ . കണ്ണൂർ ജില്ലയിലെ മേക്കുന്നിൽ പോലീസിൽനിന്നു വിരമിച്ച വട്ടപ്പറമ്പത്ത്‌ ഗോപാലൻനായരുടെയും നാരായണിയമ്മയുടെയും മകനാണ്‌ വി.പി സത്യൻ. പത്തു തവണ ഇന്ത്യൻ ടീമിന്റെ ക്യപ്റ്റനായിരുന്നു സത്യൻ. 1993-ൽ 'മികച്ച ഇന്ത്യൻ ഫുട്ബോളർ' ബഹുമതി കരസ്ഥമാക്കി. കേരള ടീമിന്റെയും കേരള പോലീസ്‌ ടീമിന്റെയും സുവർണകാലമായിരുന്നു സത്യന്റെ കാലഘട്ടം. '92-ൽ കേരളത്തെ രണ്ടാം സന്തോഷ് ട്രോഫി കിരീടം നേടുന്നതിലേക്ക്‌ നയിച്ച സത്യൻ 93-ൽ സന്തോഷ് ട്രോഫി നിലനിർത്തിയ ടീമിലും അംഗമായിരുന്നു. ചെന്നൈയിൽ ഇന്ത്യൻ ബാങ്കിന്റെ ഫുട്ബോൾ ടീം കോച്ചും ബാങ്കിന്റെ ചെന്നൈ ഹെഡ്‌ ഓഫീസിൽ അസിസ്റ്റന്റ് മാനേജരുമായിരുന്നു സത്യൻ.

ഏറെക്കാലമായി വിഷാദരോഗം അനുഭവിച്ചിരുന്ന സത്യൻ 41-ആം വയസ്സിൽ 2006 ജൂലൈ 18-ന് ഉച്ചയോടെ ചെന്നൈ പല്ലാവരം റെയിൽവേ സ്റ്റേഷനടുത്തുവച്ച് തീവണ്ടി തട്ടി അന്തരിക്കുകയായിരുന്നു. ആത്മഹത്യ ചെയ്യുകയായിരുന്നുവെന്ന്‌ സൂചിപ്പിക്കുന്ന നാല്‌ കുറിപ്പുകൾ സത്യന്റെ പോക്കറ്റിൽ നിന്ന്‌ കണ്ടെടുത്തിരുന്നു. ഭാര്യ അനിത, മാധ്യമസുഹൃത്തുക്കൾ, കേന്ദ്രമന്ത്രിയും ഇന്ത്യൻ ഫുട്ബോൾ ഫെഡറേഷൻ പ്രസിഡന്റുമായിരുന്ന പ്രിയരഞ്ജൻ ദാസ്‌ മുൻഷി, ഇന്ത്യൻ ബാങ്ക്‌ സ്പോർട്‌സ്‌ സെക്രട്ടറി സുന്ദർ എന്നിവരെയാണ്‌ സത്യൻ അവസാനമായി അഭിസംബോധന ചെയ്ത്‌ കത്തുകൾ എഴുതിയിരിക്കുന്നത്‌.

ജയസൂര്യയുടെ കൈകളിൽ വി. പി സത്യൻ ഭദ്രം

'ദോസ്ത്' എന്ന ചിത്രത്തിൽ ചെറിയൊരു വേഷം ചെയ്തു കൊണ്ട് സിനിമയിലെത്തി. 2002 ൽ വിനയൻ സംവിധാനം ചെയ്ത 'ഊമപ്പെണ്ണിനു ഉരിയാടാപ്പയ്യൻ' എന്ന ചിത്രത്തിലൂടെ നായക പദവിയിലെത്തി. പുതിയ നൂറ്റാണ്ടിന്റെ ആരംഭത്തിൽ മലയാള സിനിമയിൽ രംഗപ്രവേശം ചെയ്ത യുവതാരങ്ങളിൽ ഭൂരിഭാഗം താരങ്ങളും പരാജിതരായിട്ടും അഭിനയ മികവുകൊണ്ട് ജയസൂര്യ തന്റേതായ സ്ഥാനം ഉറപ്പിച്ചു. ഒന്നിലേറെ നായകൻമാരുള്ള ചിത്രങ്ങളാണ് ഈ നടന് ഏറെ നേട്ടമായത്. നായക കഥാപാത്രത്തെ മാത്രമെ അവതരിപ്പിക്കൂ എന്ന പിടിവാശിയില്ലാത്തതും നർമരംഗങ്ങളിലെ മികവുമാണ് വളർച്ചക്ക് സഹായകമായ ഘടകമായത്‌. പിന്നീട് വ്യത്യാസമായ കഥാപാത്രങ്ങളെ അവതരിപ്പിച്ചുക്കൊണ്ട് മലയാളിപ്രേക്ഷകരുടെ മനം കവർന്നു. പുണ്യാളൻ അഗർബത്തീസ്, ആട് ഒരു ഭീകരജീവിയാണ്, ഇപ്പോൾ ക്യാപ്റ്റനിൽ എത്തിനിൽക്കുമ്പോൾ ജയസൂര്യയുടെ കൈകളിൽ വി. പി സത്യൻ ഭദ്രം.

സിനിമാ ജേർണലിസ്റ്റായ സുരേഷ് കുമാർ രവീന്ദ്രൻ പറയുന്നു; ''തികച്ചും വ്യത്യസ്തമായ സമീപനത്തോടെയാണ് ജയസൂര്യ എന്ന നടൻ ഓരോ സിനിമയിലും പങ്കാളിയാകുന്നത്. ഇവിടെയും അത് സംഭവിച്ചു. ആരോഗ്യപരമായ കാരണങ്ങളാൽ കുട്ടിക്കാലം മുതൽക്കേ കായികവിനോദങ്ങളിൽ ഏർപ്പെടാനുള്ള സാഹചര്യം ലഭിച്ചിട്ടില്ലാത്ത, പ്രത്യേകിച്ച്, ഫുട്‍ബോൾ കളിയോട് തീരെ കമ്പമില്ലാത്ത ഒരു വ്യക്തിയായ ജയസൂര്യ, വി.പി.സത്യനെന്ന മഹാനായ ഫുട്‍ബോൾ കളിക്കാരന്റെ വേഷം അതിഗംഭീരമായി അവതരിപ്പിച്ചപ്പോൾ അവിടെ ജയിച്ചത് ജയസൂര്യയിലെ അഭിനേതാവാണ്, കലാകാരനാണ്. ഇടയ്ക്കിടെ, സ്വതസിദ്ധമായ ചില ഭാവങ്ങൾ പ്രകടമാക്കിക്കൊണ്ട് യഥാർത്ഥ ജയസൂര്യ പുറത്തേക്ക് വന്നെങ്കിലും, ഏതാണ്ട് പൂർണ്ണമായും വി.പി.സത്യനായി തന്നെ അദ്ദേഹം സ്‌ക്രീനിൽ നിറഞ്ഞാടി''.

'ക്യാപ്റ്റനെ'ക്കുറിച്ച് മിഥുൻ മാനുവൽ തോമസ് പറയുന്നു..

ക്യാപ്റ്റൻ കണ്ടു.. (വിസ്മയയിലെ പ്രിവ്യു ഷോ).. കുട്ടിക്കാലത്തു ഒരിക്കൽ സ്കൂൾ അവധി കിട്ടിയത് കേരളം സന്തോഷ് ട്രോഫി നേടിയതിന്റെ പിറ്റേന്നായിരുന്നു.. അന്ന് റേഡിയോ കമ്മന്ററിയിൽ കേരളാ ക്യാപ്റ്റൻ വി പി സത്യന്റെ പേര് കമന്റേറ്റർ തൊണ്ട പൊട്ടുമാറു അലറി വിളിച്ചത് ഇന്നലെയെന്നത് പോലെ ഓർക്കുന്നു.. അന്ന് മനസ്സിൽ പതിഞ്ഞ പേരാണ് സത്യൻ..നായകൻ സത്യൻ.. ക്യാപ്റ്റൻ സത്യൻ.. അയാളുടെ നമ്മളറിയാത്ത ജീവിതം ആണ് ഈ സിനിമ.. തിരസ്‌ക്കാരങ്ങളുടെ, അവഗണനകളുടെ നൊമ്പരങ്ങളുടെ കണ്ണീർപ്പാടങ്ങളിൽ പുഞ്ചിരി വിരിയിക്കാൻ പടപൊരുതിയ ഒരു വീരനായകന്റെ കഥ, ഒരു അച്ഛന്റെ കഥ, ഒരു ഭർത്താവിന്റെ കഥ.. തീയറ്റർ വിട്ടിറങ്ങുമ്പോൾ സത്യൻ നമ്മുടെ മനസ്സിലെ തീരാത്ത വിങ്ങലായി മാറും, തീർച്ച. ജയസൂര്യ എന്ന നടൻ വീണ്ടും വിസ്മയിപ്പിക്കുന്നു..ഇത് പോലെ അതിരുകളില്ലാത്ത അഭിനയസാധ്യതകൾ ഉള്ള കഥാപാത്രങ്ങൾ ഇനിയും നിങ്ങളെ തേടി വരും.. ഉറപ്പു.. സത്യന്റെ അനിതയായി അനു സിത്താരയും നമ്മുടെ മനസ്സിലേയ്ക്ക് നടന്നു കയറുന്നു.. പ്രജേഷ് സെൻ - നിങ്ങൾക്ക് അഭിമാനിക്കാൻ വകയുണ്ട് തുടക്കക്കാരാ, നല്ലൊരു സിനിമ അണിയിച്ചു ഒരുക്കിയതിൽ...:) Goodwill entertainments - നിങ്ങൾക്കും അഭിനന്ദനങ്ങൾ.. സത്യനെ വീണ്ടും ഓർക്കാൻ ചുക്കാൻ പിടിച്ചതിന്.. :) പിന്നെ, ഈ സിനിമയുടെ അണിയറയിൽ പ്രവർത്തിച്ച എല്ലാവർക്കും ഒരു ഫുട്ബാൾ പ്രേമിയുടെ, ഒരു സത്യൻ ആരാധകന്റെ സ്നേഹം, ഇഷ്ടം..

വി.പി സത്യന്റെ ഭാര്യ അനിത സത്യൻ 'ക്യാപ്റ്റനെ'ക്കുറിച്ച്...

''ക്യാപ്​റ്റൻ സിനിമ ഒാർമകളിലേക്കുള്ള തിരിച്ചുപോക്കാണ്. സിനിമ കണ്ടപ്പോൾ ഞങ്ങളുടെ കഴിഞ്ഞകാലം ഒാർമകളിൽ ഇരമ്പിവരുകയായിരുന്നു. ഇന്ത്യക്കും കേരളത്തിനും വേണ്ടി നിരവധി മത്സരങ്ങളിൽ നായകനായ സത്യന്റെ കളിക്കളത്തിലെ ഉയർച്ചയും പതനവും ആവിഷ്​കരിക്കുന്ന സിനിമയിൽ അദ്ദേഹത്തിന്റെ ആത്മസംഘർഷങ്ങളും വരച്ചിടുന്നു. നിരവധി വൈകാരിക മുഹൂർത്തങ്ങൾ സമ്മാനിച്ച സിനിമയെക്കുറിച്ച്​ ഇപ്പോൾ കൂടുതലൊന്നും പറയാനില്ല''

പ്രേക്ഷകർ പറയുന്നു...

വി.പി സത്യൻ ആരായിരുന്നു എന്നറിയാൻ രണ്ടര മണിക്കൂർ മാറ്റിവെക്കാനുണ്ടെങ്കിൽ, ജയസൂര്യ, അനു സിത്താര ,സിദ്ദിഖ് തുടങ്ങിയവരുടെ മനം നിറക്കുന്ന അഭിനയം കാണണം എന്നുണ്ടെങ്കിൽ ക്യാപ്റ്റനു ടിക്കറ്റെടുക്കാം, തീയേറ്റർ വിട്ടിറങ്ങുമ്പോൾ കണ്ണിലെ നനവ് ആരും കാണാതെ തുടച്ച് ചിരിക്കാൻ ശ്രമിക്കണ്ട നടക്കില്ല.

ജയസൂര്യ എന്ന നടൻ അഭിനയിക്കുകയല്ല വി.പി സത്യൻ ആയി ജീവിക്കുകയാണ് ചെയ്തത്. അധികമാരും അറിയാതിരുന്ന ഞങ്ങൾ കണ്ണൂരുകാരുടെ സ്വന്തം സത്യന്റെ ജീവിത കഥ എല്ലാവരിലേക്കും എത്തിക്കാൻ സിനിമയാക്കിയ ക്യാപ്റ്റന്റെ അണിയറ പ്രവർത്തകർക്ക് ഒരായിരം അഭിനന്ദനങ്ങൾ. വി പി സത്യൻ എന്ന മനുഷ്യനെ ,അല്ലെങ്കിൽ വി പി സത്യൻ എന്ന ഫുട്ബോൾ സ്നേഹിയെ, അനിത സത്യൻ എത്ര സൂക്ഷ്മമായി മാനസിലാക്കിയിരുന്നു എന്നത് വല്ലാത്തൊരു അനുഭവം തന്നെ. നമ്മൾ അറിയാതെ പോയ ഒരുപാട് കളിക്കാർ ഉണ്ട് ഇവിടെ അതിൽ ഒരാൾ ആയ സത്യൻ അതിന്റെ എല്ലാ രീതിയിലും ജയസൂര്യ മികവുറ്റതാക്കി.

സിനിമയിൽ വി.പി സത്യനെ മാത്രമേ കാണാൻ പറ്റിയുള്ളൂ...... അതാണ്‌ ജയസൂര്യ എന്ന നടന്റെ വിജയം. സിനിമ കഴിഞ്ഞ് മണിക്കൂറുകൾ കഴിഞ്ഞിട്ടും സത്യൻ കൂടെനിന്നും പോകുന്നില്ല. സാധാരണ സ്പോർട്സ് ബയോ പിക്കുകളെല്ലാം... വിജയങ്ങളുടെ കഥ പറയുന്നവയാണ്... ഇതില് എല്ലാം ഉണ്ട്.... ജയവും തോൽവിയും കുടുംബ ബന്ധങ്ങളുടെ തീവ്രതയും. വല്ലാത്തൊരു വേദന തന്നൊരു സിനിമയാണ്. പടം കാണുമ്പോൾ സത്യൻ സാറിനോടും അനിത മേഡത്തിനോടൊപ്പം ജീവിക്കുകയായിരിന്നൂ . കണ്ട് ഇറങ്ങിയിട്ടും മനസീനൊരു നീറ്റൽ ഇപ്പോഴും ദാ ഈ സമയം വരെയും മാറീട്ടില്ല ...വല്ലാത്തൊരു വികാരം. വി പി സത്യൻ എന്ന ഫുട്ബോൾ കളിക്കാരന്റെ ജീവിത കഥ ഏതൊരു മനുഷ്യന്റെയും അല്ലെങ്കിൽ ഏതൊരു ഫുട്ബോളർക്കും പഠിക്കാവുന്നതാണ്. കേരളം മറന്നു പോയ ഈ കളിക്കാരൻ അവിസ്മരണീയമാണ്.

ജയസൂര്യ സത്യന്റെ ജീവിതം അതിമനോഹരമായി കാണിച്ചു തന്നു. ജയസൂര്യ എന്ന ആക്ടറുടെ കരിയറിലെ മികച്ച ഫിലിം.മൊയ്‌ദീൻ കാഞ്ചനയെ ഇഷ്ടപ്പെട്ടപോലെയുള്ള കഥയല്ലിത്. സത്യൻ എന്ന മനുഷ്യൻ സ്വന്തം ജീവിതത്തെ പോലെ ഫുട്ബോളിന് പ്രണയിച്ചത്. വിപ്ലവിന്റെ പടം വന്നു,ക്രിക്കറ്റിന്റെ പടം വന്നു..ഞങ്ങൾ പന്തിനെ സ്നേഹിക്കുന്നവർക്ക് നൽകാൻ പറ്റിയ ഏറ്റവും വല്യ സമ്മാനം.