വിവാഹ ആവശ്യത്തിനായി നാട്ടിലേക്കുള്ള വിമാനത്തില്‍ പോകുമ്പോഴാണ് യുഎഇ സ്വദേശി പെട്ടെന്ന് തിരിച്ചറിഞ്ഞത്. കടം വാങ്ങിയ പണം എവിടെയോ നഷ്ടപ്പെട്ടുപോയെന്ന്! പണമില്ലാതെ ചെന്നാല്‍ വിവാഹം നടക്കില്ലെന്ന് അറിയാവുന്ന അദ്ദേഹം കല്യാണം റദ്ദാക്കാനുള്ള നടപടികള്‍ ആലോചിച്ചു. വീട്ടുകാരുമായി ഇക്കാര്യം പങ്കുവയ്ക്കുകയും റദ്ദാക്കാനുള്ള നടപടിയുമായി മുന്നോട്ടു പോവുകയും ചെയ്തു.

ഇതിനിടെയാണ് പ്രതിശ്രുതവരനായ ആ അറബ് യുവാവിന് അപ്രതീക്ഷിതമായി ഒരു ഫോണ്‍ കോള്‍ വന്നത്. അത് അദ്ദേഹത്തിന്റെ ജീവിതം തന്നെ മാറ്റി മറച്ചു.

ദുബായ് വിമാനത്താവളത്തിലെ ഒരു ജീവനക്കാരന്‍ ആയിരുന്നു ഫോണില്‍. യാത്രക്കാരന്റെ നഷ്ടപ്പെട്ട പണം ലഭിച്ചിട്ടുണ്ടെന്ന് അറിയിക്കാനായിരുന്നു ആ ഫോണ്‍. സന്തോഷം കൊണ്ട് അറബ് യുവാവിന്റെ കണ്ണുകള്‍ നിറഞ്ഞു. ഒപ്പം ദുബായ് വിമാനത്താവളത്തിലെ ജീവനക്കാരന് നന്ദിയും.

വിവാഹ ആവശ്യങ്ങള്‍ക്കായി 18,364 ദിര്‍ഹം കടം വാങ്ങിയാണ് യുവാവ് നാട്ടിലേക്ക് പോയത്. വിമാനത്തില്‍ ഇരിക്കുമ്പോഴാണ് പണം നഷ്ടപ്പെട്ടുവെന്ന കാര്യം ഓര്‍മവന്നതെന്നും എമിറാത് അല്‍ യോം റിപ്പോര്‍ട്ട് ചെയ്തു. 

നിരവധി യാത്രക്കാര്‍ വിലപിടിപ്പുള്ള വസ്തുക്കളും രേഖകളും യാത്രയ്ക്കിടെ മറന്നുപോകാറുണ്ടെന്ന് ദുബായ് എയര്‍പോര്‍ട്ട് സെക്യൂരിറ്റി ഡയറക്ടര്‍ ജനറല്‍ ബ്രിഗേഡിയര്‍ അലി ബിന്‍ ലാഹെ പറഞ്ഞു. വിമാനത്താവള ജീവനക്കാര്‍ യാത്രക്കാര്‍ക്ക് കഴിയുന്നത്ര സഹായം ചെയ്യാനാണ് ശ്രമിക്കുന്നതെന്നും വിലപിടിപ്പുള്ള വസ്തുക്കളും രേഖകളും യാത്രക്കാര്‍ ശ്രദ്ധയോടെ കൈകാര്യം ചെയ്യണമെന്നും അദ്ദേഹം ഓര്‍മിപ്പിച്ചു.