നളിനി ജമീല വീണ്ടും എത്തുന്നു, ഇത്തവണ 'എന്റെ ആണുങ്ങളു'മായി...!
ലൈംഗിക തൊഴിലാളിയുടെ ജീവിതം തുറന്നെഴുതി സദാചാര കേരളത്തെ ഞെട്ടിച്ച നളിനി ജമീലയുടെ ജീവിതകഥയുടെ രണ്ടാം ഭാഗം പ്രസിദ്ധീകരണത്തിനൊരുങ്ങുന്നു. 2005-ല് പുറത്തിറങ്ങിയ 'ഒരു ലൈംഗിക തൊഴിലാളിയുടെ ആത്മകഥ'യുടെ രണ്ടാം ഭാഗമായ 'എന്റെ ആണുങ്ങള്' പണിപ്പുരയിലാണ്. 'റൊമാന്റിക് എന്കൗണ്ടേഴ്സ് ഓഫ് എ സെക്സ് വര്ക്കര്' എന്ന പേരില് ഇംഗ്ലിഷ് പതിപ്പാണ് ആദ്യമിറങ്ങുക.
'റൊമാന്റിക് എന്കൗണ്ടേഴ്സി'ല്, നളിനി ജമീല ലൈംഗികത്തൊഴിലില് സജീവമായിരുന്ന ആയിരത്തി തൊള്ളായിരത്തി എഴുപതുകള് തൊട്ടുള്ള മൂന്നു പതിറ്റാണ്ടു കാലത്തെ ജീവിതത്തില് പരിചയപ്പെട്ട മറക്കാനാവാത്ത ചില പുരുഷന്മാരെ ഓര്ത്തെടുക്കുകയാണു ചെയ്യുന്നത്. വെറുതെ വന്നു പോയ 'ക്ലൈന്റുകള്', പ്രണയത്താലോ സൗഹൃദത്താലോ ശരീരത്തിലും മനസ്സിലും ഇടംപിടിച്ച പുരുഷന്മാര്, ഒരിക്കലും പൊറുക്കാനാവാത്ത ചതിയാല് നളിനിയുടെ ജീവിതം വഴിതിരിച്ചു വിട്ടവര് എന്നിവരെ ഈ ഓര്മക്കുറിപ്പുകളില് കാണാം. മറക്കാനാവാത്ത എട്ടു കഥകളാണു നളിനി ഇതില് വായനക്കാരുമായി പങ്കുവയ്ക്കുന്നത്.
ലൈംഗികത്തൊഴിലാളികള് തൊഴിലിലും തൊഴിലിടത്തിലും നേരിടുന്ന പ്രശ്നങ്ങള് 'പൊതുസമൂഹത്തിനു' മുന്പില് തുറന്നെഴുതുകയാണു നളിനി ജമീലയുടെ ആത്മകഥയുടെ ആദ്യഭാഗം ചെയ്തതെങ്കില്, ലൈംഗികത്തൊഴിലാളിയുടെ വൈകാരിക ജീവിതമാണു പുതിയ കൃതിയിലെ ഉള്ളടക്കം. മലയാളി ആണിനെക്കുറിച്ചുള്ള അപൂര്വ നിരീക്ഷണങ്ങളും നളിനിയുടേതായുണ്ട്. 'എന്റെ ആണുങ്ങള്' എന്ന കൃതിയില്, 'കേരളത്തിലെ ആണുങ്ങള്' എന്ന ആമുഖത്തില് 'മലയാളി ആണുങ്ങളുടെ കള്ളത്തരത്തിനു പറ്റിയ ഭൂമിശാസ്ത്രമാണു കേരളത്തിന്റേതെന്നു പറയുന്നു.
രേഷ്മ ഭരദ്വാജ്, ദിലീപ് രാജ്, ബൈജു നടരാജന് എന്നിവരുടെ സഹായത്തോടെയാണു നളിനി ജമീല പുസ്തകം തയാറാക്കിയിരിക്കുന്നത്. ഇംഗ്ലിഷ് പരിഭാഷ രേഷ്മ ഭരദ്വാജ് നിര്വഹിച്ചിരിക്കുന്നു.
https://www.facebook.com/Malayalivartha