കുഞ്ഞുങ്ങളെ അമിത വൃത്തിയില് വളര്ത്തിയാല് അവര്ക്ക് രക്താര്ബുദത്തിന് സാധ്യത എന്ന് പുതിയ പഠനം
അക്യൂട്ട് ലിംഫോബ്ലാസ്റ്റിക് ലുക്കീമിയ (എ എല് എല്) ബാധിക്കാന് ജനിതകപരമായ സാധ്യതകള് ഉള്ള കുഞ്ഞുങ്ങള്ക്ക്, രോഗാണുക്കളുമായി സമ്പര്ക്കത്തില് വരുവാനുള്ള സാഹചര്യം തീര്ത്തും ഇല്ലാതാക്കിയാല് അത് രോഗം ബാധിക്കാനുള്ള അവരുടെ സാധ്യത വര്ധിപ്പിക്കുകയാണ് ചെയ്യുന്നതെന്ന് ഒരു പുതിയ പഠനം വെളിപ്പെടുത്തുന്നു.
എ എല് എല് ബാധിക്കാന് ജനിതക സാധ്യതകള് ഉള്ള എലികളെ രോഗാണു സമ്പര്ക്കമില്ലാതെ വളര്ത്തിയിട്ട് സാധാരണ ബാക്ടീരിയയ്ക്കും വൈറസിനും മുന്പില് കൊണ്ട് വന്നപ്പോള് തന്നെ രോഗബാധ ഉണ്ടായി എന്നാണ് ഗവേഷകര് പറയുന്നത്. നഴ്സറികളില് പോകുന്ന ശിശുക്കളില്, എ എല് എല് ബാധിക്കാനുള്ള സാധ്യത 30 % കുറവാണെന്ന് മുന്പ് ഒരു പഠനം കണ്ടെത്തിയിരുന്നു. കാരണം അവര് മറ്റു കുട്ടികളുമായി ഇടപഴകുമ്പോള് മറ്റു പല രോഗാണുക്കളുമായും സമ്പര്ക്കത്തിലാവുകയും അസുഖം വരികയും ചെയ്യുന്നത്, അവരുടെ പ്രതിരോധ സംവിധാനത്തെ ശക്തിപ്പെടുത്തുന്നുണ്ടത്രേ.
ഈ ആശയത്തെ ലണ്ടനിലെ ഇന്സ്റ്റിറ്റിയൂട്ട് ഓഫ് കാന്സര് റിസേര്ച്ചിലെ ഗവേഷണത്തിന് നേതൃത്വം നല്കുന്ന പ്രൊഫസര് മെല് ഗ്രീവ്സും ശരി വയ്ക്കുന്നു. കുട്ടികളിലുണ്ടാവുന്ന മിക്ക ക്യാന്സറുകളും പ്രതിരോധിക്കാവുന്നവയാണ് എന്നാണ് അദ്ദേഹത്തിന്റെ അഭിപ്രായം. യു കെ-യില് ഓരോ വര്ഷവും 830 പേര്ക്ക് പുതുതായി എ എല് എല് ബാധിക്കുന്നുണ്ടെന്നും കുട്ടികളില് സാധാരണയായി കാണപ്പെടുന്ന കാന്സര് എ എല് എല് ആണെന്നും അദ്ദേഹം നിരീക്ഷിച്ചിട്ടുണ്ട്.
കഴിഞ്ഞ 40 വര്ഷങ്ങളായി കുട്ടികളിലെ രക്താര്ബുദത്തെ കുറിച്ച് പഠനങ്ങള് നടക്കുകയായിരുന്നെന്നും ഇക്കാലയളവില് രോഗത്തെ കുറിച്ച് കൂടുതല് മനസ്സിലാക്കാന് കഴിഞ്ഞിട്ടുണ്ടെന്നും തന്മൂലം 90 % കേസുകളും ചികില്സിച്ചു മാറ്റാവുന്നതാണെന്ന് മനസ്സിലായിട്ടുണ്ടെന്നും അദ്ദേഹം പറഞ്ഞു. എങ്കിലും എന്തുകൊണ്ട് മറ്റു വിധത്തില് ആരോഗ്യവാന്മാരായ കുഞ്ഞുങ്ങള്ക്ക് ഈ രോഗബാധ ഉണ്ടാവുന്നു എന്നതും ഈ അസുഖം വരാതെ തടയാനാവുമോ എന്ന വസ്തുതയും തന്റെ ചിന്തകളെ മഥിച്ചിരുന്നു എന്നും പ്രൊഫസര് പറഞ്ഞു.
20-ല് ഒരു കുഞ്ഞാണ് എ എല് എല് ബാധിക്കാന് സാധ്യതയോടെ ജനിക്കുന്നതെങ്കിലും അവരിലെ ഒരു ശതമാനത്തില് താഴെ എണ്ണം പേരേ മാത്രമാണ് രോഗം ബാധിക്കുന്നത്. അവര്ക്ക് രോഗ ബാധ ഉണ്ടാകുന്നതിന് പാരിസ്ഥിതിക കാരണങ്ങള് നിര്ണായകമാവുന്നുണ്ട്.
കുട്ടികളിലെ രക്താര്ബുദം കൂടുതലായി കാണുന്നത് മെച്ചപ്പെട്ട ജീവിത സാഹചര്യങ്ങളില് ജീവിക്കുന്നവരുടെ ഇടയിലാണ്. മികച്ച ആരോഗ്യ ശീലങ്ങളും വൃത്തിയുമൊക്കെ ഉള്ളവരുടെ കുട്ടികളിലാണ് രക്താര്ബുദം സാധാരണയായി കാണപ്പെടുന്നത് . തന്മൂലം ശിശുക്കളെ അമിത വൃത്തിയില് വളര്ത്താതെ വലിയ ആപത്തൊന്നും ഉണ്ടാക്കാത്ത, സാധാരണ കാണപ്പെടുന്ന രോഗങ്ങള് വരുത്തുന്ന, രോഗാണുക്കളുടെ സമ്പര്ക്കത്തില് വരുന്ന രീതിയിലുള്ള ജീവിത ശൈലി സ്വീകരിച്ചാല്, കുഞ്ഞുങ്ങളുടെ പ്രതിരോധ സംവിധാനം ശക്തിപ്പെടുമെന്നും അത് എ എല് എല് ബാധ ഉണ്ടാകുന്നതിനുള്ള സാധ്യത കുറയ്ക്കുകയും ചെയ്യുമെന്നാണ് ഈ പഠനം പറയുന്നത്. തീരെ ചെറിയ കുട്ടികളെ ബാക്ടീരിയയെയും വൈറസിനെയും ഒന്നും 'കാണിക്കാതെ' വളര്ത്തുന്നത് വാതം, ചൊറി, ചിരങ്ങ് എന്നിവ ഉണ്ടാകാന് ഇടയാക്കുന്നു എന്ന് നേരത്തെ കണ്ടെത്തിയിരുന്നു.
https://www.facebook.com/Malayalivartha