സഹയാത്രികര്‍ക്കോ എയര്‍പോര്‍ട്ടില്‍ ഉണ്ടായിരുന്ന മറ്റുള്ളവര്‍ക്കോ യാതൊരു സംശയവും തോന്നാതെ ഒരു യുവതിയെ തട്ടിക്കൊണ്ടു പോകുന്നതിന്റെ വീഡിയോ ദൃശ്യങ്ങള്‍ പുറത്തായി. ഇക്കഴിഞ്ഞ മെയ് 6-നാണ് ഹോങ്കോംഗില്‍ ഒരു ഷോര്‍ട്ട് ട്രിപ്പിന് പോയതിനു ശേഷം ജിങ്കെ ഷെന്‍ എന്ന 39-കാരി ബാങ്കോക്കിലെ സുവര്‍ണഭൂമി എയര്‍പോര്‍ട്ടില്‍ ലാന്‍ഡ് ചെയ്തത്. നിമിഷങ്ങള്‍ക്കകം 4 പുരുഷന്മാരും ഒരു സ്ത്രീയും ചേര്‍ന്ന് ആ യുവതിയെ തങ്ങളുടെ നിയന്ത്രണത്തിലാക്കി കൊണ്ടുപോയി. ആ യുവതിയെ തട്ടിക്കൊണ്ടു പോകുകയാണെന്നോ അവര്‍ക്കിടയില്‍ എന്തെങ്കിലും പ്രശ്‌നങ്ങള്‍ ഉണ്ടെന്നോ മറ്റുള്ളവര്‍ക്ക് തോന്നാവുന്ന ഒരു സാഹചര്യവും അവിടെ ഉണ്ടായില്ല.

അവളുടെ കൈയ്യില്‍ പിടിച്ചിരിക്കുന്നവരുമായി ചെറിയ രീതിയില്‍ അവള്‍ ബലം പിടിച്ചു നോക്കുന്നതായി സി സി ടി വി ദൃശ്യങ്ങളില്‍ കാണുന്നുണ്ട്. ചുവന്ന ഷര്‍ട്ട് ധരിച്ച ഒരാള്‍ അവര്‍ക്ക് അല്‍പം മുന്നിലായി എപ്പോഴും ഉണ്ടായിരുന്നു. സെക്യൂരിറ്റി ചെക്കിംഗ് സമയത്തെല്ലാം അവര്‍ അവളുടെ കൂടെ ഉണ്ടായിരുന്നു. പിന്നീട് ലഗേജ് കറൗസലില്‍ എത്തിയപ്പോഴേക്കും കറുത്ത വസ്ത്രം ധരിച്ച മറ്റു രണ്ടു പുരുഷന്മാര്‍ അവരോടൊപ്പം ചേരുന്നതായി കാണുന്നുണ്ട്.

ചൈനീസ് പുരുഷന്മാരും ഒരു സ്ത്രീയും ഉള്‍പ്പെടുന്ന ആ സംഘം പിന്നീട് അവളുടെ ഭര്‍ത്താവിനെ വിളിച്ചിട്ട് 10 മില്യണ്‍ തായ്ലന്‍ഡ് ബത് മോചനദ്രവ്യമായി നല്‍കിയാല്‍ അയാളുടെ ഭാര്യയെ വിട്ടയ്ക്കാമെന്ന് അറിയിച്ചു.അവരാവശ്യപ്പെട്ട തുക നല്‍കി കഴിഞ്ഞപ്പോള്‍ മറ്റൊരു 5 മില്യനും കൂടി അവര്‍ ആവശ്യപ്പെട്ടതോടെ ഭര്‍ത്താവ് പോലീസ് സഹായം തേടുകയായിരുന്നു. പിന്നീട് 13 ദിവസത്തോളം അവരുടെ തടവില്‍ വച്ചിരുന്ന മിസ്സിസ് ഷെന്നിനെ മെയ് 19-ന് ബാങ്കോക്കിലെ ബാംഗ്‌ന ജില്ലയിലെ ഒരു വഴിയരികില്‍ ഉപേക്ഷിയ്ക്കപ്പെട്ട നിലയില്‍ കണ്ടെത്തുകയായിരുന്നു. പത്തു പേരോളം അടങ്ങിയ സംഘത്തില്‍ ഇമിഗ്രേഷന്‍ പോലീസ് ഓഫീസിലെ പോലീസ് സീനിയര്‍ സാര്‍ജന്റ് മേജറും ഉള്‍പ്പെടുന്നുണ്ടെന്ന് ഇന്‍വെസ്റ്റിഗേഷന്‍ ചുമതല വഹിക്കുന്ന ഉദ്യോഗസ്ഥന്‍ അറിയിച്ചു.

തായ്‌ലന്‍ഡില്‍ നിന്ന് കടന്നുകളഞ്ഞ സംഘത്തിലെ ചൈനീസ് പൗരന്മാര്‍ക്കെതിരെ അറസ്‌റ് വാറണ്ട് പുറവെടുവിച്ചു കഴിഞ്ഞുവെന്ന് അന്വേഷണ ഉദ്യോഗസ്ഥര്‍ അറിയിച്ചു. പ്രതികളെ എല്ലാവരെയും തിരിച്ചറിഞ്ഞു കഴിഞ്ഞുവെന്നും താമസിയാതെ എല്ലാവരെയും പിടികൂടുമെന്നും അവര്‍ പറഞ്ഞു.

മെയ് 18-നാണ് ജിങ്കെയുടെ ഭര്‍ത്താവിന്റെ പരാതി പൊലീസിന് ലഭിച്ചത്. ജിങ്കെയുടെ ഭര്‍ത്താവായ ഹാന്‍ യാങ് ലിമ്മിന്, ചൈനീസ് കൊറിയന്‍ മാതാപിതാക്കളാണ് ഉള്ളതെങ്കിലും ടാന്‍സാനിയന്‍ പൗരത്വമാണുള്ളത് . ഹാന്‍ 10 ദശലക്ഷം തായ്‌ലന്‍ഡ് ബത് അവര്‍ക്ക് നല്‍കി കഴിഞ്ഞെന്നും എന്നാല്‍ വീണ്ടും 5 ദശലക്ഷം കൂടി ചോദിച്ചുവെന്നുമാണ് പോലീസിനെ അറിയിച്ചത്.

എയര്‍പോട്ടിലെ സി സി ടി വി ദൃശ്യങ്ങളില്‍ നിന്നും പ്രതികളെ തിരിച്ചറിഞ്ഞിട്ടുണ്ടെന്നും അവര്‍ ബാങ്കോക്, പട്ടായ, റയോങ് എന്നിവിടങ്ങളിലുള്ള ഹോട്ടലുകളിലേക്കാണ് പോയതെന്ന് മനസ്സിലായതായി പോലീസുകാര്‍ പറഞ്ഞു. പിന്നീട് മെയ് 19 ന് അവര്‍ ബാങ്കോക്കില്‍ തിരിച്ചെത്തി ജിന്‍ക്യായിയെ രാത്രി 11 മണിയോടെ വഴിവക്കില്‍ ഉപേക്ഷിച്ചതിന് ശേഷം രാജ്യത്തിന് പുറത്തേക്കുള്ള വിമാനം കയറുകയായിരുന്നു.

ലോകത്തെ ഏറ്റവും തിരക്കുള്ള എയര്‍പോര്‍ട്ടുകളില്‍ 20-ാം സ്ഥാനമാണ് സുവര്‍ണഭൂമി എയര്‍പോര്‍ട്ടിനുള്ളത്. എന്നാല്‍ അവിടത്തെ സുരക്ഷാ വീഴ്ചകള്‍ അടിക്കടി വാര്‍ത്തയാകാറുണ്ട്.