ഭിക്ഷാടകനായി ജീവിക്കേണ്ടി വന്നത് രണ്ടു വര്ഷം! ഒടുവില് ശാപമോക്ഷം പോലെ പഴയ ജീവിതം തിരികെ കിട്ടി! തിരുപ്പതി ക്ഷേത്രദര്ശനത്തിനിടെ കൂട്ടംതെറ്റിയ മലയാളിയുടെ കഥ
2016-ലെ ദീപാവലി ദിനത്തിലാണ് വരാപ്പുഴ തുണ്ടത്തുംകടവ് തുണ്ടിപറമ്പില് കൃഷ്ണന്റെ മകന് ടി.കെ. ബാലന് കുടുംബവുമായി തിരുപ്പതിയില് പോയത്. ബാലന്റെ മകള് അശ്വതിയുടെ കുട്ടി ഗൗരി നന്ദനയുടെ മുടിവെട്ടിക്കലിനായാണ് കുടുംബമൊത്ത് തിരുപ്പതിയില് എത്തിയത്. അവിടെ ചെന്നപ്പോള് തന്നെ 56-കാരനായ ബാലന് സമനില തെറ്റിയതായി അനുഭവപ്പെട്ടു. ക്ഷേത്രദര്ശനത്തിനുശേഷം വഴി തെറ്റുകയായിരുന്നു.
30 കിലോമീറ്റര് ദൂരം കുടുംബത്തെ അന്വേഷിച്ചു അലഞ്ഞു നടന്നു. ഒടുവില് ഭക്ഷണം കഴിക്കാന് പോലും പണമില്ലാതെ ഭിക്ഷയാചിച്ചു ജീവിതം തള്ളി നീക്കി. മലയാളം മാത്രം അറിയുന്ന ബാലന് മറ്റൊരു മലയാളിയെ തേടി അലഞ്ഞുവെങ്കിലും കണ്ടെത്തിയില്ല. ഒടുവില് കോവിലിനു സമീപം കഴിഞ്ഞുകൂടി. തിരുപ്പതിയില് കുടുംബം ഭക്ഷണം കഴിക്കാന് ഇരുന്ന സ്ഥലത്തുനിന്നാണു ബാലനെ കാണാതായത്. രണ്ടു ദിവസം അവിടെ തങ്ങി കുടുംബം അന്വേഷണം നടത്തിയിരുന്നു. ഇടയ്ക്ക് വീട്ടുകാര് തിരുപ്പതിയില് എത്തിയും ബാലനെ അന്വേഷിച്ചുവെങ്കിലും കണ്ടെത്തിയില്ല. ബാലനെ കാണാനില്ലെന്ന് കാണിച്ച് വീട്ടുകാര് അവിടെ പോലീസില് പരാതി നല്കിയിരുന്നു. ഫോട്ടോ വച്ച പോസ്റ്റര് അടിച്ച് തിരുപ്പതിയില് പ്രചരണം നടത്തുകയും ചെയ്തിരുന്നു. എന്നിട്ടും കണ്ടെത്തുവാന് കഴിഞ്ഞിരുന്നില്ല.
എന്നാല് കഴിഞ്ഞ ദിവസം വരാപ്പുഴയില്നിന്നും തിരുപ്പതിക്കുപോയ സംഘത്തിലെ ചിറയ്ക്കകം സ്വദേശി രാജേഷ് എന്നയാള് നാടോടി കൂട്ടത്തിനൊപ്പം കഴിഞ്ഞിരുന്ന ബാലനെ തിരിച്ചറിയുകയായിരുന്നു. തിരുപ്പതി ബാലാജി ക്ഷേത്രത്തില്നിന്നും കിലോമീറ്റര് ദൂരെയുള്ള ഒറ്റപ്പെട്ട സ്ഥലത്തെ അഗസ്തീശ്വരക്ഷേത്രത്തില് നിന്നാണു അയാളെ കണ്ടെത്തിയത്. നാടോടികള്ക്കിടയില് മലയാളം പറയുന്നയാളെ കണ്ടു രാജേഷിനു സംശയം തോന്നി ബാലന്റെ ഫോട്ടോ മൊബൈലില് എടുത്തുകൊണ്ടുവന്നു വരാപ്പുഴയില് പലരെയും കാണിച്ചുവെങ്കിലും പിടികിട്ടിയില്ല. ഒടുവില് വരാപ്പുഴ പഞ്ചായത്തിനു സമീപമുള്ള ദുര്ഗ കുടുംബശ്രീ ഹോട്ടലിലെ സ്ത്രീ അവരുടെ മരുമകളുടെ പിതാവായ ബാലനെ തിരിച്ചറിയുകയായിരുന്നു.
ആ സ്ത്രീയുടെ മകളുടെ ഭര്ത്താവുമായി രാജേഷ് പോയി ബാലനെ തിരുപ്പതിയില്നിന്നു കൊണ്ടുവരികയായിരുന്നു. മത്സ്യ തൊഴിലാളിയായ ബാലന് സമീപപ്രദേശങ്ങളില്നിന്നും മത്സ്യബന്ധനം നടത്തിയാണു ഉപജീവനം നടത്തിയിരുന്നത്. ഇന്നലെ പുലര്ച്ചെ നാലുമണിയോടെയാണു ബാലന് എത്തിയത്. വിവരമറിഞ്ഞ് വീടും പരിസരവും അയല്വാസികളെകൊണ്ട് നിറഞ്ഞു. തെലുങ്ക് കലര്ന്ന മലയാളത്തില് സംസാരിക്കുന്നതിനാല് ബാലന് പറയുന്ന കാര്യങ്ങള് പെട്ടെന്ന് ആര്ക്കും പിടികിട്ടുന്നില്ല. വീട്ടില് തിരിച്ചെത്തുവാന് കഴിഞ്ഞതില് സന്തോഷമുണ്ടെന്നു ബാലന് പറഞ്ഞു. ബാലന്റെ ഭാര്യ സുമതി. മക്കള്: അശ്വതി, ആരതി.
https://www.facebook.com/Malayalivartha