ന്യൂയോര്‍ക്കിലെ റോം പട്ടണത്തിലുള്ള ഡെനീസ് റസ്റ്ററന്റില്‍ ഭാര്യയോടൊപ്പം എത്തിയ ഒരു കസ്റ്റമര്‍ അവര്‍ ടോയ്‌ലെറ്റില്‍ പോയ സമയത്ത് ഓര്‍ഡര്‍ എടുക്കാനെത്തിയ വെയിട്രസ്സിന്റെ പിന്‍ഭാഗത്ത്, കൈയ്യെത്തി തട്ടുകയായിരുന്നു.

ക്ലാരന്‍സ് എച്ച് ലോക്കി എന്ന 65-കാരനും ഭാര്യയും ആ റെസ്റ്ററന്റിലെ ഒരു ബൂത്തിലേക്ക് കയറി ഇരുന്നതേ ഉണ്ടായിരുന്നുള്ളൂ. അപ്പോഴേക്കും അയാളുടെ ഭാര്യ ടോയ്‌ലറ്റ് ഉപയോഗിക്കാനായി പോയി. 23-കാരിയായ വെയിട്രസ്സ് ജയ്‌മേ അഡെയര്‍ അപ്പോഴാണ് അവരുടെ ഓര്‍ഡര്‍ എടുക്കാനായി എത്തിയത്. മെനു കസ്റ്റമറുടെ മുന്നിലേക്ക് നീക്കി വച്ചിട്ട് തിരിഞ്ഞു നടക്കാന്‍ തുടങ്ങിയപ്പോഴാണ് അയാള്‍ എത്തി വലിഞ്ഞ് അവരുടെ പിന്‍ഭാഗത്ത് തട്ടിയത്. അത് വ്യക്തമായി സി സി ടി വി യില്‍ പതിയുകയും ചെയ്തു.

അഞ്ചു വര്‍ഷമായി ആ സ്ഥാപനത്തില്‍ ജോലി ചെയ്തു വരുന്ന ജയ്‌മേ ഉടന്‍ തന്നെ വിവരം അവിടത്തെ മാനേജരോട് റിപ്പോര്‍ട്ട് ചെയ്തു. മാനേജര്‍ ഉടന്‍ തന്നെ പ്രസ്തുത കസ്റ്റമാരോട് റസ്റ്ററന്റ് വിട്ടു പോകുവാന്‍ ആവശ്യപ്പെട്ടിട്ട് പോലീസിനെ അറിയിക്കുക ആയിരുന്നു. അന്ന് തന്നെ അയാള്‍ക്കെതിരെ ബലം പ്രയോഗിച്ചുള്ള സ്പര്‍ശിക്കലിന് കേസ് രജിസ്റ്റര്‍ ചെയ്തു. ഒരു വര്‍ഷം വരെ തടവോ മൂന്നു വര്‍ഷം വരെ പ്രൊബേഷനോ (നല്ല നടപ്പ് ) ശിക്ഷയായി കിട്ടാവുന്ന വകുപ്പാണിത്.

ആ കസ്റ്റമറെ തനിക്ക് മുഖ പരിചയം ഉണ്ടായിരുന്നില്ലെന്നും പക്ഷെ വന്ന ഉടനെ അയാള്‍ തന്റെ പേര് പറഞ്ഞ് തന്നോട് ഹലോ പറഞ്ഞെന്നും ജയ്‌മേ പറഞ്ഞു.അയാള്‍ ഇടയ്ക്കിടെ ആ റസ്റ്ററന്റില്‍ വരാറുള്ള കസ്റ്റമറാണെന്ന് പിന്നീട് മറ്റു സ്റ്റാഫ് പറഞ്ഞു.

തന്റെ ഹൈസ്‌കൂള്‍ കാലം മുതല്‍ തനിക്കൊരു ബോയ്ഫ്രണ്ട് ഉണ്ടെന്നും ഇത് വരെ ജീവിതത്തില്‍ ഒരു പുരുഷനില്‍ നിന്നും ഇത്തരത്തിലുള്ള അനുഭവം ഉണ്ടായിട്ടില്ലെന്നും അത് കൊണ്ട് തന്നെ താന്‍ തണുത്തുറഞ്ഞു പോയെന്നും ജയ്‌മേ പറഞ്ഞു. തന്നോടൊപ്പം ജോലി ചെയ്യുന്ന മറ്റൊരു വെയിട്രസ് താന്‍ ഈ കാര്യത്തില്‍ എടുത്ത നിലപാടിനെ അഭിനന്ദിച്ചുവെന്നും ഇത്തരം അനുഭവങ്ങള്‍ അവള്‍ക്കും ഉണ്ടായിട്ടുണ്ടെന്നും അതൊക്കെ നിശബ്ദമായി സഹിക്കുക ആയിരുന്നു ഇതുവരെ എന്നും അവള്‍ പറഞ്ഞുവത്രേ.

റോം പോലീസ് ഡിപ്പാര്‍ട്ട്മെന്റിലെ ഡിറ്റക്റ്റീവ് ജെഫ്‌റി ലാനിഗന്‍ അപ്പോള്‍ തന്നെ റസ്റ്ററന്റില്‍ എത്തിയെന്നും പ്രതി അവിടെ തന്നെ ഉണ്ടായിരുന്നുവെന്നും കണ്ടു. സി സി ടി വി ദൃശ്യങ്ങളില്‍ നോക്കി പരാതിയില്‍ കഴമ്പുണ്ടെന്ന് ബോധ്യമായതിനാല്‍ ഉടന്‍ തന്നെ അയാളെ അറസ്റ്റ് ചെയ്‌തെന്നും അദ്ദേഹം അറിയിച്ചു. തൊഴിലിടങ്ങളില്‍ വച്ച് ഇപ്രകാരം വിവിധ തരത്തിലുള്ള പീഡനങ്ങള്‍ക്ക് വനിതാജീവനക്കാര്‍ വിധേയരാകുന്നുണ്ടെന്നും ഇപ്രകാരം ജോലി ചെയ്ത് കൊണ്ടിരിക്കവേ അവരെ അപമാനിക്കുന്ന തരത്തില്‍ അവരെ തൊടാമെന്ന ചിന്ത പുരുഷന്മാര്‍ക്ക് ഉണ്ടാകുന്നതെങ്ങനെ എന്ന് മനസ്സിലാകുന്നില്ല എന്നും ജെഫ്‌റി പറഞ്ഞു.