കാല്‍ നൂറ്റാണ്ടിനു മുമ്പുള്ള ചിത്രം പോസ്റ്റ് ചെയ്ത് 'കുത്തിപ്പൊക്കല്‍, ട്രെന്‍ഡില്‍ പങ്കുചേര്‍ന്ന് കേരള പോലീസ്
നാടോടുമ്പോള്‍ നടുവേ ഓടണമെന്നാണല്ലോ നാട്ടുമൊഴി. സെലിബ്രിറ്റികള്‍ ഉള്‍പ്പടെയുള്ളവരുടെ ഫേസ്ബുക്ക് അക്കൗണ്ടില്‍ നിന്നും പഴയ ചിത്രങ്ങള്‍ കുത്തിപ്പൊക്കി പൊങ്കാലയിടുന്ന പ്രവണത ഇപ്പോള്‍ ട്രെന്‍ഡ് ആണല്ലോ. അങ്ങനെ ഇപ്പോള്‍ മിടുക്കന്മാരും മിടുക്കികളുമായിരിക്കുന്നവരുടെ പഴയ കാലത്തെ കോലം കണ്ട് ചിരിച്ചു മറിയുകയാണ് സോഷ്യല്‍മീഡിയ.
ഈ ബഹളത്തിനിടയില്‍ ഇരുപത്തിയഞ്ച് വര്‍ഷം മുമ്പ് തിരുവനന്തപുരം യൂണിവേഴ്‌സിറ്റി കോളജിലെവിദ്യാര്‍ഥി സമരത്തിനിടെയുള്ള ഒരു ചിത്രം പങ്കുവെച്ച് കേരള പോലീസും ഈ ട്രെന്‍ഡിന്റെ ഭാഗമാകുകയാണ്. സമരത്തിനിടെ കല്ലേറില്‍ തലയ്ക്ക് പരിക്കേറ്റ ഒരു പോലീസുദ്യോഗസ്ഥന്‍ സമീപമുള്ള മൈല്‍ കുറ്റിയുടെ മറവില്‍ ഒളിച്ചിരിക്കുന്ന ചിത്രമാണിത്.
കേരള പോലീസിന്റെ ഫേസ്ബുക്ക് പോസ്റ്റിന്റെ പൂര്‍ണരൂപം
ഇരുപത്തഞ്ച് കൊല്ലം മുമ്പ് നടന്ന സംഭവമാണ്. തിരുവനന്തപുരം യൂണിവേഴ്‌സിറ്റി കോളേജില്‍ നടന്ന വിദ്യാര്‍ത്ഥി സമരത്തിനിടെ തലയ്ക്കു പരുക്കേറ്റ പോലീസുദ്യോഗസ്ഥന്‍ കല്ലേറില്‍ നിന്നും രക്ഷപ്പെടാനായി മൈല്‍കുറ്റിയുടെ മറവില്‍ ഒളിക്കുന്നു...
ട്രാഫിക് പോലീസ് സ്‌റ്റേഷനില്‍ എസ്.ഐ. ആയിരുന്ന ശ്രീ.എസ്.സുരേഷ്‌കുമാര്‍ അന്ന് കന്റോണ്‍മെന്റ് പോലീസ് സ്‌റ്റേഷനില്‍ താല്‍ക്കാലികമായി ഡ്യൂട്ടിക്ക് എത്തിയതായിരുന്നു. അദ്ദേഹം 2017-ല്‍ ക്രൈം ബ്രാഞ്ച് എസ്.പി. ആയി സര്‍വീസില്‍ നിന്നും വിരമിച്ചു.
അക്കാലത്ത് ഏറെ ശ്രദ്ധിക്കപ്പെട്ടതും ചര്‍ച്ച ചെയ്യപ്പെട്ടതുമായ ഈ ചിത്രം പകര്‍ത്തിയത് മാതൃഭൂമിയിലെ ഫോട്ടോഗ്രാഫര്‍ ആയിരുന്ന ശ്രീ.രാജന്‍ പൊതുവാള്‍ ആണ്.
https://www.facebook.com/Malayalivartha
