വംശനാശം സംഭവിച്ചുവെന്ന് കരുതിയിരുന്ന അപൂര്വ്വയിനം പെണ്ചിലന്തിയെ 150 വര്ഷത്തിനുശേഷം കണ്ടെത്തി
അപൂര്വ്വയിനം ചിലന്തിയുടെ പെണ്ചിലന്തിയെ കണ്ടെത്തി. 150 വര്ഷങ്ങള്ക്കു മുമ്പ് 1868-ല് ജര്മനിയിലെ ബെര്ലിന് സുവോളജിക്കല് മ്യൂസിയത്തിലെ ചിലന്തി ഗവേഷകനായ ഡോ. ഫെര്ഡിനാന്റ് ആന്റണ് ഫ്രാന്സ്കാര്ഷ് ഗുജറാത്തിലെ പരിയെജ് വന്യജീവി സങ്കേതത്തില് കണ്ടെത്തിയ ആണ്ചിലന്തിയുടെ പെണ്ചിലന്തിയെയാണ് ഇരിങ്ങാലക്കുട ക്രൈസ്റ്റ് കോളജിലെ ജൈവവൈവിധ്യ ഗവേഷണ കേന്ദ്രത്തിന്റെ നേതൃത്വത്തില് വയനാട് വന്യജീവി സങ്കേതത്തില് നിന്ന് കണ്ടെത്തിയത്. ഇവ വംശമറ്റുപോയെന്നാണ് കരുതിയിരുന്നത്.
ചാടുന്നചിലന്തി (ജംപിംഗ് സ്പൈഡര്) കുടുംബത്തില് വരുന്ന ഇതിന്റെ ശാസ്ത്രനാമം ക്രൈസിലവോളുപസ് എന്നാണ്. പെണ്ചിലന്തിയുടെ തലയുടെ മുകള്ഭാഗം നീലനിറത്തിലുള്ള ശല്കങ്ങള് കൊണ്ട് പൊതിഞ്ഞിരിക്കുന്നു. പാര്ശ്വങ്ങളിലായി ഓറഞ്ചു നിറത്തിലുള്ള രോമങ്ങളുമുണ്ട്. ഇതിന്റെ അടിഭാഗത്തായി വെളുത്ത നിറത്തിലുള്ള വരകള് കാണാം. ഉദരത്തിന്റെ മുകള്ഭാഗം കറുപ്പും തിളങ്ങുന്ന നീലയും ഇടകലര്ന്നതാണ്. മഞ്ഞനിറത്തിലുള്ള കാലുകളില് ഇടവിട്ട കറുത്ത വളയങ്ങളുണ്ട്. കറുത്ത നിറത്തിലുള്ള എട്ടു കണ്ണുകള് തലയുടെ മുന്നിലായും വശങ്ങളിലായുമാണ് കാണുന്നത്. കണ്ണുകള്ക്ക് ചുറ്റും മുകളിലായി ചുവന്ന നിറത്തിലുള്ള കണ്പീലികളും താഴെയായി വെളുത്ത കണ്പീലികളും കാണാം.
പെണ്ചിലന്തിയെ അപേക്ഷിച്ച് ആണ്ചിലന്തിയുടെ ശരീരം മെലിഞ്ഞതാണ്. ഓറഞ്ചു നിറത്തിലുള്ള തലയുടെ മുകള്ഭാഗത്തായി നീലനിറത്തിലുള്ള രണ്ടു വരകളുണ്ട്. ഉദരഭാഗം ഓറഞ്ചും നീലയും ഇടകലര്ന്നതാണ്. കാലുകള് തിളങ്ങുന്ന നീല നിറത്തിലുള്ളതാണ്. കുറ്റിചെടികളുടെ ഇലകള് ചേര്ത്തുവെച്ചാണ് ഇവ കൂടുണ്ടാക്കുന്നത്. സാധാരണയായി പെണ്ചിലന്തി അഞ്ചോ ആറോ മുട്ടകളിടുന്നു.
ജൈവവൈവിധ്യ ഗവേഷണകേന്ദ്രം മേധാവി ഡോ. എ.വി. സുധികുമാറിന്റെ നേതൃത്വത്തില് ദേശീയ ശാസ്ത്ര സാങ്കേതിക വകുപ്പിന്റെ സാമ്പത്തിക സഹായത്തോടെ കഴിഞ്ഞ എട്ടുവര്ഷമായി നടത്തികൊണ്ടിരിക്കുന്ന സംയുക്ത പഠനത്തില് കൊല്ക്കത്ത സുവോളജിക്കല് സര്വേ ഓഫ് ഇന്ത്യയിലെ ഗവേഷകനായ ഡോ. ജോണ് കലേബ്, ബാംഗ്ലൂര് നാഷണല് സെന്റര് ഫോര് ബയോളജിക്കല് സയന്സിലെ ഗവേഷകരായ രാജേഷ് സനപ്, കൗശല് പട്ടേല്, ക്രൈസ്റ്റ് കോളജിലെ ചിലന്തി ഗവേഷണ വിദ്യാര്ത്ഥികളായ പി.പി. സുധിന്, കെ.എസ്. നഫിന് എന്നിവര് പങ്കാളികളായി.
ഈ കണ്ടുപിടിത്തം റഷ്യയില് നിന്നു പ്രസിദ്ധീകരിക്കുന്ന 'ആര്ത്രോപോഡസെലക്റ്റ' എന്ന അന്തര്ദേശീയ ശാസ്ത്ര മാസികയുടെ പുതിയ ലക്കത്തില് പ്രസിദ്ധീകരിച്ചിട്ടുണ്ട്.
https://www.facebook.com/Malayalivartha