ഒഡീഷ്യയിലും ഉണ്ട് ഒരു മാഞ്ചി; മലതുരന്ന് കനാല് നിര്മ്മിച്ച് ഗ്രാമത്തിലെ വരള്ച്ച മാറ്റിയ ദൈതരി നായിക്
ഭാര്യയ്ക്ക് ആവശ്യമായ ചികില്സ ലഭ്യമാക്കാന് പറ്റുന്നിടത്തേക്ക് എത്തിക്കാന് സൗകര്യമായ റോഡ് ഇല്ലാതിരുന്നതിനാല് ഭാര്യ നഷ്ടപ്പെട്ടതു മുതല് ഗ്രാമത്തിലെ മല ഒറ്റയ്ക്ക് തുരന്ന് 22 വര്ഷം കൊണ്ട് റോഡ് ഉണ്ടാക്കി എടുത്ത മാഞ്ചിയുടെ വീരകഥകള് കേട്ടിട്ടുള്ളവരാണ് ഏറെക്കുറെ എല്ലാവരും. എന്നാല് രാജ്യത്തിന്റെ തന്നെ മറ്റൊരു കോണില് വേറെയൊരു മാഞ്ചിയുണ്ട്.
70-കാരനായ ദൈതരി നായിക് എന്ന ഒഡീഷ്യന് ആദിവാസി വൃദ്ധനാണ് മാഞ്ചി എന്ന വിളിപ്പേരിന് അര്ഹനായത്. ഗ്രാമത്തിലെ ജലദൗര്ലഭ്യം രൂക്ഷമായ സമയത്ത്, ഒഡീഷയിലെ കിയോന്ജര് ജില്ലയിലെ ഗൊനാസിക്ക മല തുരന്ന് തലബൈതരണി എന്ന ഗ്രാമത്തില് വെള്ളം എത്തിക്കാനായിരുന്നു ദൈതരി നായികിന്റെ തീരുമാനം.
പദ്ധതി കേട്ടതോടെ നാട്ടുകാര് അടക്കമുള്ളവര് ഇദ്ദേഹത്തെ പരിഹസിച്ചുവിട്ടു. എന്നാലും തീരുമാനത്തില് നിന്നും പിന്മാറുന്നതിന് ദൈതരി തയ്യാറായില്ല. മൂന്നു വര്ഷം കൊണ്ട് മൂന്നു കിലോമീറ്റര് ദൂരത്തില് മല തുരന്ന് സ്വന്തം ഗ്രാമത്തില് വെള്ളമെത്തിച്ചതോടെ ഗ്രാമത്തിലെ ഹീറോ ആയി മാറിയിരിക്കുകയാണ് ഈ മുത്തശ്ശന്.
ദിവസവും ഈ ജോലി ആത്മാര്ത്ഥമായി തുടര്ന്നതോടെ ഇദ്ദേഹത്തിന്റെ നാല് സഹോദരന്മാരും ദൈതരിക്കൊപ്പം ചേര്ന്നു. പിന്നീട് മൂന്ന് വര്ഷത്തെ കഠിന പ്രയനത്തിന് ഒടുവില് 2013-ല് കനാല് ഗ്രാമത്തിനടുത്തെത്തിയപ്പോഴാണ് നാട്ടുകാര് അത്ഭുതപ്പെട്ടത്.
പരിഹസിച്ച എല്ലാവരും പിന്നീട് ദൈതരിയുടെ ദൗത്യം ഏറ്റെടുക്കുന്ന കാഴ്ചയാണ് കണ്ടത്. ഈ മുത്തശ്ശന്റെ പ്രവര്ത്തിയോടെ ഗ്രാമത്തിലെ ജല ദൗര്ലഭ്യം പൂര്ണമായും മാറുകയും ചെയ്തു.
https://www.facebook.com/Malayalivartha