ട്വന്റി 20 ക്രിക്കറ്റിന്റെ ആവേശത്തിന് തിരികൊളുത്തി ഐപിഎല് പത്താം സീസണിന് ഇന്ന് തുടക്കം
ബോളിവുഡ് താരങ്ങള് അണിനിരക്കുന്ന വര്ണാഭമായ ചടങ്ങോടെ ഹൈദരാബാദിലാണ് ഉദ്ഘാടനം. 47 ദിവസം നീണ്ടു നില്ക്കുന്ന ടൂര്ണമെന്റിന്റെ ഫൈനല് മെയ് 21ന് ആണ്. 2008ല് ഈഡന് ഗാര്ഡന്സില് ബ്രണ്ടന് മക്കല്ലം തിരികൊളുത്തിയ കുട്ടിക്രിക്കറ്റിന്റെ ആവേശപ്പോരിന് ഇത് ദശാവതാരം. ക്രിക്കറ്റിന്റെ ആവേശത്തിന് ട്വന്റി20 എന്ന് പേര് ചാര്ത്തിയ ഐപിഎല്ലിന്റെ പത്താം സീസണിന് ഹൈദരാബാദ് രാജീവ് ഗാന്ധി സ്റ്റേഡിയത്തില് ഇന്ന് ഉദ്ഘാടനം.
ആഘോഷരാവില് കഴിഞ്ഞ വര്ഷത്തെ ഫൈനലിസ്റ്റുകള് സണ്റൈസേഴ്സ് ഹൈദരാബാദും റോയല് ചലഞ്ചേഴ്സ് ബാംഗ്ലൂരും പോരാട്ടത്തിന് തുടക്കം കുറിക്കും. പത്താം സീസണിനെ വരവേല്ക്കാന് എട്ടു മല്സരവേദികളിലും ബോളിവുഡ് താരങ്ങള് അണിനിരക്കുന്ന കലാവിരുന്നുണ്ടാകും. താരമൂല്യത്തില് പത്താം സീസണിലെ കേമന് ഇംഗ്ലീഷ് ഓള്റൗണ്ടര് െബന് സ്റ്റോക്സ് ആണ്. വെടിക്കെട്ട് ബാറ്റ്സ്മാന്മാരെക്കാള് പേസ് ബോളര്മാരെയാണ് ടീമുകള് ഇക്കുറി സ്വന്തമാക്കിയത്.
ടീമിന് പ്രചോദനമാകാന് കഴിയില്ലെന്ന കാരണം കണ്ടെത്തി ധോണിയെ ഒഴിവാക്കി സ്റ്റീവ് സ്മിത്തിനെ നായകനാക്കിയ പുണെ സൂപ്പര് ജയന്റ് നടപടിയില് ഇന്ത്യന് ആരാധകരൊന്നാകെ പ്രതിഷേധത്തിലാണ്. കോഹ്ലി, രാഹുല്, അശ്വിന്, ഡികോക്ക്, ഡുമിനി, മുരളി വിജയ്, ജഡേജ തുടങ്ങി പരുക്ക് വില്ലനായ ഗ്ലാമര് താരങ്ങള് സീസണിന്റെ പകിട്ട് കുറയ്ക്കുമോയെന്ന ആശങ്കകളില്ലാതില്ല.
കളിയാവേശത്തിനപ്പുറം ക്രിക്കറ്റിനെ വില്പനച്ചരക്കാക്കിയെന്ന വിമര്ശനം ഇത്തവണയും പ്രതീക്ഷിക്കാം. ഒത്തുകളിയും അഴിമതിയും വിജയാഘോഷവും എല്ലാം ചേര്ന്ന ഐപിഎല്ലിന്റെ മുഖം പത്താം സീസണിനൊടുവില് പൊളിച്ചെഴുതപ്പെടും. എല്ലാറ്റിനുമപ്പുറം ക്രിക്കറ്റ് ജീവവായുവായ ജനതയ്ക്ക് വേറിട്ടൊരു ചിന്തയില്ലാതെ ഇനി ആഘോഷത്തിന്റെ രണ്ടുമാസക്കാലം.
https://www.facebook.com/Malayalivartha