തലസ്ഥാനത്ത് നടന്ന പ്രഥമ ട്വന്റി 20 ക്രിക്കറ്റ് മത്സരത്തിത്തിലെ സുരക്ഷാ വിജയം കേരള പോലീസിന് ഒരു പൊന്‍തുവല്‍ കൂടിയായി. മഴയിലും കാണികളുടെ ആവേശം അണക്കാതെ സുരക്ഷ ഒരുക്കിയ കേരള പോലീസിന്റെ സുരക്ഷാ സേവനത്തിന് ബി.സിസി അധികൃതര്‍ സംതൃപ്തി അറിയിച്ചു. തുടര്‍ന്ന് മത്സരത്തിന് സുരക്ഷ ഒരുക്കിയ മുഴുവന്‍ പോലീസുകാര്‍ക്കും പോലീസ് ചീഫ് ലോക് നാഥ് ബഹ്‌റ അഭിനന്ദനം അറിയിച്ച കത്ത് നല്‍കി.

തിരുവനന്തപുരം മേഖല ഐ.ജി മനോജ് എബ്രഹാമിന്റെ നേതൃത്വത്തിലാണ് പഴുതടച്ച സുരക്ഷ ഒരുക്കിയത്. മഴ കാരണം കാണികളുടെ ആവേശം തടയാന്‍ ശ്രമിക്കരുതെന്ന് ഐ.ജി ആദ്യമേ നിര്‍ദേശം നല്‍കിയിരുന്നു. കാണികളുടെ ആവേശം കുറക്കാതെ മഴ കാരണമായുള്ള അസൗകര്യങ്ങളും നിയന്ത്രിക്കുക എന്നത് പോലീസിന് മുന്നിലെ വെല്ലുവിളി ആയിരുന്നുവെന്നും ഐ.ജി പറഞ്ഞു.

തിരക്ക് നിയന്ത്രിക്കുന്നതോടൊപ്പം ഗതാഗത നിയന്ത്രണത്തിലും പോലീസ് സാമര്‍ത്ഥ്യം കാട്ടി. വാഹന പാര്‍ക്കിങ്ങിന് കൂടുതല്‍ സ്ഥലം നേരത്തെകണ്ടെത്തിയിരുന്നു. ടൂ വീലര്‍ വാഹനങ്ങളെയാണ് കൂടുതല്‍ പ്രതീക്ഷിച്ചിരുന്നത്. മഴ കാരണം കൂടുതല്‍ പേര്‍ കാറുകളില്‍ എത്തിയപ്പോള്‍ പാര്‍ക്കിങ്ങിനെ ബാധിച്ചെങ്കിലും പോലീസ് പെട്ടെന്ന് തന്നെ പാര്‍ക്കിംഗ് സംവിധാനം മാറ്റി കൂടുതല്‍ പേര്‍ക്ക് സൗകര്യം ഒരുക്കി. 

കോവളം ഹോട്ടലു മുതല്‍ സ്‌റ്റേഡിയം വരെയും, സ്‌റ്റേഡിയത്തിലെ സുരക്ഷയും പോലീസിന്റ കീഴിലായിരുന്നു. ഇതിനായി ഐ.ജിക്ക് കീഴില്‍ 7 എസ്.പിമാര്‍, 28 ഡിവൈഎസ്.പിമാര്‍, 46 സി.ഐ, 380 എസ് . ഐ ഉള്‍പ്പെടെ 2500 പോലീസുകാരാണ് സുരക്ഷക്കെത്തിയത്‌