സണ്റൈസേഴ്സിനെ തകര്ത്തെറിഞ്ഞ് സൂപ്പര് കിംഗ്സ്
അന്പാട്ടി റായിഡു സെഞ്ചുറിയുമായി മുന്നില്നിന്നു നയിച്ച മത്സരത്തില് ഐപിഎല് ഒന്നാം സ്ഥാനക്കാരായ സണ്റൈസേഴ്സ് ഹൈദരാബാദിനെതിരേ ചെന്നൈ സൂപ്പര് കിംഗ്സിന് എട്ടു വിക്കറ്റ് വിജയം. സണ്റൈസേഴ്സ് ഉയര്ത്തിയ 180 റണ്സ് ലക്ഷ്യം പിന്തുടര്ന്ന ചെന്നൈ ഒരോവര് ബാക്കിനില്ക്കെ ലക്ഷ്യംകണ്ടു. 62 പന്തില് ഏഴു വീതം ബൗണ്ടറികളുടെയും സിക്സറുകളുടെയും അകന്പടിയോടെയായിരുന്നു റായിഡു(100*)വിന്റെ സെഞ്ചുറി. 14 പന്തില് 20 റണ്സുമായി നായകന് എം.എസ്.ധോണി പുറത്താകാതെനിന്നു.
സ്കോര്: സണ്റൈസേഴ്സ് ഹൈദരാബാദ്: 179/4(20), ചെന്നൈ സൂപ്പര് കിംഗ്സ്: 180/2(19).
ടോസ് നേടിയ ചെന്നൈ നായകന് ധോണി ബാറ്റിംഗിന് അയച്ച സണ്റൈസേഴ്സ്, ഓപ്പണര് ശിഖര് ധവാന് (49 പന്തില് 79), നായകന് കെയ്ന് വില്ല്യംസണ് (39 പന്തില് 51) എന്നിവരുടെ ബാറ്റിംഗ് മികവിലാണ് ഭേദപ്പെട്ട സ്കോര് സ്വന്തമാക്കിയത്. സ്കോര് 18-ല് ആദ്യ വിക്കറ്റ് നഷ്ടമായ സണ്റൈസേഴ്സിനെ രണ്ടാം വിക്കറ്റില് 123 റണ്സ് കൂട്ടിച്ചേര്ത്താണ് ഇരുവരും ചേര്ന്ന് സുരക്ഷിത നിലയിലേക്ക് എത്തിച്ചത്.
ധവാനും വില്ല്യംസണും അടുത്തടുത്ത പന്തുകളില് പുറത്തായതോടെ ടീമിന്റെ സ്കോറിംഗ് റേറ്റ് കുറഞ്ഞു. അവസാന ഓവറുകളില് ദീപക് ഹൂഡ(11 പന്തില് 21) നടത്തിയ വന്പനടികള് ഹൈദരാബാദിനെ 179-ല് എത്തിച്ചു. ചെന്നൈയ്ക്കായി ശര്ദുള് താക്കുര് രണ്ടും ദീപക് ചഹര്, ഡ്വെയ്ന് ബ്രാവോ എന്നിവര് ഓരോ വിക്കറ്റും നേടി
മറുപടി പറഞ്ഞ ചെന്നൈ ഒരിക്കല്പ്പോലും പതറിയില്ല. ഓപ്പണര്മാരായ ഷെയ്ന് വാട്സണും റായിഡുവും തകര്ത്തടിച്ചപ്പോള് ചെന്നൈ സ്കോര് കുതിച്ചുയര്ന്നു. സ്കോര് 134-ല് മാത്രമാണ് സണ്റൈസേഴ്സിന് വാട്സണ്-റായിഡു കൂട്ടുകെട്ട് പൊളിക്കാന് കഴിഞ്ഞത്. വാട്സണ് 35 പന്തില് 57 റണ്സ് നേടി റണ്ണൗട്ടായി. സുരേഷ് റെയ്ന(2) വന്നപോലെ മടങ്ങിയെങ്കിലും നായകന് ധോണിയെ കൂട്ടുപിടിച്ച് റാഡിയു ചെന്നൈയെ വിജയത്തിലേക്കു നയിക്കുകയായിരുന്നു.
https://www.facebook.com/Malayalivartha