യുവേഫ ചാമ്പ്യന്സ് ലീഗ്; ക്വാര്ട്ടര് ഫൈനല് പോരാട്ടങ്ങള്ക്ക് ഇന്ന് തുടക്കം
യുവേഫ ചാമ്പ്യന്സ് ലീഗ് ഫുട്ബോളിലെ 2016-17 സീസണ് ക്വാര്ട്ടര് ഫൈനല് മത്സരങ്ങള് ഇന്നും നാളെയുമായി നടക്കും. ട്യൂറിനില് നടക്കുന്ന ആദ്യപാദത്തില് ബാര്സിലോണ ആതിഥേയരായ ജുവന്റസിനെ നേരിടും. ബൊറൂസ്സിയ ഡോര്ട്ട്മുണ്ടും മൊണാക്കോയും തമ്മിലാണ് മറ്റൊരു മത്സരം.
ജുവന്റസും ബാര്സിലോണയും തമ്മിലുള്ള പോരാട്ടം തന്നെയായിരിക്കും കടുപ്പമേറിയത്. മികച്ച ഫോമില് മുന്നേറുന്ന ജുവന്റസിനെ അവരുടെ തട്ടകത്തില് വെച്ച് നേരിടുമ്പോള് മെസ്സിക്കും കൂട്ടര്ക്കും നന്നേ അധ്വാനിക്കേണ്ടി വരും. മികച്ച ആക്രമണവും മികച്ച പ്രതിരോധവും തമ്മിലായിരിക്കും പോരാട്ടം. മെസ്സി,സുവാരസ്,നെയ്മര് അക്രമണനിരയെ തടുക്കാന് ജുവന്റസ് കരുതി വെച്ചിരിക്കുന്നത് ഗോള് കീപ്പര് ബഫണ്,ഡിഫന്ഡര് ചെല്ലിനി,ബൊനൂച്ചി ത്രയമാണ്.
സ്പാനിഷ് ലീഗില് കഴിഞ്ഞ കളി മലാഗയോട് തോറ്റാണ് ബാഴ്സയുടെ വരവ്. മറുവശത്ത് ജുവന്റസാകട്ടെ സീരി എ കിരീടം ഏകദേശം ഉറപ്പിച്ച മട്ടിലാണ്. കഴിഞ്ഞ 21 മത്സരങ്ങളായി തങ്ങളുടെ ഹോമില് ജുവന്റസ് പരാജയമറിഞ്ഞിട്ടില്ല. 2015-ലെ ഫൈനലില് 3-1 ന് പരാജയപ്പെട്ടതിന്റെ കണക്കുകൂടി തീര്ക്കാനുണ്ട് ജുവന്റസിന്.
ജര്മ്മനിയിലെ ശക്തരായ ബൊറൂസിയ ഡോര്ട്ട്മുണ്ടിനെ അവരുടെ സ്റ്റേഡിയത്തില് ഫ്രഞ്ച് ക്ലബ്ബ് എ.എസ് മൊണാക്കോ നേരിടും. ഈ മത്സരത്തിന്റെ ഫലവും പ്രവചനാതീതമാണ്. യൂറോപ്പില് ഏറ്റവും കൂടുതല് ഗോളുകള് അടിച്ചു കൂട്ടിയ ടീമാണ് മൊണാക്കോ. മാഞ്ചസ്റ്റര് സിറ്റിയോട് ആദ്യപാദത്തില് 5-3 തോല്വി ഏറ്റുവാങ്ങിയെങ്കിലും രണ്ടാം പാദത്തില് 3 ഗോള് തിരിച്ചടിച്ചാണ് അവര് ക്വാര്ട്ടര് ഫൈനല് പ്രവേശനം നേടിയത്.
റിയല് മാഡ്രിഡ് ഉള്പ്പെട്ട ഗ്രൂപ്പില് ചാമ്പ്യന്മാരായാണ് ഡോര്ട്ട്മുണ്ട് ക്വാര്ട്ടര് ഫൈനല് പ്രവേശനം നേടിയത്. രണ്ടു മത്സരങ്ങളും ഇന്ത്യന് സമയം അര്ദ്ധരാത്രി 12:15-ന് ടെന് സ്പോര്ട്സില് തത്സമയം കാണാം.
https://www.facebook.com/Malayalivartha