ഐ എസ് എല്ലിന്റെ അടുത്ത സീസണില്‍ ടീമിലെ രണ്ട് താരങ്ങളെ മാത്രമേ നിലനിര്‍ത്തൂ എന്ന് കേരള ബ്ലാസ്‌റ്റേഴ്‌സ്. സി.കെ വിനീതും കോച്ചായി സ്റ്റീവ് കോപ്പലും ടീമിലുണ്ടാകുമോ എന്നകാര്യത്തില്‍ ഉറപ്പ് നല്‍കാനാവില്ലെന്ന് ബ്ലാസ്‌റ്റേഴ്‌സ് അറിയിച്ചു. ഇന്ത്യന്‍ സൂപ്പര്‍ ലീഗിലെ കഴിഞ്ഞ സീസണില്‍ പിന്നില്‍ നിന്ന് പൊരുതിക്കയറി റണ്ണറപ്പായ ടീമാണ് കേരള ബ്ലാസ്‌റ്റേഴ്‌സ്. എന്നാല്‍ ടീം ഫൈനല്‍ വരെ എത്തുന്നതില്‍ നിര്‍ണായക സ്ഥാനം വഹിച്ച പ്രമുഖ താരങ്ങളെ കേരള ബ്ലാസ്‌റ്റേഴിസിന്റെ മഞ്ഞ ജഴ്‌സിയില്‍ ഇത്തവണ കാണാനാകില്ല എന്നാണ് ഇപ്പോള്‍ കിട്ടിയിരിക്കുന്ന റിപ്പോര്‍ട്ടുകള്‍.

കഴിഞ്ഞ സീസണില്‍ കളിച്ച ഒന്നോ രണ്ടോ താരങ്ങള്‍ ഒഴിച്ച് ബാക്കിയുള്ളവരെല്ലാം പുതുമുഖതാരങ്ങളാകും. ആരോണ്‍ ഹ്യൂസ്, സന്ദേശ് ജിങ്കന്‍ എന്നിവരുടെ കാര്യത്തിലും ഉറപ്പില്ല. എല്ലാവരെയും ഡ്രാഫ്റ്റില്‍ നിന്ന് സ്വന്തമാക്കാനാണ് ടീം മാനേജ്‌മെന്റെ തീരുമാനം.

ഇന്ത്യയിലെ ഫുട്‌ബോള്‍ പ്രോത്സാഹിപ്പിക്കുന്നതിനായി സംസ്ഥാനത്തുടനീളം കേരള ബ്ലാസ്‌റ്റേഴ്‌സ് 25 ഫുട്‌ബോള്‍ സ്‌കൂളുകള്‍ തുടങ്ങും. കേരള ഫുട്‌ബോള്‍ അസോസിയേഷനുമായി സഹകരിച്ചാണ് പ്രവര്‍ത്തനം. സ്‌കൂളില്‍ 10,12,14,16 വയസ്സ് പ്രായപരിധിയിലുള്ള കുട്ടികള്‍ക്ക് പരിശീലനം നല്‍കും. ഇവരെ പ്രോത്സാഹിപ്പിക്കുന്നതിനായി ഫുട്‌ബോള്‍ ലീഗും ആരംഭിക്കും. ജില്ലകളില്‍ പരസ്പരം മത്സരിച്ച് വിജയിക്കുന്ന സ്‌കൂള്‍ ടീമുകള്‍ സംസ്ഥാന ചാമ്പ്യന്‍ഷിപ്പിനായി ഏറ്റുമുട്ടും. ഫുട്‌ബോള്‍ ലീഗില്‍ നിന്നും സ്‌കൂളില്‍ നിന്നും തെരഞ്ഞെടുക്കുന്ന പ്രതിഭകളെ വിദഗ്ധ പരിശീലനത്തിനായി പ്രത്യേക വികസന കേന്ദ്രങ്ങളിലേക്ക് അയക്കുമെന്നും ബ്ലാസ്‌റ്റേഴ്‌സ് മാനേജ്‌മെന്റ് അറിയിച്ചു.