റൊണാള്‍ഡോയ്ക്ക് മത്സരങ്ങളില്‍ വിലക്ക് ; കാരണമിതാണ്...
സ്പാനിഷ് സൂപ്പര്‍ കപ്പില്‍ ചിരവൈരികളായ ബാഴ്‍സലോണക്കെതിരെ സംഭവബഹുലമായ വിജയം റയല്‍ മാഡ്രിഡ് പിടിച്ചടക്കുമ്പോള്‍ കളിയിലെ നായകനും വില്ലനുമായിരുന്നു ക്രിസ്റ്റ്യാനോ റൊണാള്‍ഡോ. ഒന്നിനെതിരെ മൂന്നു ഗോളുകള്‍ക്കാണ് റയല്‍ ബാഴ്‍സയെ പിടിച്ചുകെട്ടിയത്. കളിയില്‍ റയല്‍ സൂപ്പര്‍ താരം റൊണാള്‍ഡോയ്ക്ക് ചുവപ്പ് കാര്‍ഡും ലഭിച്ചു.
ബാഴ്സ ആരാധകര്‍ക്ക് മുമ്പില്‍ മെസിയെ ട്രോളിയതിനായിരുന്നു റോണോക്ക് ആദ്യ മഞ്ഞ കാര്‍ഡ്. ബാഴ്സ ബോക്സിലേക്ക് വീണത് അഭിനയമാണെന്ന് ചൂണ്ടിക്കാട്ടിയായിരുന്നു രണ്ടാം മഞ്ഞ കാര്‍ഡും പിന്നാലെ ചുവപ്പ് കാര്‍ഡും ലഭിച്ചത്. ഒരു മത്സരത്തില്‍ തന്നെ നേരിട്ട് ചുവപ്പ് കാര്‍ഡ് കിട്ടയതു കൊണ്ട് സ്പാനിഷ് ലീഗ് നിയമപ്രകാരം അടുത്ത ലാ ലിഗ മത്സരം മാത്രമാണ് താരത്തിന് നഷ്ടമാകുക. എന്നാല്‍ റൊണാള്‍ഡോയ്ക്ക് നാലു മുതല്‍ 12 മത്സരങ്ങള്‍ വരെ വിലക്ക് ലഭിച്ചേക്കുമെന്നാണ് സൂചനകള്‍. ചുവപ്പ് കാര്‍ഡ് കണ്ടതില്‍ ക്രുദ്ധനായ റൊണാള്‍ഡോ റഫറിയെ പിടിച്ച് ഉന്തിയെന്നാണ് ആരോപണം.
സ്പാനിഷ് ഫെഡറേഷന്‍ നിയമപ്രകാരം 12 മത്സരങ്ങള്‍ വരെയാണ് ഇത്തരം പ്രവൃത്തിക്ക് ലഭിക്കുന്ന ശിക്ഷ. ഈ സാഹചര്യത്തില്‍ റൊണാള്‍ഡോയുടെ വിധി ഫെഡറേഷന്‍റെ തീരുമാനമെന്താകുമെന്ന് ആശ്രയിച്ചിരിക്കും. രണ്ടാം പകുതി മുതലാണ് കളി സംഭവബഹുലമായത്. മെസിയുടെ പെനാല്‍റ്റിക്ക് റൊണാള്‍ഡോയിലൂടെ റയല്‍ പകരം വീട്ടിയതു മുതലായിരുന്നു കളി ചൂടുപിടിച്ചത്. കഴിഞ്ഞ എല്‍ ക്ലാസിക്കോയില്‍ റയലിന്‍റെ നെഞ്ച് പിളര്‍ത്ത ഗോളിന് ശേഷം റയല്‍ ആരാധകര്‍ക്ക് നേരെ മെസി ജഴ്‍സി ഊരിപ്പിടിച്ച് നിന്ന നില്‍പ്പ് ആരു മറന്നാലും റോണോ മറന്നില്ല എന്നതിന്‍റെ തെളിവായിരുന്നു ആ നിമിഷം. ബാഴ്‍സക്കെതിരെ മിന്നുംഗോള്‍ നേടിയ ശേഷം മെസിയെ ട്രോളി ബാഴ്സ ആരാധകര്‍ക്ക് നേരെ ജേഴ്‍സി ഊരിപ്പിടിച്ച് പരിഹാസപൂര്‍വം റോണോ നിന്നു. ഇതിനായിരുന്നു ആദ്യ മഞ്ഞക്കാര്‍ഡ്.
https://www.facebook.com/Malayalivartha
