ഇന്റര്നാഷണല് ബ്രേക്ക് കഴിഞ്ഞു; ക്ലബ്ബ് ഫുട്ബോള് മത്സരങ്ങള് ഇന്ന് മുതല് സജീവം
ലോകകപ്പ് യോഗ്യതാ മത്സരങ്ങള്ക്ക് വേണ്ടിയുള്ള ഇടവേളയ്ക്ക് ശേഷം ഇന്ന് മുതല് യൂറോപ്പിയന് ക്ലബ്ബ് ഫുട്ബോള് മത്സരങ്ങള് വീണ്ടും സജീവമാകുന്നു. ഇംഗ്ലീഷ് പ്രീമിയര് ലീഗ്,ബുണ്ടസ്ലീഗ,ലാലിഗ,ഇറ്റാലിയന് ലീഗ്,ഫ്രഞ്ച് ലീഗ് എന്നീ ടൂര്ണമെന്റുകളില് പ്രമുഖ ടീമുകള് ഇന്ന് മത്സരത്തിനിറങ്ങും.
ഇംഗ്ലീഷ് പ്രീമിയര് ലീഗ്...
ലോകത്തെ ഏറ്റവും ആരാധകരുള്ള ലീഗായ ഇംഗ്ലണ്ടിലെ ഇംഗ്ലീഷ് പ്രീമിയര് ലീഗില് ഇന്ന് ഏഴ് മത്സരങ്ങളാണ് നടക്കുക. വമ്പന്മാരായ മാഞ്ചസ്റ്റര് സിറ്റിയും ലിവര്പൂളും തമ്മിലും മുന് ചാമ്പ്യന്മാരായ ചെല്സിയും ലെസ്റ്റര് സിറ്റിയും തമ്മില് നടക്കുന്ന പോരാട്ടങ്ങളാണ് ഇന്നത്തെ ശ്രദ്ധേയ മത്സരങ്ങള്. മാഞ്ചസ്റ്റര് യുണൈറ്റഡും ആഴ്സണലും കളത്തിലിറങ്ങും. ലീഗില് എല്ലാ ടീമുകള്ക്കും മൂന്ന് മത്സരം വീതം പൂര്ത്തിയായപ്പോള് മൂന്നിലും ജയിച്ച് ഒന്പത് പോയിന്റോടെ മാഞ്ചസ്റ്റര് യുണൈറ്റഡാണ് മുന്നില്. 10 ഗോളുകള് അടിച്ച് കൂട്ടിയ അവര് ഒരു ഗോള് പോലും വഴങ്ങിയിട്ടില്ല. ലിവര്പൂളാണ് രണ്ടാം സ്ഥാനത്ത്.
ബുണ്ടസ്ലീഗ...
ജര്മ്മന് ഫുട്ബോള് ലീഗായ ബുണ്ടസ്ലീഗയില് യൂറോപ്പിയന് വമ്പന്മാരായ ബയേണ് മ്യൂണിക് ഇന്ന് കളത്തിലിറങ്ങും. ഹൊഫെന്ഹെയിമുമായാണ് ബയേണിന്റെ മത്സരം. ബൊറൂസിയ ഡോര്ട്മുണ്ടും വോള്ഫ്സ്ബര്ഗും ഇന്ന് മത്സരത്തിനിറങ്ങും. രണ്ട് മത്സരങ്ങള് പൂര്ത്തിയാക്കിയ ഡോര്ട്മുണ്ടും ബയേണ് മ്യൂണിക്കുമാണ് ഒന്നും രണ്ടും സ്ഥാനത്ത്. ഇരു ടീമിനും ആറ് പോയിന്റ് ഉണ്ട്. ഗോള് ശരാശരിയുടെ നേട്ടത്തില് ഡോര്ട്മുണ്ടാണ് പോയിന്റ് ടേബിളില് ഒന്നാമത്.
ലാലിഗ...
സ്പാനിഷ് ലീഗില് വമ്പന്മാരായ റയല് മാഡ്രിഡും ബാഴ്സലോണ,അത്ലറ്റിക്കോ മാഡ്രിഡ് എന്നീ ടീമുകള് കളത്തിലിറങ്ങും. കഴിഞ്ഞ വര്ഷത്തെ ചാമ്പ്യന്മാരായ റയല് ലെവാന്തയെ നേരിടും. ലാലിഗ പോയിന്റ് ടേബിളില് കാര്യങ്ങള് വളരെ രസകരമാണ്. കളിച്ച രണ്ട് മത്സരങ്ങളും ജയിച്ച് റയല് സോസിദാദാണ് ഒന്നാം സ്ഥാനത്ത്. ബാഴ്സിലോണ രണ്ടാമതും. മുന്വര്ഷത്തെ ജേതാക്കളായ റയല് മാഡ്രിഡ് ഒരു ജയവും ഒരു സമനിലയുമായി അഞ്ചാം സ്ഥാനത്താണ്.
ഫ്രഞ്ച് ലീഗ്...
ഫ്രഞ്ച് ലീഗില് ഇന്ത്യന് സമയം ഇന്നലെ രാത്രി തന്നെ മത്സരം തുടങ്ങി. ഇന്നലെ നടന്ന മത്സരത്തില് ഫ്രഞ്ച് വമ്പന്മാരായ പാരീസ് സെയിന്റ് ജര്മ്മയിന് മെറ്റ്സിനെ ഒന്നിനെതിരെ അഞ്ച് ഗോളുകള്ക്ക് പരാജയപ്പെടുത്തി. പി.എസ്.ജിയില് അരങ്ങേറ്റ മത്സരത്തിനിറങ്ങിയ കെയ്ലാന് എംബപ്പേയ് ഒരു ഗോള് നേടിയപ്പോള് എഡിസണ് കവാനി ഇരട്ടഗോളും നെയ്മര് ലൂക്കാസ് മൗറ എന്നിവര് ഓരോ ഗോളും നേടി. കളിച്ച അഞ്ച് മത്സരത്തിലും ജയിച്ച് 15 പോയിന്റോടെ പി.എസ്.ജി തന്നെയാണ് പോയിന്റ് ടേബിളില് മുന്നില്.
ഇറ്റാലിയന് സീരി എ...
ഇറ്റലിയിലെ സീരി എയില് ഒറ്റ മത്സരമാണ് ഇന്ന് നടക്കുക. ചാമ്പ്യന്മാരായ ജുവന്റസ് ഷിവോയെ നേരിടും. കളിച്ച രണ്ട് മത്സരങ്ങളും ജയിച്ച് ജുവന്റസാണ് ടേബിളില് ഒന്നാമത്.
https://www.facebook.com/Malayalivartha