യൂറോപ്പിലെ ഫുട്‌ബോള്‍ ചക്രവര്‍ത്തിയെ നിര്‍ണ്ണയിക്കുന്ന 2017-18 സീസണ്‍ യുവേഫ ചാമ്പ്യന്‍സ് ലീഗ് മത്സരങ്ങള്‍ക്ക് ഇന്ന് തുടക്കമാകും. ഇന്നും നാളെയുമായി നടക്കുന്ന ഗ്രൂപ്പ് മത്സരങ്ങളില്‍ 32 ടീമുകള്‍ തമ്മില്‍ ഏറ്റുമുട്ടും. എ മുതല്‍ എച്ച് വരെയുള്ള ഓരോ ഗ്രൂപ്പിലും നാല് ടീമുകളാണ് ഉള്‍പ്പെടുക. എല്ലാ ടീമുകളും അവരുടെ ഹോമിലും എവേ മത്സരവും കളിക്കും. ഗ്രൂപ്പിലെ ആദ്യത്തെ രണ്ട് സ്ഥാനക്കാര്‍ അടുത്ത ഘട്ടത്തിലേക്ക് കടക്കും.

ഇന്ന് നടക്കുന്ന മത്സരങ്ങള്‍ താഴെപ്പറയുന്ന ക്രമത്തിലാണ്...

ചെല്‍സി X ഖരാബാഗ്

റോമ X അത്‌ലറ്റിക്കോ മാഡ്രിഡ്

ഒളിമ്പിയാക്കോസ് X സ്‌പോര്‍ട്ടിങ്

മാഞ്ചസ്റ്റര്‍ യുണൈറ്റഡ് X ബേസല്‍

ബെന്‍ഫിക്ക X സി.എസ്.കെ മോസ്‌കോവ

ബാര്‍സിലോണ X ജുവന്റസ്

ബയേണ്‍ മ്യൂണിക് X ആന്ദര്‍ലെഷ്ട്

സെല്‍റ്റിക് X പാരീസ് സെയിന്റ് ജര്‍മൈന്‍

കഴിഞ്ഞ വര്‍ഷം ക്വാര്‍ട്ടര്‍ ഫൈനല്‍ പോരാട്ടത്തില്‍ വന്ന തനിയാവര്‍ത്തനം പോലെയാണ് ബാര്‍സിലോണ-ജുവന്റസ് പോരാട്ടം. ബാര്‍സിലോനയ്ക്ക് പകരംവീട്ടാനുള്ള സുവര്‍ണ്ണാവസരം. നെയ്മര്‍ ടീമില്‍ നിന്നും പോയതിന് ശേഷമുള്ള ആദ്യ ചാമ്പ്യന്‍സ് ലീഗ്. നെയ്മറിന് പകരം ബൊറൂസിയ ഡോര്‍ട്ട്മുണ്ടില്‍ നിന്നും വന്ന ഇരുപതുകാരന്‍ ഡെംപെലെയിലാണ് എല്ലാവരുടെയും കണ്ണുകള്‍.

പാരീസ് സെയിന്റ് ജര്‍മൈന്‍ രണ്ടും കല്‍പ്പിച്ചാണ് പോരാട്ടത്തിന് എത്തിയിട്ടുള്ളത്. ട്രാന്‍സ്ഫര്‍ വിപണിയില്‍ പണം വാരിയെറിഞ്ഞു വന്‍തോക്കുകളെയെല്ലാം അവര്‍ സ്വന്തമാക്കി. ബാഴ്‌സലോണയില്‍ നിന്നും നെയ്മര്‍, മൊണാക്കോയില്‍ നിന്നും കെയ്‌ലാന്‍ എംപപ്പെ എന്നിവരെയാണ് അറബ് ഉടമസ്ഥതയിലുള്ള മാനേജ്മന്റ് ടീമിലെത്തിച്ചത്.

ഇത്തവണ ഇംഗ്ലീഷ് പ്രീമിയര്‍ ലീഗില്‍ നിന്നും അഞ്ച് ടീമുകള്‍ ചാമ്പ്യന്‍സ് ലീഗ് പോരാട്ടത്തിന് എത്തി എന്നുള്ളതും ശ്രദ്ധേയമായ കാര്യമാണ്. മാഞ്ചസ്റ്റര്‍ സിറ്റി,മാഞ്ചസ്റ്റര്‍ യുണൈറ്റഡ്,ചെല്‍സി,ടോട്ടന്‍ഹാം ,ലിവര്‍പൂള്‍ എന്നിവയാണ് അഞ്ച് ടീമുകള്‍.

ചാമ്പ്യന്മാരായ റയല്‍ മാഡ്രിഡും ജര്‍മ്മന്‍ ക്ലബ് ബൊറൂസിയ ഡോര്‍ട്ട്മുണ്ട്,ടോട്ടന്‍ഹാം എന്നീ ടീമുകള്‍ നാളെ മത്സരത്തിനിറങ്ങും.