മദ്യപിച്ചു വാഹനമോടിച്ചത്തിന് വെയ്ൻ റൂണിക്ക് വിലക്ക്
മദ്യപിച്ചു വാഹനമോടിച്ച ഇംഗ്ലണ്ട് ഫുട്ബോൾ ടീം മുൻ ക്യാപ്റ്റൻ വെയ്ൻ റൂണിക്ക് വാഹനമോടിക്കുന്നതിൽനിന്നു രണ്ടു വർഷം വിലക്ക്. സ്റ്റോക്ക്പോർട്ട് മജിസ്ട്രേറ്റ് കോടതിയാണ് റൂണിക്ക് വിലക്കേർപ്പെടുത്തിയത്. കൂടാതെ, 100 മണിക്കൂർ വേതനമില്ലാത്ത സാമൂഹ്യ സേവനവും റൂണിക്കു കോടതി വിധിച്ചു. കോടതിയിലെത്തി തെറ്റ് ഏറ്റുപറഞ്ഞ റൂണി പരസ്യമായി മാപ്പുപറയാൻ സന്നദ്ധനാണെന്ന് അറിയിച്ചു.
ഈ മാസം ഒന്നിന് മദ്യലഹരിയിൽ വാഹനമോടിച്ച റൂണിയെ ചെഷയർ പോലീസാണ് അറസ്റ്റ് ചെയ്തത്. വിംസ്ലോയിലെ ആൾട്രിച്ചാം റോഡിൽ റൂണി ഓടിച്ചിരുന്ന ഫോക്സ് വാഗണ് ബീറ്റിൽ കാർ തടഞ്ഞുനിർത്തി താരത്തെ അറസ്റ്റ് ചെയ്യുകയായിരുന്നു. മദ്യപിച്ചെന്നു കണ്ടെത്തിയതിനെ തുടർന്ന് റൂണിക്കെതിരേ പോലീസ് കേസ് രജിസ്റ്റർ ചെയ്തു. പിടിയിലാകുന്പോൾ അനുവദിച്ചിരുന്നതിലും മൂന്നു മടങ്ങ് അധികമായിരുന്നു റൂണിയുടെ ശരീരത്തിലെ മദ്യത്തിന്റെ അളവ്.
ഇക്കഴിഞ്ഞ ഓഗസ്റ്റിലാണ് റൂണി ഇംഗ്ലണ്ട് ദേശീയ ടീമിൽനിന്നു വിരമിച്ചത്. ഇംഗ്ലണ്ടിന്റെ എക്കാലത്തെയും ഉയർന്ന ഗോൾ സ്കോററാണ് റൂണി. ഇംഗ്ലണ്ട് ടീമിനു വേണ്ടി 119 മത്സരങ്ങളിൽ നിന്നായി 53 ഗോളുകൾ നേടിയിട്ടുണ്ട്. ഇംഗ്ലീഷ് പ്രീമിയർ ലീഗിൽ 13 വർഷമായി കളിച്ചിരുന്ന മാഞ്ചസ്റ്റർ യുണൈറ്റഡിനെ ഉപേക്ഷിച്ച് റൂണി ഈ സീസണിൽ, തന്റെ ആദ്യകാല ക്ലബ്ബുകളിലൊന്നായ എവർട്ടണിലേക്ക് തിരിച്ചെത്തിയിരുന്നു.
https://www.facebook.com/Malayalivartha