ഐ എസ് എൽ നാലാം സീസണിൽ വിജയ വഴിയിൽ തിരിച്ചെത്തിയ കേരളബ്ലാസ്റ്റേഴ്‌സ് ഇന്ന് ജംഷഡ്പൂര്‍ എഫ്.സിയെ നേരിടും. ബ്ലാസ്റ്റേഴ്സിന്റെ പഴയ പരിശീലകന്‍ സ്റ്റീവ് കോപ്പലിന്റെ ടീമാണ് ജംഷഡ്പൂര്‍. കഴിഞ്ഞ രണ്ട് മത്സരങ്ങളില്‍ തുടര്‍ച്ചയായി വിജയം കണ്ട ബ്ലാസ്റ്റേഴ്‌സ് മികച്ച ഫോമിലാണ്. ജംഷഡ്പൂരിന്റെ ഹോംഗ്രൗണ്ടായ ജംഷഡ്പൂര്‍ ടാറ്റാ സ്റ്റേഡിയത്തിലാണ് മത്സരം.

കൊച്ചിയില്‍ കഴിഞ്ഞ മാസം നടന്ന ആദ്യപാദ പോരാട്ടത്തില്‍ ബ്ളാസ്റ്റേഴ്സും ജാംഷഡ്പൂരും ഗോള്‍ രഹിത സമനിലയില്‍ പിരിഞ്ഞിരുന്നു. സീസണിന്റെ ആദ്യഘട്ടത്തില്‍ നിറം മങ്ങിയ ബ്ലാസ്റ്റേഴ്‌സ് പുതിയ പരിശീലകൻ ഡേവിഡ് ജെയിംസിന്റെ കീഴിൽ മികച്ച ഫോമിലാണ്. എന്നാൽ തങ്ങളുടെ തട്ടകത്തിൽ ഒരു മത്സരം പോലും ജയിക്കാനാവാത്ത ജംഷഡ്പൂരിന് ഇന്നത്തെ മത്സരം നിർണ്ണായകമാണ്.

സൂപ്പര്‍ സ്ട്രൈക്കര്‍ ഇയാന്‍ ഹ്യൂമിന്റെ മികച്ച ഫോമിലാണ് ബ്ലാസ്റ്റേഴ്സിന്റെ പ്രതീക്ഷ. കഴിഞ്ഞ രണ്ടു കളികളിൽ നിന്ന് നാല് ഗോളുകളാണ് ഹ്യൂമിന്റെ ബൂട്ടിൽ നിന്നും പിറന്നത്. ഇന്നത്തെ മത്സരത്തിൽ വിജയിച്ചാൽ ബ്ലാസ്റ്റേഴ്സിന് മൂന്നാം സ്ഥാനത്തെത്താം. ജംഷഡ്പൂര്‍ നിലവിൽ എട്ടാം സ്ഥാനത്താണ്. പരിക്കേറ്റ സൂപ്പർ താരം ബെര്‍ബറ്റോവ് ഇന്നത്തെ മത്സരത്തിൽ കളിക്കാൻ സാധ്യതയില്ല.