ഇനിയുള്ള ഒരുമാസക്കാലം ലോകത്തിന് ഫുട്ബാളിന്റെ ആവേശനാളുകള്...
ലുഷ്നികി സ്റ്റേഡിയത്തിലെ 80,000ത്തോളം കാണികളെയും ടെലിവിഷന് സെറ്റിനു മുന്നിലെ കോടിക്കണക്കിന് ആരാധകരെയും സാക്ഷിയാക്കി ലോകം പന്തുതട്ടിത്തുടങ്ങി. ഇനിയുള്ള ഒരുമാസക്കാലം ലോകത്തിന് ഫുട്ബാളിന്റെ ആവേശനാളുകള്. ആഡംബരങ്ങള് നിറഞ്ഞ ഉദ്ഘാടന ചടങ്ങില് ത്രീഡി വിസ്മയത്തില് തിളങ്ങിയ റഷ്യയുടെ കളിമുറ്റത്ത് ബ്രസീല് ഫുട്ബാള് ഇതിഹാസം റൊണാള്ഡോയും പോപ് സ്റ്റാര് റോബി വില്യംസും ആതിഥേയരുടെ ഒപേറ ഗായി എയ്ഡ ഗാരിഫുളിനയും നിറഞ്ഞുനിന്നു.
ഒടുവില്, ലോകത്തെ സാക്ഷിയാക്കി റഷ്യന് പ്രസിഡന്റ് വ്ലാദിമിര് പുടിന് ലോകകപ്പിന് കിക്കോഫ് കുറിച്ചതായി പ്രഖ്യാപിച്ചു. റഷ്യയും സൗദി അറേബ്യയും തമ്മിലെ മത്സരത്തിന് അര മണിക്കൂര് മുമ്പായിരുന്നു ഉദ്ഘാടന ചടങ്ങുകളുടെ തുടക്കം. സംഗീതവും നൃത്തവും നിറഞ്ഞ ചടങ്ങുകള് കുറഞ്ഞ സമയമേ ഉണ്ടായിരുന്നുള്ളൂവെങ്കിലും ആരാധകര്ക്ക് അനുഭവവേദ്യമായി.
ആതിഥേയരായ റഷ്യയെയും നിലവിലെ ചാമ്പ്യന്മാരായ ജര്മനിയെയും വരവേറ്റാണ് ചടങ്ങുകള് ആരംഭിച്ചത്. ഉദ്ഘാടന പോരാട്ടത്തിനിറങ്ങിയ ആതിഥേയര്ക്ക് പിന്തുണയുമായി റഷ്യക്കാര് നീലയും ചുവപ്പും വെള്ളയും നിറമണിഞ്ഞ് ലുഷ്നികിയുടെ ഗാലറി പടവിന് മഴവില്ലഴകേകി.
കിക്കോഫ് ദിനത്തില് ഒരു കളിയോടെ തുടങ്ങിയ വിശ്വപോരാട്ടം ഇന്ന് സജീവമാവും. റഷ്യയിലെ വിവിധ നഗരങ്ങളിലായി മൂന്നു മത്സരങ്ങളാണ് ഇന്നുള്ളത്
https://www.facebook.com/Malayalivartha