ഇന്ജുറി ടൈമില്'ക്യാപ്റ്റന്റെ കരുത്തില് ഇംഗ്ലണ്ടിന് ജയം; കീന് ഇരട്ടഗോള്; ടുണീസ്യയെ തകര്ത്തത് ഒന്നിനെതിരെ രണ്ടു ഗോളുകള്ക്ക്
ആവേശം അവസാന വിസില് വരെ നിറഞ്ഞുനിന്ന മല്സരത്തില് ടുണീസിയയ്ക്കെതിരെ ഇംഗ്ലണ്ടിന് ജയം. ഒന്നിനെതിരെ രണ്ടു ഗോളുകള്ക്കാണ് ഇംഗ്ലണ്ട് കടന്നുകൂടിയത്. 90-ാം മിനിറ്റ് വരെ സമനിലയില് തുടര്ന്ന മല്സരത്തില്, ഇന്ജുറി ടൈമിലാണ് ഇംഗ്ലണ്ട് വിജയഗോള് കണ്ടെത്തിയത്. 11-ാം മിനിറ്റില് ടീമിന് ലീഡ് സമ്മാനിച്ച ക്യാപ്റ്റന് ഹാരി കീനാണ് ഇന്ജുറി ടൈമിലും ലക്ഷ്യം കണ്ടത്. ആദ്യ ലോകകപ്പ് കളിക്കുന്ന ടുണീസിയയുടെ ആദ്യ ലോകകപ്പ് ഗോള് ഫെര്ജാനി സാസ്സി നേടി. 35-ാം മിനിറ്റില് പെനല്റ്റിയില്നിന്നായിരുന്നു സാസ്സിയുടെ ഗോള്.
പതിനൊന്നാം മിനിറ്റിലായിരുന്നു കീനിന്റെ ആദ്യ ഗോള്. ഒരു റീബൗണ്ട് ടാപ്പ് ചെയ്യുകയായിരുന്നു ക്യാപ്റ്റന്. എന്നാല്, മുപ്പത്തിനാലാം മിനിറ്റില് ഒരു പെനാല്റ്റി ലക്ഷ്യത്തിലെത്തിച്ച് സാസി ടുണീഷ്യയെ ഒപ്പമെത്തിച്ചു. അവസരങ്ങള് ഏറെ തുലച്ച് ഇംഗ്ലീഷുകാര് സമനില വഴങ്ങുമെന്ന് തോന്നിച്ചെങ്കിലും നാലു മിനിറ്റ് അനുവദിച്ച ഇഞ്ചുറി ടൈമില് റഫറി വിസസലൂതാന് രണ്ട് മിനിറ്റ് മാത്രം ബാക്കി നില്ക്കെ ഒരു കോര്ണര് കീന് വലയിലേയ്ക്ക് കുത്തിയിട്ട് ഇംഗ്ലണ്ടിന് വിലപ്പെട്ട വിജയം നേടിക്കൊടുത്തു. ട്രിപ്പിയറാണ് കോര്ണറെടുത്തത്.
വമ്പന് ടീമുകള്ക്ക് തുടര്ച്ചയായി കാലിടറുന്ന റഷ്യയില്, ഇംഗ്ലണ്ടിന്റെ അവസ്ഥയും വ്യത്യസ്തമായിരുന്നില്ല. ആദ്യ പകുതിയില് തിരിച്ചടിച്ചതിനു പിന്നാലെ ഇംഗ്ലണ്ടിനെ പൂര്ണമായും നിയന്ത്രിച്ചു നിര്ത്തിയ ടുണീസിയ അട്ടിമറി സൃഷ്ടിക്കുമെന്ന് ആരാധകര് ഉറപ്പിച്ചതാണ്. ഇതിനു പിന്നാലെയായിരുന്നു കീനിന്റെ രണ്ടാം ഗോളിന്റെ പിറവിയും.
https://www.facebook.com/Malayalivartha