ഐസ്ലന്ഡിനെ വീഴ്തി നൈജീരിയ; നൈജീരിയയുടെ മികച്ച പ്രകടനം അര്ജന്റീനക്ക് അനുഗ്രഹമാകുമോ അതോ വിനയാകുമോ?
നൈജീരിയയുടെ ജയം അര്ജന്റീന അനുഗ്രഹമായി കരുതുമ്പോഴും നൈജീരിയ പുറത്തെടുത്ത പ്രകടനത്തില് അര്ജന്റീന ആശങ്കപ്പെടേണ്ടതുണ്ട് അടുത്ത മല്സരത്തില് ഇതേ നൈജീരിയയെ തോല്പ്പിച്ചാല് മാത്രമേ അര്ജന്റീനയ്ക്ക് ടൂര്ണമെന്റില് പ്രതീക്ഷയ്ക്ക് വകയുള്ളൂ. അര്ജന്റീനയെ വിറപ്പിച്ച ഐസ്ലന്ഡ് നൈജീര്യന് കരുത്തിന് മുന്നില് ഉരുകിയൊലിക്കുകയായിരുന്നു. ലയണല് മെസ്സിയെ കത്രികപ്പൂട്ടിട്ടു പൂട്ടിയതിന്റെ ഊര്ജത്തിലിറങ്ങിയവര്ക്ക് ലോകകപ്പ് ഫുട്ബോളിന്റെ ഗ്രൂപ്പ് ഡിയില് കാലിടറുകയായിരുന്നു. പ്രീക്വാര്ട്ടറില് കണ്ണുനട്ട് വിജയമുറപ്പിച്ചിറങ്ങിയവര് മടക്കമില്ലാത്ത രണ്ട് ഗോളിനാണ് നൈജീരിയയോട് തോറ്റത്.
അഹമ്മദ് മുസയുടെ ഇരട്ട ഗോളാണ് നൈജീരിയക്ക് ജീവന് തിരിച്ചുനല്കിയ വിജയം സമ്മാനിച്ചത്. ഒഴിഞ്ഞ ഒന്നാം പകുതിക്കുശേഷം രണ്ടാം പകുതിയിലാണ് ഗോളുകള് രണ്ടും പിറന്നത്. നാല്പത്തിയൊന്പതാം മിനിറ്റിലായിരുന്നു ആദ്യ ഗോള്. രണ്ടാമത്തേത് എഴുപത്തിയഞ്ചാം മിനിറ്റിലും. വലതു പാര്ശ്വത്തില് നിന്ന് മോസസ് കൊടുത്ത ക്രോസ് ബോക്സില് വച്ച് പിടിച്ചെടുത്ത മുസ അര നിമിഷം പോലും പാഴാക്കാതെ അതേ കാലുകൊണ്ടൊരു ഹാഫ് വോളി തൊടുക്കുകയായിരുന്നു നെറ്റിലേയ്ക്ക്. ഇതിലും സുന്ദരമായിരുന്നു രണ്ടാം ഗോള്. പിന്നിരയില് നിന്ന് ലഭിച്ച പന്ത് നന്നായി നിയന്ത്രിച്ച് ബോക്സിലേയ്ക്ക് കുതിക്കുകയായിരുന്നു മുസ. ഓട്ടത്തില് ക്ലാസിക് ശൈലിയില് കാരി ആര്ന്സണിനെ മറികടന്ന മുസ ഗോളി ഹാല്ഡോര്സനെ മുന്നോട്ട് കയറാന് പ്രേരിപ്പിച്ചു. വലത്തോട്ട് ഒന്നുരണ്ട് ചുവടുവച്ച് ഒരു തീയുണ്ട. നെറ്റിലേയ്ക്ക്. എല്ലാം ഓട്ടത്തിന്റെ വേഗം ഒട്ടും തന്നെ കുറയാതെ തന്നെ. ഈ ലോകകപ്പ് കണ്ട ഏറ്റവും സുന്ദരമായ സോളോ ഗോളുകളില് ഒന്ന്.പത്ത് മിനിറ്റിനുള്ളില് തന്നെ ഒരു ഗോള് മടക്കി മത്സരത്തിലേയ്ക്ക് തിരിച്ചുവരാനുള്ള അവസരം ലഭിച്ചിരുന്നു എസ്ലന്ഡിന്. എന്നാല്, ഗില്ഫി സിഗുറോസന്റെ കിക്ക് ആകാശത്തേയ്ക്ക് പറന്നു പാഴായി.
നൈജീരിയയുടെ പെനാല്റ്റി ഏരിയയില് അലക്സ് ഇവോബി ഫിന്ബോഗാസനെ വീഴ്ത്തിയതിന് വാറിന്റെ സഹായത്തോടെ കിട്ടിയ പെനാല്റ്റിയാണ് ഗില്ഫി സിഗുറോസണ് ബാറിന് മുകളിലൂടെ അടിച്ചുപറത്തിയത്. ഈ ജയത്തോടെ നൈജീരിയ ഗ്രൂപ്പില് രണ്ടാം സ്ഥാനത്തേയ്ക്ക് കയറി. ക്രൊയേഷ്യയാണ് ഗ്രൂപ്പില് മുന്നില്. അര്ജന്റീനയ്ക്കും ഐസ്ലന്ഡിനും ഓരോ പോയിന്റ് വീതമാണുള്ളത്.
https://www.facebook.com/Malayalivartha