ഏഷ്യന് അത്ലറ്റിക്സില് ചൈനയെ മലര്ത്തിയടിച്ച് ഇന്ത്യ
കരുത്തരായ ചൈനയെ മലര്ത്തിയടിച്ച് ഏഷ്യന് അത്ലറ്റിക് ചാംപ്യന്ഷിപ്പില് ഇന്ത്യയ്ക്കു കന്നിക്കിരീടം. സ്വന്തം മണ്ണിലെ ഏഷ്യന് ചാംപ്യന്ഷിപ്പില് 12 സ്വര്ണമുള്പ്പെടെയാണ് ഇന്ത്യയുടെ പടയോട്ടം. 12 സ്വര്ണം, അഞ്ച് വെള്ളി, 12 വെങ്കലം എന്നിവയുള്പ്പെടെ 29 മെഡലുകളുമായാണ് ഇന്ത്യയുടെ കിരീടധാരണം. ഏഷ്യന് അത്ലറ്റിക് മീറ്റിന്റെ ചരിത്രത്തില് ഇന്ത്യയുടെ ഏറ്റവും മികച്ച പ്രകടനമാണിത്. ആറു തവണ ഇന്ത്യ രണ്ടാം സ്ഥാനത്ത് എത്തിയിട്ടുണ്ട്. എട്ട് സ്വര്ണവും ഏഴു വെള്ളിയും നാലു വെങ്കലവുമുള്പ്പെടെ 19 മെഡലുകള് നേടിയ ചൈനയാണ് രണ്ടാം സ്ഥാനത്ത്.
കഴിഞ്ഞ 17 തവണയും ചൈനയായിരുന്നു ഏഷ്യന് മീറ്റിലെ ജേതാക്കള്. ആദ്യ നാലു മീറ്റുകളില് ജപ്പാനും ഒന്നാമതെത്തിയിട്ടുണ്ട്. ഏഴു സ്വര്ണമുള്പ്പെടെ 20 മെഡലുകളുമായി ട്രാക്കിലിറങ്ങിയ ഇന്ത്യ, അവസാന ദിനത്തില് അഞ്ചു സ്വര്ണമുള്പ്പെടെ ഒന്പതു മെഡലുകള് കൂടി നേടിയാണ് ചരിത്രവിജയം സ്വന്തമാക്കിയത്. ജി.ലക്ഷ്മണന്, സ്വപ്ന ബര്മന്, നീരജ് ചോപ്ര, 4ഃ400 മീറ്റര് റിലേയില് പുരുഷ, വനിതാ ടീമുകള് എന്നിവരാണ് അവസാന ദിനത്തില് സ്വര്ണം നേടിയത്. 5,000 മീറ്ററില് സ്വര്ണം നേടിയ ജി.ലക്ഷ്മണന്, 10,000 മീറ്ററിലും സുവര്ണനേട്ടം ആവര്ത്തിച്ച് മീറ്റില് ഡബിള് തികച്ചു. ഈ വിഭാഗത്തില് വയനാട്ടുകാരന് ടി. ഗോപിയ്ക്കാണ് വെള്ളി. 4ഃ400 മീറ്റര് റിലേയില് പുരുഷ, വനിതാ ടീമുകള് സ്വര്ണം നേടി.
മുഹമ്മദ് അനസ്, അമോജ് ജേക്കബ്, കുഞ്ഞുമുഹമ്മദ്, ആരോക്യ രാജീവ് എന്നിവരാണ് പുരുഷവിഭാഗത്തില് ഇന്ത്യയെ പ്രതിനിധീകരിച്ചത്. ഇന്ത്യ മെഡല് ഉറപ്പിച്ചിരുന്ന ജാവലിന് ത്രോയില് പ്രതീക്ഷകള് ശരിവച്ച് നീരജ് ചോപ്ര സ്വര്ണം എറിഞ്ഞിട്ടു. 85.23 മീറ്റര് ദൂരത്തേക്ക് ജാവലിന് പായിച്ചാണ് നീരജ് സുവര്ണനേട്ടം സ്വന്തമാക്കിയത്. ഇതേയിനത്തില് ഇന്ത്യയുടെ തന്നെ ദവീന്ദര് സിങ് വെങ്കലം നേടി.
ഹെപ്റ്റാത്തലണില് സ്വപ്ന ബര്മന് സ്വര്ണവും പൂര്ണിമ ഹെമ്പ്രാം വെങ്കലവും കരസ്ഥമാക്കി. പുരുഷവിഭാഗം 800 മീറ്ററില് മലയാളി താരം ജിന്സണ് ജോണ്സനും വെങ്കലം നേടി. അതിനിടെ, 800 മീറ്ററില് സ്വര്ണം നേടിയ അര്ച്ചന അധവിനെ അയോഗ്യയാക്കിയാക്കിയത് ഇന്ത്യയ്ക്ക് തിരിച്ചടിയായി.
ഫിനിഷ് ചെയ്യുന്നതിനിടെ ശ്രീലങ്കന് താരത്തെ തടസ്സപ്പെടുത്തിയതിനാണ് അര്ച്ചനയെ അയോഗ്യയാക്കിയത്.
https://www.facebook.com/Malayalivartha