ആരാധകരെ നിരാശരാക്കി ഐഎസ്എല്‍... ഉദ്ഘാടന മല്‍സരത്തില്‍ കേരളാ ബ്ലാസ്‌റ്റേഴ്‌സും അമര്‍ തൊമര്‍ കൊല്‍ക്കത്തയും ഗോള്‍രഹിത സമനിലയില്‍
ആരാധകരെ നിരാശരാക്കി ഐഎസ്എല്‍ ഉദ്ഘാടന മല്‍സരത്തില്‍ കേരളാ ബ്ലാസ്‌റ്റേഴ്‌സും അമര്‍ തൊമര്‍ (എടി) കൊല്‍ക്കത്തയും ഗോള്‍രഹിത സമനിലയില്‍ പിരിഞ്ഞു. മത്സരം സമനിലയിലായി എന്നതിനേക്കാള്‍ ബ്ലാസ്‌റ്റേഴ്‌സിന്റെ പ്രകടനമാണ് കാണികളെ നിരാശരാക്കിയത്. ഉജ്വലം എന്നു വിശേഷിപ്പിക്കാവുന്ന ഒരു മല്‍സരക്കാഴ്ച പോലും അവശേഷിപ്പിക്കാതെയാണ് മത്സരത്തിന് അവസാന വിസിലുയര്‍ന്നത്.
ആദ്യ പകുതിയില്‍ ഗോളിനു മുന്നില്‍ പോള്‍ റെച്ചൂബ്കയെന്ന ഇംഗ്ലിഷ് താരവും രണ്ടാം പകുതിയില്‍ പോസ്റ്റും ബ്ലാസ്‌റ്റേഴ്‌സിന്റെ രക്ഷകരാകുന്നതും മല്‍സരത്തില്‍ കണ്ടു. ബ്ലാസ്‌റ്റേഴ്‌സിന്റെ തരക്കേടില്ലാത്ത രണ്ടു ഗോള്‍ശ്രമങ്ങള്‍ക്കു മുന്നില്‍ കൊല്‍ക്കത്ത ഗോള്‍കീപ്പര്‍ ദേബ്ജിത് മജുംദാര്‍ വില്ലനായപ്പോള്‍, കൊല്‍ക്കത്ത മുന്നേറ്റനിരയുടെ ഫിനിഷിങ്ങിലെ പോരായ്മകളാണ് അവര്‍ക്കു തിരിച്ചടിയായത്.
പന്തടക്കത്തിലും പാസിങ്ങിലും കൊല്‍ക്കത്ത താരങ്ങള്‍ മേധാവിത്തം പുലര്‍ത്തിയപ്പോള്‍ ആദ്യപകുതിയെ അപേക്ഷിച്ച് തരക്കേടില്ലാത്ത പ്രകടനം നടത്തിയെന്ന ആശ്വാസത്തോടെയാകും ബ്ലാസ്‌റ്റേഴ്‌സ് ആരാധകര്‍ രണ്ടാം പകുതിയില്‍ കളി കണ്ടത്.
ഔദ്യോഗിക കണക്കനുസരിച്ച് 37,462 പേരാണ് കലൂര്‍ സ്‌റ്റേഡിയത്തില്‍ ഇന്ന് കളി കണ്ടത്. കൊച്ചിക്കു പേരുദോഷമുണ്ടാക്കിയ ഫിഫ ലോകകപ്പിലെ 'മോശം പ്രകടന'ത്തിനുശേഷമാണ് ഐഎസ്എല്‍ വന്നതോടെ സ്‌റ്റേഡിയത്തിലേക്ക് കാണികള്‍ ഇരച്ചെത്തിയത്. മത്സരം സമനിലയായതോടെ ഇരു ടീമുകള്‍ക്കും ഓരോ പോയിന്റ് ലഭിച്ചു. ഇനി 24ന് കൊച്ചിയില്‍ സാക്ഷാല്‍ സ്റ്റീവ് കൊപ്പലിന്റെ ജംഷഡ്പുര്‍ എഫ്‌സിക്കെതിരായാണ് ബ്ലാസ്‌റ്റേഴ്‌സിന്റെ അടുത്ത മല്‍സരം.
മുന്നേറ്റനിരയില്‍ പന്തുകിട്ടാതെ വലഞ്ഞ ദിമിറ്റര്‍ ബെര്‍ബറ്റോവ് പിന്നീട് മധ്യനിരയിലേക്കിറങ്ങി കളിച്ച കാഴ്ച മതി ബ്ലാസ്‌റ്റേഴ്‌സിന്റെ പ്രകടനത്തെ അളക്കാന്‍. മധ്യനിരയില്‍ കറേജ് പെകൂസന്‍, മിലന്‍ സിങ് എന്നിവരും പ്രതിരോധനിരയും മികച്ച പ്രകടനമാണ് പുറത്തെടുത്തത്. പോസ്റ്റിനു മുന്നില്‍ ഇംഗ്ലിഷ് താരം ബോള്‍ റെച്ചൂബ്കയുടെ പ്രകടനവും ശ്രദ്ധേയമായി. കൊല്‍ക്കത്ത താരം ഹിതേഷ് ശര്‍മയുടെ ഗോളെന്നുറപ്പിച്ച ഷോട്ട് വീണുകിടന്ന് തടുത്തിട്ട റെച്ചൂബ്ക തന്നെയായിരുന്നു ആദ്യപകുതിയില്‍ ബ്ലാസ്‌റ്റേഴ്‌സിന്റെ താരം.
കൊല്‍ക്കത്തയാകട്ടെ പന്തടക്കത്തിലെ മേധാവിത്തം ഫിനിഷിങ്ങിലേക്ക് കൊണ്ടുവരാനാകാതെ വിയര്‍ക്കുന്ന കാഴ്ചയും ആദ്യപകുതിയില്‍ കണ്ടു. മികച്ച ചില അവസരങ്ങള്‍ ലഭിച്ചെങ്കിലും അവയിലൊന്നുപോലും കൊല്‍ക്കത്തയ്ക്ക് ലക്ഷ്യത്തിലെത്തിക്കാനായില്ല. ക്യാപ്റ്റന്‍ സന്ദേശ് ജിങ്കാന്റെ നേതൃത്വത്തിലുള്ള പ്രതിരോധനിരയുടെ പ്രകടനവും ബ്ലാസ്‌റ്റേഴ്‌സിനെ ഗോളില്‍നിന്ന് രക്ഷിച്ചു. സെന്‍ട്രല്‍ ഡിഫന്‍സില്‍ സെര്‍ബിയന്‍ താരം നെമാഞ്ച പെസിച്ചിന്റെ പ്രകടനവും ശ്രദ്ധേയമായി.
https://www.facebook.com/Malayalivartha
