ഓസ്‌ട്രേലിയൻ ഓപ്പൺ വനിതാ സിംഗിൾസ് കിരീടം ഡെൻമാർക്ക് താരം കരോളിൻ വോസ്‍നിയാക്കിയ്ക്ക്. റുമാനിയൻ താരം സിമോണ ഹാലെപ്പിനെ മൂന്നു മണിക്കൂറോളം നീണ്ടുനിന്ന കടുത്ത പോരാട്ടത്തിൽ പരാജയപ്പെടുത്തിയാണ് വോസ്‍നിയാക്കി തന്റെ ആദ്യ ഗ്രാൻഡ്സ്ലാം കിരീടം സ്വന്തമാക്കിയത്. സ്കോർ 7–6, 3-6, 6-4.

കിരീടത്തിന് പിന്നാലെ ലോക ഒന്നാം നമ്പർ പദവിയും വോസ്‍നിയാക്കി സ്വന്തമാക്കി. ഫൈനലിൽ ആദ്യ രണ്ട് സ്ഥാനക്കാർ തമ്മിൽ എട്ടുമുട്ടിയെന്ന പ്രത്യേകതയും ഉണ്ടായിരുന്നു. വോസ്‍നിയാക്കിയുടെ മൂന്നാം ഗ്രാൻഡ്സ്ലാം ഫൈനലായിരുന്നു ഇത്. യുഎസ് ഓപ്പൺ ഫൈനലിൽ രണ്ടു തവണ എത്തിയെങ്കിലും കിരീടം നേടാനായില്ല. ഫൈനലിൽ ശക്തമായ വെല്ലുവിളി ഉയർത്താൻ സിമോണ ഹാലെപ്പിന് കഴിഞ്ഞു.

പുരുഷ വിഭാഗം ഫൈനൽ നാളെ നടക്കും. നിലവിലെ ചാമ്പ്യൻ റോജർ ഫെഡറർ സിലിച്ചിനെ നേരിടും. ഇരുപതാം ഗ്രാൻഡ്സ്ലാം ലക്ഷ്യമാക്കിയാണ് ഫെഡറർ ഇറങ്ങുന്നത്. ടൂർണമെന്റിൽ ഒരു സെറ്റ് പോലും നഷ്ട്ടപ്പെടുത്താതെയാണ് ഫെഡററുടെ വരവ്.