റയല്‍ മാഡ്രിഡിനെ പിടിച്ചുകെട്ടാന്‍ ജര്‍മന്‍ ചാമ്പ്യന്മാര്‍ക്ക് സാധിച്ചില്ല. യുവേഫ ചാമ്പ്യന്‍സ് ലീഗ് രണ്ടാം സെമി ഫൈനലിന്റെ ആദ്യപാദത്തില്‍ സ്വന്തം മൈതാനത്ത് ബയേണ്‍ മ്യൂണിക്കിന് തോല്‍വി നേരിട്ടു. ഒന്നിനെതിരെ രണ്ടു ഗോളുകള്‍ക്കാണ് റ!യലിന്റെ വിജയം. ഒരു ഗോളിന് പിന്നില്‍ നിന്ന ശേഷമാണ് റയലിന്റെ വിജയം.സ്വന്തം തട്ടകമായ അലയന്‍സ് അരീനയില്‍ മികച്ച തുടക്കമാണ് ബയണ്‍ മ്യൂണിക്കിന് ലഭിച്ചത്. 27ാം മിനിറ്റില്‍ ജോഷ്വ കിമ്മിച്ചിലൂടെ ബയണ്‍ ലീഡും നേടി.
ഹാമസ് റോഡ്രിഗസിറ്റെ പാസില്‍ നിന്നായിരുന്നു കിമ്മിച്ചിന്റെ ഗോള്‍. ഇതോടെ ഉണര്‍ന്നു കളിച്ച റയല്‍ 44ാം മിനിറ്റില്‍ മാഴ്‌സെലോ വിയേരയിലൂടെ സമനില പിടിച്ചു. രണ്ടാം പകുതിയില്‍ ഇസ്‌കോ മാറ്റി അസന്‍സിയോയെ ഇറക്കിയ സിദാന്റെ തന്ത്രം ഫലിച്ചു. 56ാം മിനിറ്റില്‍ ബയണിന്റെ നെഞ്ച് പിളര്‍ന്ന് അസന്‍സിയോ റയലിന്റെ ജയം ഉറപ്പിച്ച ഗോള്‍ നേടി. ലീഗില്‍ പകരക്കാരനായി ഇറങ്ങി അസന്‍സിയോ നേടുന്ന മൂന്നാമത്തെ ഗോളായിരുന്നു. 

ചാമ്പ്യന്‍സ് ലീഗില്‍ തുടര്‍ച്ചയായ ആറാം തവണയാണ് ബയണ്‍ മ്യൂണിക്കിനെ റയല്‍ കീഴടക്കുന്നത്. റയല്‍ മാഡ്രിഡിന്റെ 150ാം ചാമ്പ്യന്‍സ് ലീഗ് വിജയമെന്ന പ്രത്യേകതയുമുണ്ട്. ഈ നേട്ടം സ്വന്തമാക്കുന്ന ആദ്യ ക്ലബാണ് റയല്‍ മാഡ്രിഡ്. മെയ് അഞ്ചിന് റയലിന്റെ ഗ്രൗണ്ടായ സാന്റിയാഗൊ ബെര്‍ണാബ്യുവിലാണ് രണ്ടാം പാദ സെമി ഫൈനല്‍. ഇന്ത്യന്‍ സമയം അര്‍ധരാത്രി 12.15നാണ് കിക്ക് ഓഫ്.