ഫൈവ് സ്റ്റാർ ട്രീഹൗസുകൾ
യാത്രകൾ ഇഷ്ടപ്പെടാത്തവർ ആരുണ്ട്? ഓരോ യാത്രയിലും ഭാവിയിൽ ഓർത്തുരസിക്കാനുള്ള എന്തെങ്കിലുമൊക്കെ ഉണ്ടാകും .അതാണ് യാത്രയുടെ വിജയവും .അങ്ങിനെ ഒരനുഭവത്തിനായി രൂപ കല്പന ചെയ്തെടുത്തവയാണ് ട്രീ ഹട്ടുകൾ. ഇവയിലെ താമസം കാലമെത്ര കഴിഞ്ഞാലും ഓർമയിൽ താങ്ങി നിൽക്കും. ചില ട്രീ ഹൗസ് റിസോർട്ടുകൾ പരിചയപ്പെടാം.
1. ട്രീ ഹൗസ് റിസോർട്ട് ജയ്പൂർ - രാജസ്ഥാൻ
കീക്കർ മരങ്ങളുടെ ചില്ലയിലാണ് ജയ്പൂരിലെ ട്രീ ഹൗസ് റിസോർട്ടുകൾ ഉണ്ടാക്കിയിരിക്കുന്നത് .ദി നെസ്റ്റ്സ് എന്നാണ് ഇതിനു നൽകിയിരിക്കുന്ന പേര്. എ സി, വാട്ടർ ഹീറ്റർ, ടി വി, കോഫീ മെയ്ക്കർ, എന്തിനേറെ വൈ ഫൈ സൗകര്യം വരെ ഇവിടെ ഒരുക്കിയിട്ടുണ്ട്. ൫ മുറികളുള്ള ഈ ട്രീ ഹൗസിന്റെ ഓരോ റൂമിനും ഓരോ പക്ഷിയുടെ പേരാണ് കൊടുത്തിട്ടുള്ളത്. ഇവിടെ ഒരു രാത്രി താങ്ങാൻ 7000 രൂപയാണ് വാടക
2. ട്രീ ഹൗസ് ഹൈഡ് എവേ, ബാന്ധവഗഢ്, മധ്യപ്രദേശ്
കടുവകൾക്ക് പേരുകേട്ട ബാന്ധവഗഢ് നാഷണൽ പാർക്കിന് അരിക് ചേർന്ന് 21 ഏക്കറിലായി നിരന്ന് നിൽക്കുന്ന മരക്കൂട്ടങ്ങൾക്ക് മുകളിലായി നിർമ്മിച്ചിരിക്കുന്ന 5 ട്രീ ഹൗസുകൾ നിങ്ങളെ അതിശയിപ്പിക്കാതിരിക്കില്ല. ട്രീ ഹൗസിലെ ബാൽക്കണിയിൽ ഇരിക്കുമ്പോൾ താഴെ മരങ്ങൾക്കിടയിലൂടെ കടുവകളും മാനുകളും വിഹരിക്കുന്നത് കാണാം. തികഞ്ഞ സ്വകാര്യത ഉറപ്പു നൽകുന്ന ഇവിടെ ഒരുദിവസം താമസിക്കുന്നതിന് 16000 രൂപ മുതൽ ആണ് ചെലവ്.
3. ദി മച്ചാൻ, ലോണാവ്ല, മഹാരാഷ്ട്ര
ലോണാവാല എന്നും അറിയപ്പെടുന്ന മഹാരാഷ്ട്രയിലെ ലോണാവ്ലയ്ക്ക് സമീപത്തുള്ള ജംബുലനെയിലാണ് ആഢംബരത്തിനും പരിസ്ഥിതി സൗഹൃദത്തിനും ഒട്ടും കുറവ് വരുത്താത്ത ഈ ട്രീ ഹൗസ് റിസോർട്ട് സ്ഥിതി ചെയ്യുന്നത്.മുംബൈ,പൂനെ എന്നീ സ്ഥലങ്ങളിൽ താമസിക്കുന്നവർ വീക്കൻഡ് ചെലവഴിക്കാൻ തെരഞ്ഞെടുക്കുന്നത് ഈ റിസോർട്ടാണ്. തറ നിരപ്പിൽ നിന്ന് 55 അടി ഉയരത്തിലായാണ് ട്രീ ഹൗസുകൾ നിർമ്മിച്ചിരിക്കുന്നത്.
പക്ഷി നിരീക്ഷണം, ട്രെക്കിംഗ്, സമീപ ഗ്രാമങ്ങളിലേക്കുള്ള സന്ദർശനം തുടങ്ങി നിരവധി കാര്യങ്ങൾ താമസക്കാർക്കായി ഇവിടെ നടത്തുന്നുണ്ട്. ഒരു രാത്രി തങ്ങാൻ 10,000 രൂപയാണ് ഇവിടുത്തെ നിരക്ക്.
4. ദി ഹിമാലയൻ വില്ലേജ്, കാസോൾ, ഹിമാചൽ പ്രദേശ്
ട്രീ ഹൗസ് എന്ന വാക്കിന് പുതിയ അർത്ഥം നൽകുന്നതാണ് ഹിമാചൽ പ്രദേശിലെ കസോളിൽ മലാന ഗ്രാമത്തിന്റെ അതിർത്തിയിൽ ഡിയോഡർ മരങ്ങളുടെ നടുവിൽ നിർമ്മിച്ചിരിക്കുന്ന ദി ഹിമാലയൻ വില്ലേജ് എന്ന റിസോർട്ട്. ഈ ട്രീ ഹൗസുകൾ മരത്തിനു മുകളിലല്ല, തറനിരപ്പിൽ നിന്ന് 60 അടി ഉയരത്തിലായി കാതുകുനിയ ശൈലിയിൽ നിർമ്മിച്ച കോട്ടേജുകൾ ആണ് ഇവ.പതിനായിരം രൂപ മുതലാണ് ഇവിടെ ഒരാൾക്ക് രാത്രി തങ്ങാനുള്ള നിരക്കുകൾ ആരംഭിക്കുന്നത്.
5. മണാലി ട്രീ ഹൗസ് കോട്ടേജ്, ഹിമാചൽ പ്രദേശ്
ഈ ട്രീ ഹൌസ് തികച്ചും വ്യത്യസ്തമാണ്. ഓക്ക് മരത്തിന് മുകളിലുള്ള ട്രീ ഹൗസ് ആണ് ഇവിടുത്തെ പ്രധാന ആകർഷണം. ഇത് കൂടാതെ കോട്ടേജുകൾ, സ്വിസ് ടെന്റ് എന്നിവിടങ്ങളിലും താമസിക്കാൻ അവസരമുണ്ട്. മണാലിയിലെ ഒരു ഫാമിലിയാണ് ഈ റിസോർട്ട് നടത്തുന്നത്. അതിനാൽ തികച്ചും ഗൃഹാന്തരീക്ഷമായിരിക്കും ഇവിടെ. 3000 രൂപ മുതലാണ് ഇവിടെ വാടക ഈടാക്കുന്നത്. താമസം മുൻകൂട്ടി ബുക്ക് ചെയ്യുന്നവർക്ക് മാത്രമായി നിജപ്പെടുത്തിയിരിക്കുന്നു.
https://www.facebook.com/Malayalivartha