നരേന്ദ്രമോദിയും ദേശീയതയും പിന്നെ സ്കോര്പിയയും
ഗുജറാത്ത് മുഖ്യമന്ത്രിയായിരിക്കെ മോദി ഇന്ത്യന് നിര്മിത മഹീന്ദ്ര സ്കോര്പിയോ എസ്യുവി ഉപയോഗിച്ചിരുന്നെങ്കിലും പ്രധാനമന്ത്രി പദത്തില് ആരോഹിക്കപ്പെട്ടപ്പോള് വിദേശ കാറായ ബിഎംഡബ്ല്യൂവിലായി ഔദ്യോഗിക യാത്രകള്. നിരവധി ഇന്ത്യന് നിര്മിത കാറുകള് ഉണ്ടായിരുന്നിട്ടും എന്നും ദേശീയത മുറുകെ പിടിക്കുന്ന മോദി എന്തുകൊണ്ട് വിദേശ നിര്മിത കാര് ഔദ്യോഗികമായി തിരഞ്ഞെടുത്തു എന്നാണു വിമര്ശകരുടെ ചോദ്യം.
പൂര്ണമായും ഇന്ത്യന് നിര്മിത വാഹനമായ സ്കോര്പിയോ ഉപയോഗിച്ചിരുന്നെങ്കില് മോഡിയുടെ സ്വദേശി പ്രതിച്ഛായ കൂട്ടുവാന് ഇതു കൂടുതല് സഹായിച്ചേനെ. കൂടുതല് സുരക്ഷാ സന്നാഹങ്ങളൊരുക്കി സ്കോര്പ്പിയോ കസ്റ്റമൈസ് ചെയ്ത് നല്കാമെന്ന് മഹീന്ദ്ര ഏറ്റിട്ടുകൂടിയും ബിഎംഡബ്ല്യൂ തിരഞ്ഞെടുക്കുന്നു എന്നുള്ള മോദിയുടെ നയം കൂടുതല് വിമര്ശനങ്ങള്ക്ക് വഴിവെച്ചിരുന്നു.
നരേന്ദ്ര മോദി സ്കോര്പിയോയില് തന്നെ തന്റെ യാത്ര തുടരണമെന്നാണ് തങ്ങളാഗ്രഹിക്കുന്നതെന്ന് മഹീന്ദ്ര് ആന്ഡ് മഹീന്ദ്രയുടെ ഓട്ടോമോട്ടീവ് വിഭാഗം തലവന് പവന് ഗോയങ്ക മോദിയോട് ആവശ്യപ്പെട്ടിരുന്നു. മോഡിയുടെ ദേശീയവാദത്തില് വിശ്വാസമര്പ്പിച്ച മഹീന്ദ്രയും കുറച്ചൊക്കെ പ്രതീക്ഷിക്കുകയുമുണ്ടായി.
മഹീന്ദ്രയുടെ സ്കോര്പിയോ ഇന്ത്യന് പ്രധാനമന്ത്രിക്കു സഞ്ചരിക്കാന് പറ്റിയ വാഹനമാണെന്ന് ആനന്ദ് മഹീന്ദ്രയ്ക്കുപോലും അഭിപ്രായമുണ്ടാവില്ല. ഇനി അതിനായി പാകപ്പെടുത്തിയെടുക്കാമെന്നു വെച്ചാല് തന്നെയും വന് തോതിലുള്ള മോഡിഫിക്കേഷന് ആവശ്യമായി വരും.
പ്രായോഗികബുദ്ധി കൂടുതലായി ഉപയോഗിക്കുന്ന മോദി ഇതിനെല്ലാം മെനക്കെടാതെ സുരക്ഷാ ഒടുവില് സന്നാഹങ്ങള് ഒരുക്കിയിട്ടുള്ള ബിഎംഡബ്ല്യു 7 സീരീസ് സെഡാന് തന്റെ ഔദ്യോഗിക വാഹനമായി തിരഞ്ഞെടുത്തു.
പ്രധാനമന്ത്രിയുടെ സുരക്ഷാ ചുമതല പ്രധാനമന്ത്രിക്കല്ല എന്നതിനാല് ഇക്കാര്യത്തില് മോദിക്ക് കാര്യമായൊന്നും ചെയ്യാന് കഴിഞ്ഞില്ല. പ്രധാനമന്ത്രിയുടെ വാഹനത്തിനാവശ്യമായ സുരക്ഷ വാഗ്ദാനം ചെയ്യാന് സ്കോര്പിയോയ്ക്ക് കഴിയില്ലെന്നായിരുന്നു മോദിയുടെ സുരക്ഷാ ചുമതല നിര്വഹിക്കുന്ന സ്പെഷ്യല് പ്രോട്ടക്ഷന് ഗ്രൂപ്പ് (എസ്പിജി) കണ്ടെത്തിയ കാരണം.
അതുകൊണ്ട് മോദിയുടെ ഔദ്യോഗിക യാത്രകള് ബിഎംഡബ്ല്യൂവില് തന്നെ തുടരുമെന്നുള്ള തീരുമാനമായിരുന്നു എസ്പിജി കൈകൊണ്ടത്. ലോകത്തിലെ നിരവധി ദേശീയനേതാക്കള് ബിഎംഡബ്ല്യുവിന്റെ ആമേഡ് വാഹനങ്ങള് ഉപയോഗിക്കുന്നുണ്ട്.
വിശ്വാസ്യത തെളിയിച്ച ബിഎംഡബ്ല്യു വാഹനത്തില് നിന്ന് മഹീന്ദ്ര സ്കോര്പിയോയിലേക്കു മാറുവാന് ചില സങ്കുചിതമായ വൈകാരികതകളല്ലാതെ മറ്റൊരു കാരണവും എസ്പിജിക്ക് കണ്ടെത്താന് കഴിഞ്ഞില്ല.
സ്കോര്പിയോ ഉപയോഗിക്കുന്നതിന് നിരവധി പ്രായോഗിക ബുദ്ധിമുട്ടുകളും എസ്പിജിക്കുണ്ടായിരുന്നു. ഒന്നാമതായി വാഹനത്തിന്റെ ഉയരമാണ് പ്രശ്നം. അക്രമികള്ക്ക് ദൂരെ നിന്നു ടാര്ഗറ്റ് ചെയ്യുവാന് ഇത് സൗകര്യം കൂട്ടുന്നു.
7 സീരീസ് സെഡാന് വളരെ ഉയരം കുറഞ്ഞ വാഹനമാണ്. ഗ്രൗണ്ട് ക്ലിയറന്സ് കുറവായതു കൊണ്ടുതന്നെ ദൂരെ നിന്ന് വാഹനത്തെ ടാര്ഗെറ്റ് ചെയ്യുക എന്നത് അത്ര എളുപ്പമല്ല. മാത്രമല്ല സാഹചര്യത്തിനനുസരിച്ച് പെട്ടെന്ന് ചലിക്കാനുള്ള ശേഷിയും ഗ്രൗണ്ട് ക്ലിയറന്സ് കുറവുള്ള വാഹനങ്ങള്ക്ക് കൂടുതലാണ്. ഈ സാധ്യതകള് കണക്കിലെടുത്തുകൊണ്ടു തന്നെയാണ് എസ്പിജി ബിഎംഡബ്ല്യു സെവന് സീരീസ് സെഡാന് തന്നെ തിരഞ്ഞെടുത്തത്.
https://www.facebook.com/Malayalivartha