തിരുവനന്തപുരം നഗരവും ചുറ്റുമുളള ഗ്രമാങ്ങളുടെ ഹരിതസൗന്ദര്യവും ആസ്വദിക്കാനായി നമുക്ക് തമ്പൂരാന്‍ പാറയിലേക്ക് പോകാം. തിരുവനന്തപുരം ജില്ലയിലെ മാണിക്കല്‍ പഞ്ചായത്തില്‍ സ്ഥിതിചെയ്യുന്ന മദപുരത്താണ് തമ്പുരാന്‍ തമ്പുരാട്ടി പാറ സ്ഥിതി ചെയ്യുന്നത്. തലസ്ഥാന നഗരിയില്‍ അധികമാരും അറിയാത്ത ഈ പ്രദേശം സഞ്ചാരികള്‍ക്കായി അവിസ്മരണീയമായ കാഴ്ചകളാണ് ഒരുക്കിയിരിക്കുന്നത്.

തലയെടുപ്പോടെ ഉയര്‍ന്നു നില്‍ക്കുന്ന തമ്പുരാന്‍ പാറയുടെ നെറുകയില്‍ എപ്പോഴും ശക്തിയായി കാറ്റുവീശിക്കൊണ്ടിരിക്കും. ഈ കാറ്റിന് നമ്മെ പിടിച്ചുകുലുക്കാന്‍ ശേഷിയുണ്ട്. തമ്പുരാന്‍ പാറയിലിരുന്ന് സൂര്യോദയവും അസ്തമയവും കാണുക എന്നത് അവസ്മരണീയമായ അനുഭവമായിരിക്കും. ഒരു ഗുഹാക്ഷേത്രം ഈ പാറയില്‍ സ്ഥിതിചെയ്യുന്നുണ്ട്. ശിവരാത്രിദിനത്തില്‍ ഇവിടെ പൂജ നടക്കാറുണ്ട്.

സ്ത്രീ സൗന്ദര്യം കടഞ്ഞെടുത്തതാണ് തമ്പുരാട്ടി പാറ. ഒരിക്കലും വറ്റാത്ത ഒരുനീരുറവ തമ്പുരാട്ടിപാറയുടെ മധ്യത്തിലായുണ്ട്. കടുത്ത വേനലില്‍ പോലും വറ്റാത്തതാണ് ഈ നീരുറവ.

തമ്പുരാന്‍ തമ്പുരാട്ടി പാറയിലേക്ക് എത്തിച്ചേരാന്‍ ഏറ്റവും അനുയോജ്യമായ സമയം വൈകുന്നേരമാണ്. രാജഭരണകാലത്ത് ഇവിടെ വിശ്രമിക്കാനായി രാജാക്കന്‍മാര്‍ എത്തിയിരുന്നതായി പഴമക്കാര്‍ പറയുന്നു. ഈ മനോഹരമായ പ്രദേശം സിനിമാചിത്രീകരണത്തിനും വളരെ അനുയോജ്യമാണ്.

തിരുവനന്തപുരത്തു നിന്ന് സംസ്ഥാനപാത വഴി 22 കിലോമീറ്ററും നെടുമങ്ങാട് വെമ്പായം റോഡ് വഴി എട്ടു കിലോമീറ്ററും സഞ്ചരിച്ചാല്‍ വെമ്പായം ജംഗ്ഷനില്‍ എത്തിച്ചേരാം. അവിടെ നിന്നു നാലു കിലോമീറ്റര്‍ അകലെയാണ് ഈ പ്രദേശം. ചെങ്കുത്തായ പ്രദേശത്തുകൂടി നടന്നു കയറിയാല്‍ പാറകളുടെ പ്രവേശന കവാടമാണ്. മുത്തിപ്പാറകള്‍ തമ്പുരാന്‍ തമ്പുരാട്ടി പാറകളുടെ അംഗരക്ഷകരായി നിലകൊളളുന്നു. ഇതുവഴിയാണ് തമ്പുരാട്ടി പാറയിലേക്ക് പ്രവേശിക്കുന്നത്.