ആനയാടിക്കുത്ത് വെള്ളച്ചാട്ടം: ടൂറിസ്റ്റ് മാപ്പില് ഇടം പിടിച്ചിട്ടില്ലാത്തതെങ്കിലും പ്രകൃതി മനോഹരമായ വെള്ളച്ചാട്ടം
മുത്തശ്ശിക്കഥകളിലെ മായികലോകം പോലൊരു സ്ഥലം...ദൈവത്തിന്റെ സ്വന്തം നാട്ടില് അധികമാരും അറിയപ്പെടാത്തതും ഇതുവരെ ടൂറിസ്റ്റ് മാപ്പില് ഇടം പിടിക്കാത്തതുമായ പ്രകൃതി മനോഹരമായ വെള്ളച്ചാട്ടം ആനയാടിക്കുത്ത്.ഇടുക്കി ജില്ലയിലെ തൊടുപുഴയില് നിന്നും 22 കിലോമീറ്റര് സഞ്ചരിച്ചാല് ആനയാടിക്കുത്തിലെത്താം.പ്രകൃതി സ്നേഹികളും,ടൂറിസ്റ്റ്കളും കണ്ടിരിക്കേണ്ട ഈ സ്ഥലം തമിഴ്നാട്ടിലെ കുറ്റാലം വെള്ളച്ചാട്ടത്തിന്റെ ചെറിയൊരു പതിപ്പാണ്.
നീന്തലറിയാത്തവര്ക്കു പോലും അപകടം കൂടാതെ കുളിക്കുവാനും, ഫാമിലിയായി പോകുവാനും പറ്റിയ സ്ഥലമാണിത്.ഏത് ആങ്കിളില് നിന്ന് ഫോട്ടോയെടുത്താലും കാണാന് സുന്ദരിയാണ് ആനയാടിക്കുത്ത് വെള്ളച്ചാട്ടം. വെള്ളത്തില് പാതി മുങ്ങി കിടക്കുന്ന ആനയേപ്പോലുള്ള ഒരു കല്ല് ഇവിടുത്തെ രസകരമായ കാഴ്ചയാണ്.
തൊമ്മന്കുത്തിനു സമീപമാണ് ആനയാടികുത്ത് സ്ഥിതി ചെയ്യുന്നതെങ്കിലും തൊമ്മന്കുത്തിന്റെ ഭാഗമല്ല ഈ കാട്ടരുവി. മുണ്ടന്മുടിയുടെ നെറുകയില് നിന്നൊഴുകിയെത്തുന്ന വെള്ളം ആനയാടിയിലെ പാറയില് നൂറുമീറ്ററോളം വിസ്തൃതിയില് ഒഴുകി പാലൊഴുകും പാറയാക്കുകയാണ് ഇവിടം. ഈ വെള്ളച്ചാട്ടത്തിനു അടിയില് നിന്നു കുളിച്ച ശേഷമേ ഇവിടെ എത്തുന്നവര് മടങ്ങാറുള്ളൂ.
തിരക്കുകളില് നിന്നൊഴിഞ്ഞ് പച്ചപ്പിന്റെ നിറവില്,മലകളുടെ സൗന്ദര്യം ആസ്വദിച്ചു പ്രകൃതിയില് അലിഞ്ഞ് ഒരു ദിവസം ചെലവഴിക്കാന് ആഗ്രഹിക്കുന്നവര്ക്ക് പറ്റിയ സ്ഥലമാണ് 'ആനയാടിക്കുത്ത് ' .
വഴി :തൊടുപുഴ കരിമണ്ണൂര് മുളപ്പുറം തേക്കിന്കൂട്ടം വഴി(വലിയ തേക്കുമരങ്ങള്ക്ക് ഇടയിലൂടെയുള്ള മനോഹര യാത്ര ) ചെന്നെത്തുന്നത് തൊമ്മന്കുത്ത് ജംഗ്ഷനിലാണ്. അവിടെ നിന്നും ഇടത്തേയ്ക്ക് പോയി ഒരു വളവിനു ശേഷം വലത്തേയ്ക്കുള്ള വഴിയിലൂടെ കുറച്ചു ദൂരം പോയാല് മനോഹരമായ ആനയാടിക്കുത്തിലെത്താം. കണ്ണും കാതും മനസ്സും തുറന്നു യാത്ര ചെയ്യുമ്പോള് ഏതു ചെറിയ യാത്രയിലും നല്ല നല്ല അനുഭവങ്ങള് നമുക്കുണ്ടാകും. ഓര്ക്കുക... യാത്രക്ക് മനസ്സാണ് പ്രധാനം...
https://www.facebook.com/Malayalivartha