കാരാപ്പുഴയുടെ വശ്യതക്ക് മാറ്റ് കൂട്ടി മഴ!
മഴയില് നിറഞ്ഞ കാരാപ്പുഴയുടെ വശ്യതയിലേക്ക് സഞ്ചാരികളൊഴുകിയെത്തുന്നു. സഞ്ചാരികളെ കാരാപ്പുഴ ഡാമിലേക്ക് ആകര്ഷിക്കുന്നത് വൃഷ്ടി പ്രദേശത്തെ മഴയുടെ സൗന്ദര്യവും ഷട്ടറുകള് തുറന്നതോടെ വെള്ളം പതഞ്ഞൊഴുകുന്ന കാഴ്ചയുമാണ്.
ഡാമിന്റെ മുകളില് നിന്നുള്ള കുന്നുകളുടെയടക്കം ദൂരക്കാഴ്ച കാണാനെത്തുന്നവരും മഴ ചിത്രങ്ങള് പകര്ത്താനെത്തുന്നവരും മഴയെ ആസ്വാദിക്കാനെത്തുന്നവരും എറെയാണ്. കുറേയായി അടഞ്ഞു കിടന്നിരുന്ന ഷട്ടറുകള് കനത്തമഴയെ തുടര്ന്ന് ജലനിരപ്പ് ഉയര്ന്നതോടെയാണ് തുറന്നത്.
ഡാമിന്റെ പുറക് വശത്ത് നീണ്ടു കിടക്കുന്ന വൃഷ്ടി പ്രദേശത്തെ മഴയും സഞ്ചാരികള്ക്ക് എറെ പ്രിയമാണ്. ഡാം സന്ദര്ശിക്കാന് എത്തുന്നവര്ക്ക് മെഗാ ടൂറിസം പദ്ധതിയുടെ ഭാഗമായുള്ള പാര്ക്കിലും സമയം ചെലവഴിക്കാന് കഴിയുന്നതിനാല് സഞ്ചാരികളുടെ എണ്ണത്തില് വര്ധനയുണ്ടായിട്ടുണ്ട്. അവധി ദിവസങ്ങളിലെല്ലാം രണ്ടായിരത്തിലധികം പേര് ഡാമിലേക്ക് സന്ദര്ശനത്തിനായി എത്തുന്നുണ്ട്.
ടൂറിസം പദ്ധതിയുടെ പാര്ക്കില് നിന്നു 550 മീറ്റര് ദൂരം ഡാമിന്റെ മുകളിലൂടെ കല്നടയായിട്ടാണ് ഷട്ടറുകള് തുറന്ന് വിട്ടിരിക്കുന്ന ഭാഗത്തേക്ക് സഞ്ചാരികളെത്തുന്നത്. ഈ വര്ഷം അപൂര്വമായിട്ടാണ് ഷട്ടറുകള് തുറന്നിട്ടുള്ളത്.
ഡാമിന്റെ മുന്വശത്തെ പാലത്തിലൂടെ വെള്ളം കയറുമെന്നതിനാല് അധികൃതരുടെ നിരീക്ഷണത്തിലാണ് ഷട്ടറുകള് ഉയര്ത്തിയിരിക്കുന്നത്. എറെക്കാലത്തിന് ശേഷം ഷട്ടറുകള് ഉയര്ത്തിയതാണ് സഞ്ചാരികളും പ്രദേശവാസികളും കൂടുതലായി ഇവിടേക്ക് എത്താന് കാരണം. ചിത്രങ്ങള് പകര്ത്താനും നിരവധി പേരാണെത്തുന്നത്!
ഡാമിലെ ജലനിരപ്പ് നിശ്ചയിച്ചിട്ടുള്ള പരിധിയിലെത്തുമ്പോള് ഷട്ടറുകള് വീണ്ടും അടയ്ക്കും. സുരക്ഷയ്ക്കായി...ശ്രദ്ധിക്കുക
തുറന്ന ഷട്ടറുകളടെ ഭാഗത്തേക്ക് സഞ്ചാരികളെത്തുന്ന പടികളില് നിറയെ പായല് നിറഞ്ഞതിനാല് അപകട സാധ്യത എറെയാണ്.
നീരൊഴുക്കിന്റെ അടുത്തേക്കെത്തി മൊബൈലിലടക്കം ചിത്രങ്ങള് പകര്ത്തുന്നവരും ശ്രദ്ധിക്കണം.
ഡാമിലെ സുരക്ഷാ ജീവനക്കാരുടെയടക്കം നിര്ദേശങ്ങള് കര്ശനമായി പാലക്കണം.
വിനോദ സഞ്ചാരികള്ക്ക് നില്ക്കാന് അനുവാദമുള്ളതിന് അപ്പുറത്തേക്ക് ചതുപ്പ് നിലങ്ങളടക്കമുള്ളതിനാല് ആ ഭാഗങ്ങളിലേക്ക് പോകാന് പാടില്ല.
ഡാമിന്റെ എല്ലാ ഭാഗങ്ങളിലും വെള്ളത്തില് ഇറങ്ങുന്നതും കര്ശനമായി നിരോധിച്ചിട്ടുണ്ട്.
https://www.facebook.com/Malayalivartha