വയനാട് മഞ്ഞണിഞ്ഞപ്പോള്‍... കേരള ലളിതകലാ അക്കാദമി സംഘടിപ്പിച്ച ഫൊട്ടോഗ്രഫി ക്യാമ്പിനു പേര് 'മഞ്ഞ്'!
കേരള ലളിത കലാ അക്കാദമിയുടെ ഫൊട്ടോഗ്രഫി ക്യാംപില്‍ പങ്കെടുത്തവര്‍ക്ക് ഡിസംബര്‍ കുളിരണിഞ്ഞ വയനാടിനെ ക്യാമറക്കുളളില്‍ മതിവരുവോളം ആവാഹിക്കാന്‍ കഴിഞ്ഞ സന്തോഷമാണ് ലഭിച്ചത്. കേരളത്തിലെ വിവിധ ജില്ലകളില്‍ നിന്ന് തിരഞ്ഞെടുക്കപ്പെട്ട 12 ഫൊട്ടോഗ്രഫര്‍മാരാണ് ഡിസംബര്‍ ആറു മുതല്‍ 10 വരെ കല്‍പറ്റയില്‍ നടന്ന ക്യാംപില്‍ പങ്കെടുത്തത്.
'മഞ്ഞ്' എന്ന പേരിട്ട ക്യാംപിന്റെ ഭാഗമായി വയനാടിന്റെ സൗന്ദര്യം പകര്‍ത്താന്‍ ഫൊട്ടോഗ്രഫര്‍മാര്‍ ചേമ്പ്രയിലും ലക്കിടിയിലും വൈത്തിരിയിലുമെല്ലാമെത്തി. ഇവയില്‍ നിന്ന് തിരഞ്ഞെടുത്ത ചിത്രങ്ങള്‍ ഉള്‍പ്പെടുത്തി കേരള ലളിതകലാ അക്കാദമിയുടെ ആര്‍ട്ട് ഗാലറികളില്‍ പ്രദര്‍ശനവും നടത്തും. ആതിഥേയ ജില്ലയില്‍ നിന്നും മൂന്നു പേര്‍ക്കാണ് ക്യാംപില്‍ പങ്കെടുക്കാന്‍ അവസരം ലഭിച്ചത്.
എടയൂര്‍കുന്ന് സ്വദേശിയായ വി.സി. അരുണ്‍ കാട്ടിക്കുളം ആണ് അതിലൊരാള്‍. നെതര്‍ലാന്‍ഡിലെ ആംസ്റ്റര്‍ഡാമിലെ ട്രോപര്‍ മ്യൂസിയം സംഘടിപ്പിച്ച ഇന്ത്യന്‍ എക്‌സിബിഷനില്‍ ചിത്രങ്ങള്‍ പ്രദര്‍ശിപ്പിച്ചു. ഓക്‌സ്ഫഡ് യൂണിവേഴിസിറ്റിയുടേതടക്കം നിരവധി അന്തര്‍ദേശീയ പ്രസിദ്ധീകരണങ്ങളില്‍ ചിത്രങ്ങള്‍ പ്രദര്‍ശിപ്പിച്ചു. കേരള ലളിതകലാ അക്കാദമിയുടെ ഒട്ടേറെ പ്രദര്‍ശനങ്ങളില്‍ പങ്കെടുത്തു.
മാനന്തവാടി ഫോക്കസ് സ്റ്റുഡിയോ ഉടമയായ ഫ്രാന്‍സിസ് ബേബിയാണ് രണ്ടാമത്തെയാള്‍. 16 തവണ ഫൊട്ടോഗ്രഫി പ്രദര്‍ശനങ്ങള്‍ നടത്തി. കേരള ലളിതകലാ അക്കാദമിയുടെ ആറ് പ്രദര്‍ശനങ്ങളില്‍ പങ്കെടുത്തു. സംസ്ഥാനദേശീയ തലത്തിലേതടക്കം 37 അവാര്‍ഡുകള്‍ നേടി.
മധു എടച്ചന ഒഴക്കോടി സ്വദേശി. ഫ്രീലാന്റസ് ഫൊട്ടോഗ്രഫര്‍. മൂന്നു തവണ കേരള ലളിതകലാ അക്കാദമിയുടെ സെലക്ഷന്‍ ലഭിച്ചു. ഈ വര്‍ഷത്തെ കേരള ലളിതകലാ അക്കാദമിയുടെ അവാര്‍ഡ് ജേതാവ്.
https://www.facebook.com/Malayalivartha
