അഭിമന്യു വധക്കേസിലെ മുഖ്യ സൂത്രധാരന്‍ പിടിയില്‍. ക്യാമ്പസ് ഫ്രണ്ട് സംസ്ഥാന സെക്രട്ടറി മുഹമ്മദ് റിഫയാണ് പിടിയിലായത്. അഭിമമന്യു വധത്തില്‍ റിഫയുടെ പങ്ക് തെളിഞ്ഞതോടെ കോളേജില്‍ നിന്ന് റിഫയെ സസ്‌പെന്‍ഡ് ചെയ്തിരുന്നു. അഭിമന്യുവിനെ വധിക്കാന്‍ ഗൂഢാലോചന നടത്തിയതിലും അക്രമം നടത്തിയ സംഭവത്തിലും പ്രധാനിയാണ് റിഫ.

കണ്ണൂര്‍ സ്വദേശിയും എറണാകുളം ലാ കോളേജില്‍ നിയമവിദ്യാര്‍ത്ഥിയുമായ ഇയാള്‍ ഒളിവിലായിരുന്നു. അഭിമന്യു കൊല്ലപ്പെടുന്നതിന് രണ്ട് ദിവസം മുമ്പ് റിഫ നാട്ടിലേക്ക് പോയിരുന്നു. പിന്നീട് ക്ലാസില്‍ എത്തിയിരുന്നില്ല. ഇത് സംബന്ധിച്ച് സുഹൃക്കള്‍ ആരാഞ്ഞെങ്കിലും ഉടന്‍ മടങ്ങിയെത്തുമെന്നാണ് ഇയാള്‍ അറിയിച്ചത്. എന്നാല്‍, റിഫ പിന്നീട് കാമ്പസില്‍ തിരിച്ചെത്തിയില്ല. സുഹൃത്ത് കാമ്പസ് ഫ്രണ്ട് സംസ്ഥാന സെക്രട്ടറിയെന്ന് അറിഞ്ഞിരുന്നവര്‍ അഭിമന്യു വധക്കേസുമായി ബന്ധപ്പെട്ട ആശങ്ക പങ്കുവച്ചിരുന്നു. എന്നാല്‍, കേസുമായി തനിക്ക് യാതൊരു ബന്ധവുമില്ലെന്ന് റിഫ മറുപടി നല്‍കിയിരുന്നു. അഭിമന്യു വധക്കേസില്‍ പങ്കുണ്ടെന്ന് വ്യക്തമായതോടെ ഇയാളെ ലോ കോളേജില്‍ നിന്നും സസ്‌പെന്‍ഡ് ചെയ്തു. റിഫയ്‌ക്കെതിരെ നാട്ടില്‍ കേസുകള്‍ ഒന്നുമില്ല. കഴിഞ്ഞ കാമ്പസ് തെരഞ്ഞെടുപ്പില്‍ സ്വതന്ത്രനായി മത്സരിച്ച് വിജയിച്ചിരുന്നു.