വിശ്വാസം കോടതി കയറുമ്പോൾ വിശ്വാസികൾ കാത്തിരിക്കുകയാണ്. ശബരി മലയിലെ പ്രായഭേദമന്യേ ഉള്ള സ്ത്രീ പ്രവേശന വിഷയത്തിൽ ഇന്നും സുപ്രീംകോടതിയിൽ വാദം തുടരും. ചരിത്രപരമായ ഒരു തീരുമാനം സുപ്രീംകോടതി എടുക്കുമോ എന്ന കാര്യം കാത്തിരുന്ന് കാണണം.

ശബരിമലയിൽ പ്രായഭേദമന്യേ പ്രവേശനം അനുവദിക്കണമെന്ന് ആവശ്യപ്പെട്ട് നൽകിയ ഹർജികളിൽ സുപ്രീം കോടതി ഭരണഘടനാ ബെഞ്ചിന് മുൻപാകെ ഇന്ന് വാദം തുടരും. ശബരിമല തന്ത്രി ഉൾപ്പെടെ കേസിൽ കക്ഷി ചേർന്നവരുടെ വാദമാണ് ഇന്ന് കോടതിയിൽ നടക്കുക. സ്ത്രീ പ്രവേശനദി എതിർക്കുന്ന ദേവസ്വം ബോർഡിന്റെയും എൻഎസ്എസിന്റേയും വാദങ്ങൾ കോടതിയിൽ പൂർത്തിയായിട്ടുണ്ട്.

പത്തു മുതല്‍ 50 വയസ്സു വരെ പ്രായ പരിതിയിലുള്ള സ്ത്രീകളുടെ സാന്നിധ്യം നൈഷ്ഠിക ബ്രഹ്മചാരിയായ ശബരിമല അയ്യപ്പന്‍ താല്‍പര്യപ്പെടുന്നില്ലെന്ന് ഇടപെടല്‍ ഹര്‍ജിക്കാരായ എന്‍എസ്എസിന് വേണ്ടി സുപ്രീം കോടതിയില്‍ വാദം ഉന്നയിച്ചത്. ഭക്തി മാത്രമല്ല, എന്തിനോടുള്ള ഭക്തിയെന്നതും പ്രധാനമാണ്. അതുകൊണ്ടുതന്നെ ബ്രഹ്മചാരീ സങ്കല്‍പം പ്രധാനമാണെന്ന് എന്‍എസ്എസിനുവേണ്ടി കെ.പരാശരന്‍ വാദിച്ചു. ദേവസ്വം ബോർഡ് നിലപാടിനെ പിന്തുണച്ചാണ് എൻഎൻഎസിന്റെ വാദം. എന്നാൽ ആരാധന സ്വാതന്ത്രം ഉറപ്പാക്കുന്ന ഭരണ ഘടന വ്യവസ്ഥയിൽ നിന്ന് സ്ത്രീകളെ എങ്ങനെ ഒഴിവാക്കും എന്നാണ് കോടതിയുടെ ചോദ്യം. ആരാധനാലയങ്ങൾ എല്ലാവര്ക്കും തുറന്നുകൊടുക്കാൻ സംസ്ഥാനങ്ങൾക്ക് നിയമ നിർമാണം നടത്താൻ അധികാരമുണ്ടെന്നും ജസ്റ്റിസ് നരിമാൻ ചൂണ്ടിക്കാട്ടി. പക്ഷെ ഭരണഘടനയുടെ ഇരുപത്തി അഞ്ചാം അനുച്ഛേദത്തിൽ പിന്നാക്ക വിഭാഗക്കാരുടെ പ്രവേശനം മാത്രമാണ് പ്രതിപാദിക്കുന്നതെന്ന് എൻഎൻഎസ് വിശദീകരിച്ചു. അതേസമയം ശബരിമല തന്ത്രി ഉൾപ്പെടെയുള്ളവരുടെ വാദമാണ് ഇന്ന് കോടതി കേൾക്കുക.