സംസ്ഥാനത്ത് കനത്ത മഴ തുടരുന്നു.... പമ്പയില് ജലനിരപ്പ് ഉയര്ന്നു, പലയിടങ്ങളിലും മണ്ണിടിച്ചില് കാരണം ഗതാഗതം തടസ്സപ്പെട്ടു, 23 വരെ ശക്തമായ കാറ്റും മഴയ്ക്കും സാധ്യതയുണ്ടെന്ന് കാലാവസ്ഥാ വകുപ്പിന്റെ മുന്നറിയിപ്പ്
സംസ്ഥാനത്ത് കനത്ത മഴ തുടരുന്നു. പലയിടത്തും നാശനഷ്ടം. മഴക്കെടുതിയില് മൂന്നുപേര് മരിച്ചപ്പോള് നാലുപേരെ കാണാതായി. 23 വരെ കനത്തമഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പുനല്കി. കാറ്റും ശക്തമാവും. ചിലയിടങ്ങളില് അതിതീവ്രമഴയ്ക്ക് സാധ്യതയുള്ളതിനാല് ജാഗ്രത പാലിക്കണമെന്ന് മുന്നറിയിപ്പുണ്ട്. മത്സ്യത്തൊഴിലാളികള് കടലില്പ്പോകരുത്. കണ്ണൂര്, പത്തനംതിട്ട, കൊല്ലം ജില്ലകളിലാണ് ഓരോരുത്തര്വീതം മരിച്ചത്. തലശ്ശേരിയില് വിദ്യാര്ഥിയായ ചിറക്കര മോറക്കുന്ന് മോറാല്ക്കാവിനു സമീപം സീനോത്ത് മനത്താനത്ത് ബദറുല് അദ്നാന്(17) കുളത്തില് മുങ്ങിമരിച്ചു.
പത്തനംതിട്ടയില് മീന് പിടിക്കാന് പോയ തിരുവല്ല വള്ളംകുളം നന്നൂര് സ്വദേശി ടി.വി. കോശി(54) മണിമലയാറ്റില് വീണുമരിച്ചു. കൊല്ലത്ത് കാറ്റില് തെങ്ങുവീണ് പനയം ചോനംചിറ സ്വദേശി കുന്നില്തൊടിയില് ദിലീപ്കുമാര് (54) മരിച്ചു. കോട്ടയം കിടങ്ങൂര് കാവാലിപ്പുഴ ഭാഗത്ത് മീനച്ചിലാറ്റില് ഒഴുകിവന്ന തടി പിടിക്കാനിറങ്ങിയ ഒരാളെ ഒഴുക്കില്പ്പെട്ടു കാണാതായി. കൊല്ലം നീണ്ടകരയില് മീന്പിടിക്കാന് പോയ വള്ളം കാറ്റില്പ്പെട്ടുതകര്ന്ന് തമിഴ്നാട് സ്വദേശികളായ മൂന്നുപേരെ കാണാതായി. വിഴിഞ്ഞം തീരത്തുനിന്നു ബുധനാഴ്ച മീന്പിടിക്കാന് പോയ നാലു മത്സ്യത്തൊഴിലാളികളെ വെള്ളിയാഴ്ചയും കണ്ടെത്താനായില്ല.
ഇന്ന് കാസര്കോട്, ഞായറാഴ്ച കോഴിക്കോട്, വയനാട്, തിങ്കളാഴ്ച ഇടുക്കി, കോഴിക്കോട്, വയനാട്. അതിതീവ്രമഴയാണ് ഈ ദിവസങ്ങളില് ഇവിടെ പ്രതീക്ഷിക്കുന്നത്.
മഴ കനത്തതോടെ കല്ലാര്കുട്ടി, പാംബ്ല, ഭൂതത്താന്കെട്ട്, മലങ്കര അണക്കെട്ടുകള് തുറന്നു. കല്ലാര്കുട്ടി അണക്കെട്ടിന്റെ ഷട്ടര് 10 സെന്റീമീറ്റര് ഉയര്ത്തി. 10 ക്യുമെക്സ് വെള്ളമാണ് സെക്കന്ഡില് പുറത്തേക്കൊഴുക്കുന്നത്. പാംബ്ല അണക്കെട്ടിന്റെ ഒരു ഷട്ടര് തുറന്ന് സെക്കന്ഡില് 15 ക്യുമെക്സ് വെള്ളമാണ് പുറത്തേക്കൊഴുക്കുന്നത്. ഭൂതത്താന്കെട്ട് ഡാമിന്റെ ഒന്പതുഷട്ടറുകള് തുറന്നു. മലങ്കര ഡാമിന്റെ രണ്ടു ഷട്ടറുകള് 30 സെന്റീമീറ്റര് ഉയര്ത്തി. വലിയ അണക്കെട്ടുകളെ സംബന്ധിച്ച് ആശങ്ക വേണ്ടെന്നു വൈദ്യുതിബോര്ഡ് ചെയര്മാന് എന്.എസ്. പിള്ള പറഞ്ഞു. ഇവയില് ജലനിരപ്പ് കുറവാണ്. ഇടുക്കി അണക്കെട്ടിലെ ജലനിരപ്പ് വ്യാഴാഴ്ചത്തെക്കാള് 0.78 അടി വര്ധിച്ച് 2304.4 അടിയിലെത്തി. കഴിഞ്ഞവര്ഷം 2380.42 അടിയായിരുന്നു. 76.02 അടി വെള്ളം കഴിഞ്ഞ വര്ഷത്തെക്കാള് കുറവാണിപ്പോള്.
ഇന്ന് രാത്രി പതിനൊന്നരവരെ പൊഴിയൂര്മുതല് കാസര്കോടുവരെയുള്ള കേരളതീരത്ത് 2.9 മുതല് 3.3 മീറ്റര്വരെ ഉയരത്തില് തിരമാലകള് ഉണ്ടാകാന് സാധ്യതയുണ്ടെന്ന് ദേശീയ സമുദ്രസ്ഥിതിപഠന കേന്ദ്രം അറിയിച്ചു.
https://www.facebook.com/Malayalivartha