പൊതുമുതല് നശിപ്പിച്ച കേസില് അറസ്റ്റിലായ കൈനകരി പഞ്ചായത്തംഗം ബി.കെ.വിനോദിനോട് സി പി ഐ എം പ്രാദേശിക നേതൃത്വം വ്യക്തി വിരോധം തീര്ക്കുകയാണ് എന്ന് ആരോപണം സിപിഎം പ്രാദേശിക നേതൃത്വം തങ്ങളെ വേട്ടയാടുന്നുവെന്നും വിനോദിന്റെ കുടുംബം
പൊതുമുതല് നശിപ്പിച്ച കേസില് അറസ്റ്റിലായ കൈനകരി പഞ്ചായത്തംഗം ബി.കെ.വിനോദിനോട് സി പി ഐ എം പ്രാദേശിക നേതൃത്വം വ്യക്തി വിരോധം തീര്ക്കുകയാണ് എന്ന് ആരോപണം. ആലപ്പുഴയിലെ കൈനകരി പഞ്ചായത്തിലെ മൂന്നാം വാര്ഡ് അംഗമായ ബി കെ വിനോദിനെ പഞ്ചായത്ത് സെക്രട്ടറിയുടെ പരാതി പ്രകാരം പൊതുമുതല് നശിപ്പിച്ചെന്ന കുറ്റം ചുമത്തിയാണ് പൊലീസ് കേസെടുത്തത്.കുട്ടനാട് കൈനകരിയില് പാലുകാരന് തോട്ടിലെ ചാക്കോകളം പാലം പൊളിച്ചു പുതിയ പാലം പണിതു എന്നതാണ് വിനോദിന് നേരെയുള്ള ആരോപണം.
നാടിന്റെ വികസന പ്രവര്ത്തനത്തിന് വേണ്ടി നിലകൊണ്ടതിലുള്ള സിപിഎം വേട്ടയാടലിന്റെ പ്രതിഫലനമാണ് ഈ കേസ് എന്നും തളരാതെ ഒപ്പം നില്ക്കുമെന്നും വിനോദിന്റെ ഭാര്യ ധന്യ പറഞ്ഞു.വീട്ടില് വിനോദിന്റെ സഹോദരിയും മക്കളും ഭാര്യയുമാണുള്ളത് .വിനോദ് ജയിലില് ആയതിനു ശേഷം നാട്ടുകാരുടെയും വികസന സമിതിയുടെയും സഹകരണമാണ് മുന്നോട്ടു പോകാന് സഹായകമാകുന്നത് എന്നും ധന്യ പറഞ്ഞു.സി പി ഐ എം പ്രാദേശിക നേതൃത്വത്തിനെതിരെ ഗുരുതരമായ ആരോപണങ്ങളാണ് വിനോദിന്റെ ഭാര്യ മുന്നോട്ടു വെയ്ക്കുന്നത്.
എന് സി പി നേതാവ് തോമസ് ചാണ്ടി മന്ത്രി സ്ഥാനം രാജിവെയ്ക്കാന് കാരണമായ കായല് കയ്യേറ്റത്തിന്റെ തെളിവുകള് പുറത്തുകൊണ്ടു വന്നത് വിനോദാണ്.അന്ന് മുതല് നിരവധി വധ ഭീഷണികളടക്കം സിപിഎം പ്രാദേശിക നേതൃത്വത്തില് നിന്നും വിനോദിന് ലഭിച്ചിട്ടുണ്ട് എന്നും ധന്യ മലയാളി വാര്ത്തയോട് പറഞ്ഞു.പലരുടെയും ആക്ഷേപങ്ങളും കുത്തുവാക്കുകളും കേള്ക്കുമ്പോള് ഇനി സ്കൂളില് പോകുന്നില്ല എന്ന് പറഞ്ഞു കരയുകയാണ് മക്കള്.ഇളയ കുഞ്ഞുങ്ങളോട് അച്ഛന് ആശുപത്രിയിലാണ് എന്ന് പറഞ്ഞു ആശ്വസിപ്പിക്കുകയാണ് ഇപ്പോള് ചെയ്യുന്നത്.
അപകടാവസ്ഥയിലായതിനെ തുടര്ന്ന് ഗതാഗതം മുടങ്ങിക്കിടന്ന, കുട്ടമംഗലത്തെ ചാക്കോക്കളം പാലം നാട്ടുകാര്ക്കൊപ്പം ചേര്ന്ന് വിനോദ് പൊളിച്ചു പണിയുകയായിരുന്നു. ഈ സംഭവത്തിലാണ് വിനോദിനെ പുളിങ്കുന്ന് പൊലീസ് അറസ്റ്റ് ചെയ്തത്. രണ്ടടി ഉയരമുള്ള പാലത്തിനുപകരം ആറടി ഉയരത്തില് പുതിയ ഇരുമ്പുപാലം നിര്മിച്ചിരുന്നു. കേസില് രതീഷ് എന്ന പ്രദേശവാസിയും വിനോദിനൊപ്പം റിമാന്ഡിലാണ്.
കൈനകരിയിലെ ജനങ്ങള് വിനോദിനും രതീഷിനുംവേണ്ടി ശനിയാഴ്ച കൈനകരി പഞ്ചായത്ത് ഓഫീസിന് സമീപം ധര്ണ നടത്തിയിരുന്നു.. മൂന്നാം വാര്ഡിലെ സ്ത്രീകളടക്കമുള്ളവര് ധര്ണയില് പങ്കെടുത്തു.
വികസന മുരടിപ്പില് കിടന്നിരുന്ന പ്രദേശത്തെ വികസനത്തിന്റെ കുതിപ്പിലേക്കു നയിച്ചത് വിനോദാണ്.കാലങ്ങളായി സി പിഎം ഭരിക്കുന്ന പ്രദേശത്തു ഒരു വികസനവും നടക്കാതെ ജനങ്ങള് ദുരിതപൂര്ണമായ ജീവിതം നയിക്കുന്നതില് ഉള്ള അസന്തുഷ്ടതയാണ് കൈനകരി വികസന സമിതിയുടെ രൂപീകരണത്തിലേക്ക് നയിച്ചത്. അതിനു മുന് നിരയില് പ്രവര്ത്തിക്കുന്ന വ്യക്തി എന്ന നിലയില് വിനോദിന്റെ പ്രവര്ത്തനങ്ങളോടുള്ള അസഹിഷ്ണുതയാണ് സി പി ഐ എം ന്റെ ശത്രുതാപരമായ സമീപനത്തിനു കാരണം എന്ന് കൈനകരി വികസന സമിതി ചെയര്മാന് ബിജു കുമാര് മലയാളി വാര്ത്തയോട് പറഞ്ഞു.വിനോദിന്റെ ജാമ്യാപേക്ഷ വീണ്ടും നാളെ കോടതി പരിഗണിക്കുകയാണ്.ഇനിയും ജാമ്യം കിട്ടിയില്ലെങ്കില് ഹൈക്കോടതിയെ സമീപിക്കാനാണ് വികസന സമിതിയുടെ തീരുമാനം എന്നും ബിജു കുമാര് പറഞ്ഞു.
https://www.facebook.com/Malayalivartha