31 ന് നിയമസഭ തുടങ്ങാനിരിക്കെ ഗവര്‍ണര്‍ ആരിഫ് മുഹമ്മദ് ഖാനെ സംസ്ഥാന സര്‍ക്കാര്‍ വെള്ളം കുടിപ്പിക്കുമോ? സര്‍ക്കാര്‍ എഴുതി കൊടുക്കുന്ന കേന്ദ്ര വിരുദ്ധ പ്രസ്താവനകള്‍ തൊണ്ട തൊടാതെ അദ്ദേഹം വായിക്കില്ലെന്ന് അറിയാവുന്ന സര്‍ക്കാര്‍ അത്തരം പരാമര്‍ശങ്ങള്‍ കുത്തിനിറച്ച് അദ്ദേഹത്തെ പ്രതിസന്ധിയിലാക്കുമെന്നാണ് സൂചന.

ബജറ്റ് പ്രഖ്യാപനത്തിന്റെ ആമുഖമായിട്ടാണ് ഗവര്‍ണറുടെ നയപ്രഖ്യാപനം നടക്കേണ്ടത്. സ്വാഭാവികമായും സംസ്ഥാന സര്‍ക്കാര്‍ നയപ്രഖ്യാപനത്തില്‍ കേന്ദ്ര സര്‍ക്കാരിനെതിരെ ആഞ്ഞടിക്കുമെന്ന് ഉറപ്പാണ്. പൗരത്വ ഭേദഗതിക്കെതിരെ നിയമസഭ പാസാക്കിയ പ്രമേയത്തെ പോലും തള്ളി പറഞ്ഞ ഗവര്‍ണര്‍ അത്തരം പരാമര്‍ശങ്ങള്‍ നയ പ്രഖ്യാപനത്തില്‍ ഉണ്ടെങ്കില്‍ അത് വായിക്കാന്‍ യാതൊരു സാധ്യതയുമില്ല. ഗവര്‍ണര്‍ നയപ്രഖ്യാപനം വായിക്കാതിരുന്നാല്‍ അത് മുതലാക്കാനായിരിക്കും പിണറായി സര്‍ക്കാര്‍ ശ്രമിക്കുക. വീണിടം വിദ്യയാക്കുന്ന തന്ത്രത്തില്‍ മാസ്റ്റര്‍ ബിരുദമുള്ള കേരള സര്‍ക്കാര്‍ ഇതിലൂടെ പ്രബല സമുദായങ്ങളെയും പുരോഗമന ആശയക്കാരായ കേരള ജനതയെയും ഒപ്പം നിര്‍ത്തും.

നയപ്രഖ്യാപനത്തില്‍ സംസ്ഥാന സര്‍ക്കാര്‍ എഴുതാത്ത കാര്യങ്ങള്‍ ഗവര്‍ണര്‍ പറയാന്‍ തുനിഞ്ഞാല്‍ അതൊരു പുതിയ കീഴ് വഴക്കത്തിന് തുടക്കം കുറിക്കും.

മന്ത്രിസഭയാണ് നയപ്രഖ്യാപനം തയ്യാറാക്കുന്നത്. ഇത് ഗവര്‍ണര്‍ക്ക് അയച്ചു കൊടുക്കും. ഗവര്‍ണര്‍ക്ക് ചില പരാമര്‍ശങ്ങള്‍ യോജിക്കാത്തതായി തോനുകയാണെങ്കില്‍ അത് ഒഴിവാക്കി നല്‍കാന്‍ ആവശ്യപ്പെടാം. അല്ലെങ്കില്‍ പ്രസ്തുത ഭാഗം അദ്ദേഹത്തിന് വായിക്കാതെ ഒഴിവാക്കാം. വിട്ടു കളഞ്ഞാല്‍ അത് വാര്‍ത്തയാകും.ഒഴിവാക്കാന്‍ ആവശ്യപ്പെട്ടാലും വാര്‍ത്തയാകും.

സ്വാഭാവികമായും ഗവര്‍ണര്‍ സഭയിലെത്തുമ്പോള്‍ പ്രതിഷേധം ഉറപ്പാണ്. ഭരണകക്ഷി അംഗങ്ങള്‍ പ്രതിഷേധിച്ചില്ലെങ്കിലും പ്രതിപക്ഷം പ്രതിഷേധിക്കും. അത് ഒച്ചപ്പാടിന് ഇടയാക്കാം. ഭരണപക്ഷം പ്രതിഷേധിച്ചാല്‍ സംഗതി കൂടുതല്‍ ഗൗരവതരമാകും. നയപ്രഖ്യാപനമായതിനാല്‍ ഭരണകക്ഷി അതിന് തയ്യാറാകാനുള്ള സാധ്യത കുറവാണ്.

കേന്ദ്ര സര്‍ക്കാരിനെതിരായ പരാമര്‍ശങ്ങള്‍ പഴയ ഗവര്‍ണര്‍ ജസ്റ്റിസ് പി സദാശിവം ഒഴിവാക്കിയത് വിവാദമായിരുന്നു. ഗവര്‍ണര്‍ വായിച്ചാലും ഇല്ലെങ്കിലും അച്ചടിച്ച പുസ്തകത്തില്‍ സര്‍ക്കാര്‍ നിശ്ചിക്കുന്ന എല്ലാ പരാമര്‍ശങ്ങളുമുണ്ടാകും.

നയപ്രഖ്യാപനത്തിലെ ചില ഭാഗങ്ങള്‍ രാജ്യത്ത് ആദ്യമായി ഒഴിവാക്കിയത് ബംഗാള്‍ ഗവര്‍ണറായിരുന്ന ധര്‍മ്മ വീരയാണ്. 1969 മാര്‍ച്ചിലായിരുന്നു സംഭവം.അജയ് മുഖര്‍ജിയായിരുന്നു അന്ന് മുഖ്യമന്ത്രി. ജ്യോതി ബാസുവായിരുന്നു അന്ന് ഉപ മുഖ്യമന്ത്രി.ഗവര്‍ണറുടെ നടപടി ഇടതു പാര്‍ട്ടികള്‍ ചോദ്യം ചെയ്തു.

1982 ജനുവരി 30 ന് കെ. കരുണാകരന്‍ സര്‍ക്കാരിന്റെ കാലത്ത് ഗവര്‍ണര്‍ ജ്യോതി വെങ്കിടാചലം പ്രസംഗം പൂര്‍ത്തിയാക്കാതെ നിയമസഭ വിട്ടു. എ. കെ. ആന്റണി സര്‍ക്കാരിന്റെ കാലത്ത് ഗവര്‍ണര്‍ സുഖ് ദേവ് സിംഗ് കാംഗ് മുമ്പുണ്ടായിരുന്ന നായനാര്‍ സര്‍ക്കാരിന് എതിരെയുള്ള ഖണ്ഡിക വായിക്കാതെ വിട്ടു കളഞ്ഞു. കര്‍ണാടക ഗവര്‍ണര്‍ എച്ച്. ആര്‍. ഭരദ്വാജ് രണ്ട് തവണ നാലു ഖണ്ഡിക ഒഴിവാക്കി. ത്രിപുര ഗവര്‍ണര്‍ തഥാഗത റോയ് നയപ്രഖ്യാപനത്തില്‍ നിന്നും കേന്ദ്ര സര്‍ക്കാരിന് എതിരായ വിമര്‍ശനങ്ങള്‍ ഒഴിവാക്കിയതും വിവാദമായിരുന്നു.

ഗവര്‍ണറും സര്‍ക്കാരും തമ്മിലുള്ള ഉടക്ക് തുടരുന്ന സാഹചര്യത്തില്‍ ജനുവരി 31 നായി കേരളം കാത്തിരിക്കുകയാണ്. തനിക്ക് മുകളില്‍ റസിഡന്റ് വേണ്ടെന്ന മുഖ്യമന്ത്രിയുടെ പ്രസ്താവന ഗവര്‍ണറെ ശരിക്കും ചൊടിപ്പിച്ചിട്ടുണ്ട് .