അതെങ്ങാനും സംഭവിക്കുമോ... മരുന്നിനുണ്ടായിരുന്ന ഏക ബിജെപി എംഎല്എ പ്രവര്ത്തിക്കുന്നത് സിപിഎമ്മിന് വേണ്ടിയോ? അടയ്ക്കയായിരുന്നെങ്കില് മടിയില് വയ്ക്കാമായിരുന്നു; അടയ്ക്കാമരമായ ഒ. രാജഗോപാലിനെതിരെ ഒന്നും ചെയ്യാനാകാതെ ബിജെപി നേതാക്കള്
ബിജെപിയുടെ ഏക എംഎല്എ ആയ ഒ. രാജഗോപാലിന്റെ പ്രവര്ത്തനങ്ങള് ബിജെപിക്ക് ശരിക്കും തലവേദനയാകുകയാണ്. സിപിഎമ്മിന്റെ സ്വരമായി അണികളുടെ സ്വന്തം രാജേട്ടന് മാറുന്നില്ലേ എന്ന ആശങ്ക പലര്ക്കുമുണ്ട്. ചാനല് ചര്ച്ചകളില് പോലും സിപിഎം നേതാക്കള് ഒ. രാജഗോപാലിന്റെ വാക്കുകള് കടമെടുത്താണ് ബിജെപിക്കാരെ ആക്രമിക്കുന്നത്. എന്നാല് അതോടെ നിശബ്ദരാകുന്ന ബിജെപിക്കാരെയാണ് കാണുന്നത്. അടയ്ക്കയായിരുന്നെങ്കില് മടിയില് വയ്ക്കാമായിരുന്നു എന്നാല് അടയ്ക്കാമരമായ ഒ. രാജഗോപാലിനെതിരെ ഒന്നും ചെയ്യാനാകാതെ പ്രവര്ത്തകരും വലയുകയാണ്.
കേന്ദ്ര സര്ക്കാര് പാസാക്കിയ പൗരത്വഭേദഗതി നിയമത്തിനെതിരേയുള്ള പ്രമേയം നിയമസഭ ഏകകണ്ഠമായാണ് പാസാക്കിയത്. ബിജെപി എംഎല്എ ആയ ഒ. രാജഗോപാല് അനുകൂലിച്ചതോടെയാണ് ഇങ്ങനെ സംഭവിച്ചത്. ഒരാള് എതിര്ത്തിട്ട് എന്ത് ചെയ്യാനാണെന്നാണ് രാജഗോപാല് ചോദിക്കുന്നത്. ആ ചോദ്യത്തിനുള്ള ഉത്തരമാണ് ഗവര്ണര് ആരിഫ് മുഹമ്മദ് ഖാന് ചെയ്തത്. ഗവര്ണര് എന്ന ഒരൊറ്റ വ്യക്തിയുടെ എതിര്പ്പാണ് ഭരണപക്ഷത്തേയും പ്രതിപക്ഷത്തേയും വെള്ളം കുടുപ്പിക്കുന്നത്. അത് കണ്ട് പഠിക്കാതെ വീണ്ടും ബിജെപിക്കാരെ നിശബ്ദരാക്കി ഗവര്ണര്ക്കെതിരെ വന്നിരിക്കുകയാണ് ഒ. രാജഗോപാല്.
സ്വന്തം അഭിപ്രായം പുറത്തുവിളിച്ചു പറഞ്ഞു നടക്കുന്നതിനു പകരം ഗവര്ണര് സംയമനം പാലിക്കണമെന്നാണ് ഒ രാജഗോപാല് പറഞ്ഞത്. സംസ്ഥാനസര്ക്കാരും ഗവര്ണറും തമ്മിലുള്ള തര്ക്കം രമ്യമായി പരിഹരിക്കണം. ചട്ടങ്ങള് അനുസരിച്ച് തന്റെ ഭാഗമാണ് ശരിയെന്നാണ് ഗവര്ണറുടെ അഭിപ്രായം. അതിന്റെ ശരിതെറ്റുകളിലേക്ക് കടക്കുന്നില്ല.
സര്ക്കാരും ഗവര്ണറും ഒന്നിച്ചുള്ള മാതൃകാപരമായ ഭരണസംവിധാനം നിലനില്ക്കണം. സ്വകാര്യ ചര്ച്ചകളിലൂടെ തര്ക്കം പരിഹരിക്കുന്നതാണ് ഉചിതം. ഒരോ പദവിക്കും എന്തൊക്കെ അധികാരമുണ്ടെന്ന് ഭരണഘടന പ്രതിപാദിച്ചിട്ടുണ്ട്. തര്ക്കങ്ങള് ഉണ്ടാകുമ്പോള് അത് പരിഹരിക്കാനും മാര്ഗമുണ്ട്. അതിനുപകരം പരസ്പരം വെല്ലുവിളിക്കുന്നതും പരസ്യ പ്രസ്താവനകള് നടത്തുന്നതും ശരിയല്ല എന്നും അദ്ദേഹം പറഞ്ഞു.
പരസ്പരം കുറ്റംപറയുന്ന ഏര്പ്പാട് നിര്ഭാഗ്യകരമാണെന്നും അതിനെ അനുകൂലിക്കുന്നില്ലെന്നും അദ്ദേഹം വ്യക്തമാക്കി. ഗവര്ണറും മുഖ്യമന്ത്രിയും തമ്മില് അഭിപ്രായ വ്യത്യാസങ്ങളുണ്ടാകാം. എന്നാല് ഇരുവരും പരസ്യമായി പരസ്പരം പോരടിക്കരുത്. ഇത് ആശ്വാസ്യകരമല്ല. പ്രശ്നങ്ങളെല്ലാം പരിഹരിക്കാനുള്ള മാര്ഗങ്ങളുണ്ട്. ഇതൊക്കെ ഒരു ചായ കുടിച്ച് സംസാരിച്ചാല് തീര്ക്കാവുന്നതാണ് രാജഗോപാല് വിശദീകരിച്ചു.
മുഖ്യമന്ത്രിയുമായി ഏറ്റുമുട്ടലിന് അല്ലല്ലോ ഗവര്ണറെ നിയമിക്കുന്നതെന്നും രാജഗോപാല് ചോദിച്ചു. ഗവര്ണറുടെയും മുഖ്യമന്ത്രിയുടേയും ഭാഗത്തുനിന്ന് തെറ്റുണ്ടായി. ജനങ്ങളുടെ മുന്നില് പരസ്പരം പോരടിക്കുന്നത് ജനാധിപത്യ വ്യവസ്ഥയ്ക്ക് ശരിയല്ല. അത് ആശാസ്യകരവുമല്ല.
ഭരണഘടന അനുസരിച്ച് ഗവര്ണറാണ് സര്ക്കാരിന്റെ തലപ്പത്തെന്നും ഒ.രാജഗോപാല് പറഞ്ഞു. സര്ക്കാര് ഗവര്ണറുടേതാണ്, എന്നാല് രാഷ്ട്രീയപരമായി നോക്കുമ്പോള് ജനങ്ങളാല് തിരഞ്ഞെടുക്കപ്പെട്ടവര്ക്കാണ് കൂടുതല് അധികാരമെന്നും അദ്ദേഹം വ്യക്തമാക്കി.
അതേസമയം ഗവര്ണര് ഉറച്ച നിലപാടിലേക്ക് നീങ്ങുന്നതിന്റെ സൂചനയാണ് കാണുന്നത്. സര്ക്കാരുകളോട് ഓരോകാലത്തും പല സംഭവങ്ങളുടെയും പേരില് ഗവര്ണര്മാര് വിശദീകരണം തേടാറുണ്ടെങ്കിലും ഇത്ര കടുപ്പിച്ചും ഗുരുതര സാഹചര്യത്തിലും സംസ്ഥാനത്ത് ഇതാദ്യമാണ് ഇങ്ങനെയൊരു സഭവമുണ്ടാകുന്നത്. രാജ്ഭവനും സര്ക്കാരും നേര്ക്കുനേര് പോരാടുന്ന ഘട്ടമാണ് ഇപ്പോഴത്തേത്. അതുകൊണ്ടുതന്നെ ഇത്തവണ ഗവര്ണറുടെ വിശദീകരണം തേടലിനു ഗൗരവമേറെയാണ്. ഈയവസരിത്തിലുള്ള രാജഗോപാലിന്റെ പ്രതികരണമാണ് ബിജെപിക്കാരെ ഞെട്ടിപ്പിക്കുന്നത്.
https://www.facebook.com/Malayalivartha