ഇത്തവണത്തെ റിപ്പബ്ലിക് ദിനത്തിന് വലിയ പ്രത്യേകതയുണ്ടായിരുന്നു. സംസ്ഥാനത്ത് സിപിഎമ്മിന്റെ നേതൃത്വത്തില്‍ കാസര്‍ഗോഡ് മുതല്‍ പാറശാലവരെ മനുഷ്യ മഹാ ശൃംഖല സംഘടിപ്പിച്ചു. നേതൃത്വം നല്‍കിയത് പാര്‍ട്ടിയാണെങ്കിലും മുഖ്യമന്ത്രി ഉള്‍പ്പെടെ എല്ലാ മന്ത്രിമാരും പങ്കെടുക്കുകയും ചെയ്തു. രണ്ട് ദിവസം കഴിഞ്ഞപ്പോഴാണറിയുന്നത് റിപ്പബ്ലിക് ദിനപരിപാടിയില്‍ മന്ത്രിമാര്‍ നടത്തിയ പ്രസംഗത്തിന്റെ വിശദാംശം നല്‍കണമെന്ന്. പറയുന്നതാകട്ടെ ഗവര്‍ണറുടെ ഓഫീസും. പൗരത്വ നിയമ ഭേദഗതിക്കെതിരെ പൊരുതുന്ന പാര്‍ട്ടിയും മന്ത്രിമാരും ഒരുപോലെ അമ്പരന്നിരിക്കുകയാണ്. ഭരണഘടന തൊട്ട് സത്യം ചെയ്ത മന്ത്രിമാരുടെ ചെറിയ നാവ്പിഴ പോലും വലുതാകാനാണ് സാധ്യത. അതിന്‍മേല്‍ ഗവര്‍ണറുടെ നിലപാടും കേരളത്തെ മാറ്റി മറിക്കും.

ജില്ലാ ആസ്ഥാനങ്ങളില്‍ റിപ്പബ്ലിക് ദിനപരിപാടിയില്‍ മന്ത്രിമാര്‍ നടത്തിയ പ്രസംഗത്തിന്റെ വിശദാംശം നല്‍കണമെന്നു ജില്ലാ ഇന്‍ഫര്‍മേഷന്‍ ഓഫിസര്‍മാരോടാണ് രാജ്ഭവന്‍ ആവശ്യപ്പെട്ടിട്ടുള്ളത്. ആദ്യമായാണ് ഗവര്‍ണര്‍ പങ്കെടുക്കാത്ത പരിപാടിയുടെ വിശദാംശങ്ങള്‍ രാജ്ഭവന്‍ ആവശ്യപ്പെടുന്നതെന്ന് ചൂണ്ടിക്കാണിക്കപ്പെടുന്നു.

എന്നാല്‍ റിപ്പബ്ലിക് ദിനാഘോഷം പോലുള്ള പ്രധാന പരിപാടികള്‍ ശേഖരിച്ചു സൂക്ഷിക്കുന്നതിന്റെ ഭാഗാമായാണ് ഈ നടപടിയെന്നും ഇതില്‍ അസ്വാഭാവികതയില്ലെന്നും രാജ്ഭവന്‍.

മന്ത്രിമാരുടെ പ്രസംഗത്തിന്റെ പത്രവാര്‍ത്തകളുടെ സ്‌കാന്‍ ചെയ്ത കോപ്പി അയച്ചു കൊടുക്കണമെന്നാണ് രാജ്ഭവന്‍ ഇന്നലെ ജില്ലാ ഇന്‍ഫര്‍മേഷന്‍ ഓഫീസര്‍മാരോടു നേരിട്ട് ആവശ്യപ്പെട്ടത്.

പൗരത്വ നിയമവുമായി ബന്ധപ്പെട്ടു സംസ്ഥാന സര്‍ക്കാരും ഗവര്‍ണറും വിരുദ്ധതട്ടുകളില്‍ ആയിരിക്കെയാണ് രാജ്ഭവന്റെ നിര്‍ദേശം വിവാദമാകുന്നത്. പൗരത്വ നിയമവുമായി ബന്ധപ്പെട്ട്, ജില്ലാതല ചടങ്ങുകളില്‍ മന്ത്രിമാര്‍ എന്താണു പറഞ്ഞതെന്നറിയാനുള്ള നീക്കമാണിതെന്നാണ് ആരോപണം. സംസ്ഥാനത്തെ പ്രധാന പരിപാടികളുടെ വിവരങ്ങള്‍ ശേഖരിച്ചു സൂക്ഷിക്കുന്ന സംവിധാനം ആരംഭിച്ചതായും ഇനിമുതല്‍ റിപബ്ലിക് ദിനാഘോഷ പരിപാടികള്‍ ഫയലിങ്ങില്‍ എല്ലാ വര്‍ഷവും ഉള്‍പ്പെടുത്തുമെന്നും രാജ്ഭവന്‍ വൃത്തങ്ങള്‍ വ്യക്തമാക്കി.

സാധാരണ ഗവര്‍ണര്‍ പങ്കെടുക്കുന്ന ചടങ്ങുകളുടെ വാര്‍ത്തയുടെ കോപ്പികള്‍ രാജ്ഭവന്‍ ആവശ്യപ്പെടാറുണ്ട്. എന്നാല്‍, റിപ്പബ്ലിക് ദിനത്തിലോ സ്വാതന്ത്ര്യ ദിനത്തിലോ മന്ത്രിമാര്‍ നടത്തുന്ന പ്രസംഗത്തിന്റെ വിശദാംശങ്ങള്‍ രാജ്ഭവന്‍ തേടാറില്ല. ആദ്യമായാണു ഇങ്ങനെയൊരു നീക്കമുണ്ടാകുന്നത്. ഇക്കാര്യത്തില്‍ സര്‍ക്കാരുമായി ആലോചിച്ചാകും പബ്ലിക് റിലേഷന്‍സ് വകുപ്പ് മറുപടി നല്‍കുന്നത് തീരുമാനിക്കുക.

അതേസമയം കേരള നിയമസഭയെ അവഹേളിച്ച ഗവര്‍ണറെ രാഷ്ട്രപതി തിരിച്ചുവിളിക്കണമെന്ന് ആവശ്യപ്പെടുന്ന പ്രതിപക്ഷനേതാവ് രമേശ് ചെന്നിത്തലയുടെ പ്രമേയം നിയമസഭ പ്രസിദ്ധീകരിച്ചിരിക്കുകയാണ്. പ്രമോയത്തില്‍ യു.ഡി.എഫ് ഉറച്ചുനില്‍ക്കുന്നെന്ന് രമേശ് ചെന്നിത്തലയും വ്യക്തമാക്കിയിട്ടുണ്ട്. ഗവര്‍ണര്‍ ബി.ജെ.പിയുടെ മെഗാഫോണായി മാറി. പൗരത്വ ഭേദഗതി നിയമത്തിനെതിരായ പ്രതിഷേധത്തില്‍ സര്‍ക്കാരിന് ആത്മാര്‍ഥതയുണ്ടെങ്കില്‍ പ്രമേയത്തെ പിന്തുണയ്ക്കുമെന്നും ചെന്നിത്തല പറഞ്ഞു.

ഗവര്‍ണര്‍ അവതരിപ്പിക്കേണ്ട നയപ്രഖ്യാപന പ്രസംഗത്തില്‍ പൗരത്വ നിയമഭേദഗതിയെ എതിര്‍ത്തുകൊണ്ടുള്ള ഭാഗം കൂടി ഉള്‍പ്പെടുത്തിയാണ് മന്ത്രിസഭ അംഗീകാരം നല്‍കിയത്. ഇങ്ങനെ ഗവര്‍ണറെ കുടുക്കാനായി സര്‍ക്കാരും പ്രതിപക്ഷവും കൈകോര്‍ക്കുമ്പോള്‍ അതുക്കും മേലെയാണ് ഗവര്‍ണര്‍ ആരിഫ് മുഹമ്മദ് ഖാന്‍.