ഒന്നരയടി താഴ്ചയില് കുഴിയെടുത്ത് ഒളിപ്പിച്ചിരുന്ന ചരസ് കണ്ടെത്തി റാണയെന്ന ഡോബര്മാന്!
വടൂക്കരയിലെ കഞ്ചാവുകേസ് പ്രതിയുടെ വീട്ടില് ലഹരിവസ്തു സൂക്ഷിക്കുന്നുവെന്ന രഹസ്യവിവരത്തിന്റെ അടിസ്ഥാനത്തില് നെടുപുഴ പൊലീസ് പരിശോധന നടത്താനെത്തിയത് രണ്ടരവയസ്സുകാരനായ റാണയെന്ന ഡോബര്മാന് നായയോടൊപ്പമായിരുന്നു. തൃശൂര് പൊലീസ് അക്കാദമിയില്നിന്ന് ഒരു വര്ഷത്തെ പരിശീലനം പൂര്ത്തിയാക്കി നര്ക്കോട്ടിക് സ്നിഫര് ഡോഗ് പദവിയോടെ കഴിഞ്ഞ മാര്ച്ചിലാണ് റാണ, റൂറല് പൊലീസ് സേനയുടെ ഭാഗമായത്.
പരിശീലന കാലയളവില് എല്ലാത്തരം ലഹരിമരുന്നുകളും മണത്തറിയുന്നതില് പ്രത്യേക വൈദഗ്ധ്യം നേടി. 75% പെര്ഫോമന്സ് സ്കോര് നേടിയാണ് പുറത്തിറങ്ങിയത്. ദിവസവും രാവിലെ 6.45-ന് റാണയുടെ ഔദ്യോഗിക പരിശീലനം തുടങ്ങും. അര ലീറ്റര് പാലും ഖരഭക്ഷണവുമാണ് രാവിലത്തെ പതിവ്. വൈകിട്ടു നാലു മണിക്കു വീണ്ടും ഒന്നര മണിക്കൂര് പരിശീലനം. ഭക്ഷണത്തിനു ശേഷം വിശ്രമം.
പരിശോധനയ്ക്കെത്തിച്ചപ്പോള് വീടിന്റെ ഉള്ഭാഗം മുഴുവന് റാണ മണത്തുനടന്നു. ഒരു തവണ കൂടി മണമെടുത്ത ശേഷം പിന്ഭാഗത്തേക്കോടി. ഓട്ടത്തിനിടയില് പൊടുന്നനെ വെട്ടിത്തിരിഞ്ഞു. മൂക്ക് തറയോടു ചേര്ത്ത് ആഴത്തില് മണം പിടിക്കാന് ശ്രമിച്ചു. മതിലിനോടു ചേര്ന്നുള്ള ഭാഗത്തെത്തിയപ്പോള് എന്തോ കണ്ടെത്തിയ മട്ടില് ഹാന്ഡ്ലറെ നോക്കി കുരച്ചു. മുന്കാലുകള് ഉപയോഗിച്ചു നിലത്തു മാന്താന് തുടങ്ങി. കുഴി ഒന്നരയടി താഴ്ചയിലെത്തിയപ്പോള് പൊന്തിവന്നത് 2 ലക്ഷം രൂപയുടെ ചരസ്! സ്വതന്ത്ര ചുമതലയുള്ള കന്നി ദൗത്യത്തിലാണ് രണ്ടരവയസ്സുകാരനായ റാണയെന്ന ഡോബര്മാന് ചരസ് കണ്ടുപിടിച്ചത്.
പ്രതിയുടെ കൂട്ടാളികളായ പൊന്നാനി വെളിയംകോട് വലിയപുരയ്ക്കല് മുഹമ്മദ് ഇക്ബാല് (26), ഒളരി വഴിപറമ്പന് വീട്ടില് െഡന് സോറസ് (22) എന്നിവരും പൊലീസ് കസ്റ്റഡിയിലുണ്ട്. കഴിഞ്ഞ 24-ന് മുഹമ്മദ് ഇക്ബാലിന്റെയും സംഘത്തിന്റെയും കൈവശം സൂക്ഷിച്ചിരുന്ന കഞ്ചാവ് പൊലീസ് പിടിച്ചെടുത്തിരുന്നു.
ഇരിങ്ങാലക്കുട ഡോഗ് സ്ക്വാഡ് ആസ്ഥാനത്ത് റാണയെ കൂടാതെ എക്സ്പ്ലോസീവ് സ്നിഫര് ഡോഗ് പദവിയോടെ ലാബ്രഡോര് ഇനത്തില്പെട്ട ഹണിയും സ്വീറ്റിയും ഉണ്ട്. റെയില്വേ സ്റ്റേഷന്, ബസ് സ്റ്റാന്ഡുകള്, കോളജ് മൈതാനങ്ങള് എന്നിവിടങ്ങളില് ഒളിച്ചുവച്ച് സാംപിളുകള് കണ്ടെത്തുന്നതില് ഇവയ്ക്കു ഇപ്പോഴും സജീവ പരിശീലനം നല്കുന്നുണ്ട്. ഡോഗ് സ്ക്വാഡ് ഇന് ചാര്ജ് പി.ജി.സുരേഷ്, ഡോഗ് സ്ക്വാഡ് ഹാന്ഡ്ലര്മാരായ ടി.ആര്.രാഗേഷ്, എം.എഫ്.റിജേഷ്, പി.ഒ.ജോജോ എന്നിവരുടെ നേതൃത്വത്തിലാണ് പരിശീലനം.
https://www.facebook.com/Malayalivartha