ചോറ്റുപാറ ഭൂകമ്പമാപിനി പഠന കേന്ദ്രത്തില് പോര്ട്ടബിള് സീസ്മോ ഗ്രാഫ് സ്ഥാപിച്ചു
ഇടുക്കി ജില്ലയില് നെടുങ്കണ്ടം ചോറ്റുപാറ ഭൂകമ്പമാപിനി പഠന കേന്ദ്രത്തിലെ പോര്ട്ടബിള് സീസ്മോ ഗ്രാഫ് പ്രവര്ത്തനം തുടങ്ങി. ചെറു ചലനങ്ങള് വരെ ഇനി ഡല്ഹി നാഷനല് സീസ്മോളജി സെന്ററില് പരിശോധനക്കു വിധേയമാക്കും. ഭൂചലനമുണ്ടായത് ഭൂമിയുടെ ഉപരിതലത്തില് നിന്നും 2 കിലോമീറ്റര് താഴെയെന്ന് കഴിഞ്ഞ ദിവസം ജില്ലയില് എത്തിയ വിദഗ്ദ സംഘം കണ്ടെത്തിയിരുന്നു.
നാഷനല് സീസ്മോളജി സെന്ററിലെ വിദഗ്ദ സംഘം കഴിഞ്ഞ ദിവസമുണ്ടായ ഭൂചലനങ്ങളുടെ പ്രഭവ കേന്ദ്രമായ ചോറ്റുപാറയില് പരിശോധന നടത്തി പോര്ട്ടബിള് സീസ്മോ ഗ്രാഫ് സ്ഥാപിച്ചതോടെ ചെറു ചലനങ്ങള് വരെ നിരീക്ഷിക്കാന് സൗകര്യം ഒരുങ്ങി. 24 മണിക്കൂറും ഡല്ഹി നാഷനല് സീസ്മോളജി സെന്ററില് നിന്നു ചോറ്റുപാറ ഭൂകമ്പ മാപന കേന്ദ്രം നിരീക്ഷിക്കും.
കട്ടിയേറിയ പാറയുള്ള ചോറ്റുപാറ ഏറ്റവും അനുയോജ്യമായ സ്ഥലമാണ്. 1 മുതല് 3 മാസം വരെ നിരീക്ഷണം തുടര്ന്ന ശേഷം തുടര്പഠനം ആവശ്യമെങ്കില് മൈക്രോ സീസ്മിക് ഡിറ്റക്ഷന് സ്റ്റഡി നടത്തും. ജില്ലയില് റിക്ടര് സ്കെയിലില് 2.5 നു താഴെയുള്ള ചലനങ്ങളാണ് രേഖപ്പെടുത്തിയിരിക്കുന്നത്. കേന്ദ്ര കാലാവസ്ഥ നിരീക്ഷണ വകുപ്പിന്റെ കീഴില് പ്രവര്ത്തിക്കുന്ന നാഷനല് സിസ്മോളജിക് സെന്ററിലെ കൊടൈക്കനാല്, തിരുവനന്തപുരം സെന്ററുകളില് 2020-ല് മാത്രം ഇടുക്കിയില് 13 ചലനങ്ങള് രേഖപ്പെടുത്തി. കെഎസ്ഇബിയുടെ കണക്കില് 18 ചലനങ്ങള് നടന്നു.
ഭൂമിയുടെ ഉപരിതലത്തില് നിന്നും 1 മുതല് 2 കിലോമീറ്റര് വരെ ആഴത്തിലുള്ള ചലനങ്ങളാണ് നടന്നത് എന്നതിനാലാണ് കഴിഞ്ഞ ദിവസങ്ങളില് നടന്ന ചലനങ്ങളില് ശബ്ദം ഉണ്ടായതിനു കാരണം. ഭ്രംശ മേഖലയായതിനാലാണ് ചലനം തുടരുന്നത്. ഒരു കാരണവശാലും ജനങ്ങള് ഭയക്കേണ്ട സാഹചര്യമില്ലെന്നും സംസ്ഥാന ദുരന്ത നിവാരണ അതോറിറ്റി റിസ്ക് അനൈലിസ്റ്റ് ജി.എസ്.പ്രദീപ്, ജില്ല അനൈലിസ്റ്റ് സുസ്മി സണ്ണി,നാഷനല് സീസ്മോളജി സെന്ററിലെ വിദഗ്ദരായ കുല്വീര് സിങ്, എം.എല്.ജോര്ജ് എന്നിവര് അറിയിച്ചു.
രാജ്യത്തു ഭൂചലനമുണ്ടാകാന് സാധ്യത കുറഞ്ഞ സോണ് മൂന്നിലാണ് ഹൈറേഞ്ച്. ചലനങ്ങള് തുടര്ന്നതും, ഡാമുകള് കൂടുതലുള്ളതിനാലുമാണ് പ്രത്യേക സംഘത്തെ ജില്ലയില് എത്തിച്ചത്. കെഎസ്ഇബി ഡാം സേഫ്ടി വിഭാഗം വിദഗ്ദ സംഘത്തെ അനുഗമിച്ച് ഭൂചലനമുണ്ടായ കേന്ദ്രങ്ങളിലെ സ്ഥിതിഗതികള് വിശദീകരിച്ചു. സംസ്ഥാന ദുരന്ത നിവാരണ അതോറിറ്റിയുടെ അഭ്യര്ഥന മാനിച്ച് ദേശീയ ദുരന്ത നിവാരണ അതോറിറ്റി നിര്ദേശം അനുസരിച്ചാണ് സംഘം എത്തിയത്. ആദ്യഘട്ടത്തില് നെടുങ്കണ്ടം പ്രഭവ കേന്ദ്രമാക്കി എന്തുകൊണ്ട് ഇത്തരം ചലനങ്ങള് ഉണ്ടാകുന്നുവെന്നു വിലയിരുത്തും.
https://www.facebook.com/Malayalivartha