ഒരാഴ്ച മുമ്പ് അദാനി വിഴിഞ്ഞം തുറമുഖ കമ്പനിയുടെ തലപ്പത്തുള്ള ഉദ്യോഗസ്ഥൻ (CEO) കൊച്ചിയിൽ ഒരു മീറ്റിംഗിൽ പ്രസ്താവിച്ചത് 2023 ഡിസംബർ മാസത്തോടെ വിഴിഞ്ഞം പോർട്ട് പ്രവർത്തനം "തുടങ്ങിയേക്കാം" എന്നായിരുന്നു. എന്തായാലും തുറമുഖ പുലിമുട്ട് നിർമ്മാണം തകൃതിയായി നടക്കുകയാണ്. കഴിഞ്ഞ വർഷങ്ങളിൽ പുലിമുട്ടിനായി കടലിൽ ഇട്ട പാറക്കല്ലുകൾ മെയ്, ജൂൺ മാസങ്ങളിലെ കടലേറ്റത്തിൽ വലിയ തോതിൽ ഒലിച്ചു പോയിരുന്നുവെന്ന വിമർശനവുമായി ഹരീഷ് വാസുദേവൻ രംഗത്ത്.

അദ്ദേഹം ഫേസ്ബുക്കിൽ പങ്കു വച്ച കുറിപ്പിന്റെ പൂർണ്ണ രൂപം ഇങ്ങനെ; കേരളത്തിന്റെ തുറമുഖ വകുപ്പ് മന്ത്രി ഇന്നലെ വിഴിഞ്ഞത്ത് അദാനിയുടെ വാണിജ്യ തുറമുഖ പദ്ധതി പ്രദേശം സന്ദർശിച്ചതും ഈ വർഷം തുറമുഖം ഉൽഘാടനം ചെയ്യുമെന്ന് പ്രസ്താവിച്ചതും ഇന്ന് പല പത്രങ്ങളിലും റിപ്പോർട്ട് ചെയ്തിരുന്നു . ഒരാഴ്ച മുമ്പ് അദാനി വിഴിഞ്ഞം തുറമുഖ കമ്പനിയുടെ തലപ്പത്തുള്ള ഉദ്യോഗസ്ഥൻ (CEO) കൊച്ചിയിൽ ഒരു മീറ്റിംഗിൽ പ്രസ്താവിച്ചത് 2023 ഡിസംബർ മാസത്തോടെ വിഴിഞ്ഞം പോർട്ട് പ്രവർത്തനം "തുടങ്ങിയേക്കാം" എന്നായിരുന്നു.

എന്തായാലും തുറമുഖ പുലിമുട്ട് നിർമ്മാണം തകൃതിയായി നടക്കുകയാണ്. കഴിഞ്ഞ വർഷങ്ങളിൽ പുലിമുട്ടിനായി കടലിൽ ഇട്ട പാറക്കല്ലുകൾ മെയ്, ജൂൺ മാസങ്ങളിലെ കടലേറ്റത്തിൽ വലിയ തോതിൽ ഒലിച്ചു പോയിരുന്നു. ഈ വർഷം ഇടുന്ന പാറക്കല്ലുകൾ ഒലിച്ചു പോകാതിരിക്കാൻ സംരക്ഷണമെന്ന നിലയിൽ കൂറ്റൻ അക്രോപ്പാഡുകൾ കൂടി ഇടുകയാണ് (ഇത് സംബന്ധിച്ച കേരളകൗമുദി വാർത്ത കാണുക). ഇതിന്റെ ഫലം (കല്ലുകൾ ഒലിച്ചു പോകുമോ ഇല്ലയോ എന്നത്) വരുന്ന മെയ് മാസത്തിൽ നമുക്ക് കാണാൻ കഴിഞ്ഞേക്കും.

ഇവിടെ ഞാൻ എടുത്തുപറയാൻ ആഗ്രഹിക്കുന്ന കാര്യം പുലിമുട്ട് നിർമ്മാണം പ്ലാൻ അനുസരിച്ച് തെക്കോട്ട് വളയേണ്ട ഇടം വരെ എത്തിക്കഴിഞ്ഞു എന്നതാണ്. അതായത് പ്രകൃതിദത്തമായി വിഴിഞ്ഞം-കോവളം തീരത്തുള്ള കടലിലേക്ക് നീണ്ടു നിൽക്കുന്ന കോടികളേക്കാൾ (മുനമ്പുകൾ) ഇപ്പോൾ സമുദ്രത്തിൽ തള്ളിനിൽക്കുന്നത് ഈ കൃത്രിമ പുലിമുട്ടാണ് (ഗൂഗിൾ ഭൂപടം കാണുക). എന്റെ അഭിപ്രായത്തിൽ അതുകൊണ്ടു തന്നെ, ഈ വർഷത്തെ പ്രത്യാഘാതങ്ങളിൽ രണ്ടെണ്ണം കൂടുതൽ രൂക്ഷമായിരിക്കും.

ഒന്ന്, വിഴിഞ്ഞം മത്സ്യബന്ധന തുറമുഖത്തിലെ പ്രവേശന കവാടത്തിലും അതിനുള്ളിലും ഈ വർഷം മെയ് മുതൽ ഓഗസ്റ്റ് വരെയെങ്കിലും വലിയ തിരയടിയും മീൻപിടുത്തക്കാരുടെ വള്ളങ്ങളെ നിയന്ത്രിക്കാൻ കഴിയാത്ത വിധം ഓളങ്ങളും ഉണ്ടാകും. തൽഫലമായി അപകടങ്ങളും കൂടുതലാകും. കഴിഞ്ഞ വർഷം ഇങ്ങനെയുണ്ടായ അപകടത്തിൽ നാല് മത്സ്യത്തൊഴിലാളികളാണ് മരണമടഞ്ഞത് എന്നതും മറക്കേണ്ട. രണ്ടാമതായി, ഈ വർഷം വിഴിഞ്ഞത്തിന് വടക്ക് പനത്തുറ മുതൽ വേളി വരെ കടലേറ്റവും തീരശോഷണവും കൂടൂതലായിരിക്കും. കൂടുതൽ വീടുകളും സ്ഥലങ്ങളും നഷ്ടമാകും.

അദാനിയുടെ നിർമ്മാണ പ്രവൃത്തികൾ ആരംഭിച്ച ശേഷം സംഭവിച്ച തീരശോഷണത്തെ മറികടക്കാൻ ശംഖുമുഖത്ത് നടക്കുന്ന നിർമ്മാണ പ്രവൃത്തികളും അതു പോലെ കൃത്രിമ തീരം വയ്പ് ലക്ഷ്യമിട്ട് പൂന്തുറ ഒരു പരീക്ഷണമെന്ന നിലയിൽ ആരംഭിച്ചിട്ടുള്ള ഓഫ്-ഷോർ ബ്രേക്ക്-വാട്ടർ (ജിയോട്യൂബ്) നിർമ്മാണ പ്രവൃത്തികളും ഈ വർഷം ഉണ്ടാകാൻ പോകുന്ന കടലേറ്റത്തെ അതിജീവിക്കുമോ എന്ന് കണ്ടറിയണം. എന്റെ അഭിപ്രായത്തിൽ ഇവ രണ്ടും വിജയിക്കാനുള്ള സാധ്യത കുറവാണ്. ഇതിന് പ്രധാന കാരണം വിഴിഞ്ഞത്തെ നീണ്ടുവന്നിട്ടുള്ള പുലിമുട്ടും തൽഫലമായുള്ള ശക്തമായ കടലേറ്റവും ആയിരിക്കും.

ഇന്നത്തെ മാതൃഭൂമി പത്രത്തിൽ വിഴിഞ്ഞത്തെ പുലിമുട്ട് നിർമ്മാണത്തിനൊപ്പം “മൂന്ന് വർഷത്തിനിടെ തുടർച്ചയായുണ്ടായ കടലേറ്റത്തിൽ കോവളം തീരം കടലെടുത്ത”തിനെ നേരിടാൻ സംസ്ഥാന തുറമുഖ വകുപ്പ് 66 കോടി രൂപ ചെലവ് വരുന്ന ഒരു പദ്ധതി തയ്യാറാക്കിയെന്ന വാർത്തയുണ്ട് (10 ഫെബ്രുവരിയിലെ വാർത്ത കാണുക). അവിടെയും കടലിൽ വേറിട്ടു നിൽക്കുന്ന ഒരു പുലിമുട്ട് നിർമ്മിക്കാനാണ് പ്ലാൻ. ഇതിന് എത്ര ലക്ഷം ടൺ കരിങ്കല്ല് വേണമെന്ന് പറയുന്നില്ല! എന്തായാലും കോവളം തീരം ഈ മൂന്ന് വർഷത്തിനിടെ കടലെടുത്തു പോയതിന് കാരണം വിഴിഞ്ഞം അദാനി തുറമുഖത്തിന്റെ നിർമ്മാണ പ്രവൃത്തിയാണെന്ന വസ്തുത ബോധപൂർവം വാർത്തയിൽ മറച്ചുവയ്ക്കുന്നു.

കോവളം തീരം നശിക്കുമെന്ന് നേരത്തേ പദ്ധതി രേഖയുടെ അടിസ്ഥാനത്തിൽ ഞാനുൾപ്പെടെയുള്ളവർ 2015-ൽ ചൂണ്ടിക്കാണിച്ചപ്പോൾ, ഞങ്ങളെ ടൂറിസം ലോബിയുടെ ആളുകളായി ചിത്രീകരിക്കാനാണ് പലരും ശ്രമിച്ചത്. ഇന്നലെ വിഴിഞ്ഞം സന്ദർശിച്ച തുറമുഖ മന്ത്രി, അദാനിക്ക് വേണ്ടി കൊണ്ടു വരുന്ന കരിങ്കല്ലുകൾ കോൺട്രാക്ടർമാർ അനധികൃതമായി മറ്റുള്ളവർക്ക് കടത്തുന്നത് തടയാൻ പുതിയ ഹോളോഗ്രാം സാങ്കേതിക വിദ്യ ഉൽഘാടനം ചെയ്തെന്നും വാർത്തയിൽ പറയുന്നുണ്ട്. നമ്മുടെ സംസ്ഥാനത്ത് ഇപ്പോൾ കരിങ്കല്ലുകൾ ഉപയോഗിക്കാൻ അദാനിക്ക് മാത്രമാണ് അവകാശമെന്ന് തോന്നുന്നു.

നാട്ടിലെ സാധാരണക്കാർക്ക് ഒരു വീട് നിർമ്മിക്കാൻ കരിങ്കല്ല് വേണമെങ്കിൽ അത് ആരിൽ നിന്ന് വാങ്ങിയാലും “അനധികൃത”മാകുന്ന അവസ്ഥയാണ് ഇന്നുള്ളത്. കേരളത്തിലെ പാറമടകളിൽ നിന്നു മാത്രമല്ല തമിഴ്നാടിൽ നിന്നും അദാനിക്ക് കല്ല് എത്തുന്നുണ്ട്. അങ്ങനെ  നമ്മുടെ മലനിരകളിൽ നിന്നും പാറക്കല്ലുകൾ കൊണ്ടുവന്ന് കടലിന്റെ അടിത്തട്ടിൽ താഴ്ത്തുന്നത് വികസനവും, മറ്റുള്ളവർ കരിങ്കല്ല് വാങ്ങി വീട് കെട്ടാനും മറ്റും ഉപയോഗിക്കുന്നത് കുറ്റകരവും ആയി മാറുന്ന സ്ഥിതി. അംബാനിയെ പിന്തള്ളി ഇന്ന് ഇന്ത്യയിലെ ഏറ്റവും വലിയ ധനികൻ അദാനിയാണെന്ന് വാർത്തയുണ്ടായിരുന്നു. അങ്ങനെ ആകുന്നതിന് കേന്ദ്രം ഭരിക്കുന്ന മോഡി മാത്രമല്ല, കേരളം ഭരിക്കുന്ന ഇടതുപക്ഷ മുന്നണിയും സഹായിക്കാതിരുന്നാൽ എങ്ങനെ? നാമിനി ജീവിക്കാൻ പോകുന്നത് ഇൻഡ്യൻ റിപ്പബ്ലിക്കിൽ അല്ല അദാനി റിപ്പബ്ലിക്കിൽ ആണല്ലോ!